Read Ntcham Esaïe 32 Bible Online

Esaïe 32 - Ntcham bible

Esaïe 32

¹Ubɔti ubɔ làá dāá jī dibeel nì deedee, ní abɔtibil ń dāá ŋúb́ kitiŋ ibaamɔn saŋŋun.

²Bi-kansikin báà ŋma làá dāá nīn sá kii laakin kubuŋu yaa bíi jītí binib sáń kí báĺee, kii laakin utaaja yaa bíi nì binib sáń ki kóòyee, kii mbun ŋun di pùub̀ kitiŋkuliŋŋi puee, kii ditaŋkpal din tìì mboon kitiŋ kin tùm̀ee poonee.

³Bin nimbiliŋ wāĺee kaa dāa gíti jɔ̀b̀, bin tafaliŋ gbìl̀ee dāa ŋátí bi-tafaliŋ kí pīlifì.

⁴Nnaatuumu làá dāá dàkafì kí gbìl̄ tibɔti taapu, binib bin sòoǹ dibeebeelee dāa kíǹ ki sòoǹ cábcab.

⁵Baa dāa gíti tìì ugbaan jilma, kaa dāa gíti yíì ukiildi yii unimɔnti.

⁶Ugbaan sòoǹ tigbaambɔti ŋma ní, ní u-pɔbilinee, u dàkafī tikpitil ŋma. U tūǹ ntimbiil tuuŋŋi, ní ki sòoǹ ki bíiĺ ti-Dindaan. Waa pūǹ un ŋkùm cááyee ú jī, kaa pūǹ un nnyinnyoo cááyee ú nyɔ̀.

⁷Ukiildi úǹ tūǹ atuŋkpiti ŋma ní. U bɔ́ntí atuŋkpiti ki mɔ́ntí inyimɔn kí nàan̄ uwɔfi. Ama kun uwɔfi gbanti pée nyàab̀ee di sá bí pɔ̀-u.

⁸Ama unimɔnti úǹ cáá ilandɔkɔmɔnti ní, ní atuun ŋin u tūǹee sá atummɔnti.

⁹Nimbi binimpoobi bin kaa dàkafī tiba puee, yīkìmaan kí pīlifìmaan-mi. Nimbi bisapɔmbi bin máká ni-ba puee, kpòom̄maan ni-tafaliŋ kí pīlifì.

¹⁰Nì dibindi diba boonee, nimbi bin máká ni-ba puee, ni-wunti làá dāá jìkì. Di sá yii bi dāa kìtī fiinyi biliŋ kí dóó, ní tiba kaa dāa gíti bí bí kìtī.

¹¹Nín̄ jìkìmaan, nimbi binimpoobi bin kaa dàkafī tiba puee, nín̄ yáliŋkímaan, nimbi bisapɔmbi bin máká ni-ba puee. Pèetīmaan ni-wampeeŋkaati, lòotīmaan dicancaŋgbeel kí dū kpɔsatab kí cúú ni-cammu.

¹²Nín̄ fátímaan ni-biŋŋi nì kunimbaau kí nīn yáliŋkí tisati tin ŋān̄ee nì fiinyi kpaaŋŋi ŋin lòoǹ sàka sakee pu.

¹³Nín̄ sūm̀maan m-nibul tiŋki kin pu ikuŋkum nyáńee pu, nín̄ sūm̀maan adiin ŋin kɔkɔ poon dipɔɔpindi bí, ní kitiŋ bí jiŋaal poonee pu.

¹⁴Bi dū dibeecindi ki fá, ubɔ kaa ti bí kitiŋ kin poon an nìn tùm̀ee. Oofeel tincaliiki[70] nì sintil difɔkɔku làá dòon̄ kikuliŋŋi kí nīn cáa cá jaanjaan. Niin ní kumooun mammu dāa bí ki léelikí, ní tipicaŋkpun dāa ŋmóò timool.

¹⁵Ŋwindalee, ŋfam làá dāá kpákatiń ti-pu. Niinee ní kuteeu làá dāá kpántí asubiŋmɔkaa kpaabu, ní asubiŋmɔkaa kpaabu ń dāá kpántí kubambaŋŋu.

¹⁶Bi làá dāá nīn tɔ́ ibaamɔn kuteeu pu, ní kí dāá ká deedee asubiŋmɔkaa kpaabun.

¹⁷Dibil din deedee làá dāá lòoǹee di sá ŋgbansɔŋfi. Dì làá dāá cáań dipɔɔsɔŋkil nì diwundi kí nīn cá jaanjaan.

¹⁸M-nibul làá dāá nīn kóò laakin ŋgbansɔŋfi bée, ikɔŋkoon in poon unil bí kaa fàŋkí tibee, laakin diŋuŋfil nì dipɔɔsɔŋkil bée.

¹⁹Ama ataanyiŋkumbil làá dāá lítí kubambaŋŋuee pu, ní kitiŋee ń dāá sìntī taapu taapu.

²⁰Án dāa sá-ni mmɔn ní dāá ŋmā kí bɔ̄l̀ ni-wamboolii laakin kamaa nnyim bée caŋin, ní kí dāá gbìntī unaa nì kimaŋ kí líí.