Read Ntcham Esaïe 33 Bible Online

Esaïe 33 - Ntcham bible

Esaïe 33

¹Mbusu dɔ̄ ki cí sii un bíiĺ, ama ní ubɔ kaa bíil̀ siiyee, sii un nyēē a-jutiibi boon, ama ní ubɔ kaa nyēē a-boonee. A yaa láa bíil̀ ki dóòyee, bi làá dāá bīil̀ si mun. A yaa láa nyáń a-jutiibi boon ki dóòyee, bi làá dāá nyā sii mun boon.

²Ti-Dindaan, dàkà-ti a-ŋanti! Sii pu ní timbi máká. Nín̄ sá ti-pɔŋŋu kutaafaau kamaa, ní kí nīn sá ti-fiiliu dinimbinaamandi poon.

³A yaa téeńee, anibul sáń kí kátí ní, a yaa yáatì ki yúl̀ee, atimbun yàl̀ ní.

⁴Niinee ní bí kíĺ ki bíi fúkuĺ-ni, a lì kii inaakitoon nín gbáb̀ kí bìin̄ tiwan pu puee. Bi làá gbáb́ kí bìin̄ tigaajawan pu bɔ̀mmm kii inaakee.

⁵Ti-Dindaan tɔ́kɔ́ tikɔkɔ pu, kun puee u kóòń yilpu ní. U yāntì deedee nì ibaamɔn kíǹ ki bí Siiyɔn jool pu.

⁶Sii ti-Dindaan nibul, a làá nīn bí ŋgbansɔŋfin. Iciin nì dinyil sá tigaajati tin fìil̄ee ní. Á nīn fàŋkí ti-Dindaanee sá tigaajawan ní.

⁷Kpèèmaan Ariyeel yab bí ki kūuntí adan pu. Ŋgbansɔŋfi tuuŋyi bí ki sūǹ lɔ̀lɔlɔ.

⁸Adan kíǹ ki dɔ̄ fám ní, binib kaa ti còom̄ isan pu. Bi kpītì mpèé, ki fá ntimu, kaa ti pée fātìi tɔ́ báà unil.

⁹Kitiŋ kɔ́ kunimbaaun ki bí ki kōō. Leebanɔn jool sufii bíi yɔ́l̀, ní icoo kɔ́-dì. Saarɔn tiŋki kpántì kii kuteeuee. Baasan tiŋki nì Kaarmeel jool kaa ti cáá isufi.

¹⁰Ti-Dindaan bí yii: «Kɔŋkɔnnee m làá tɔ̄ m-tundi, kɔŋkɔnnee m làá yáatí kí yūĺ, m làá dàkà m-pɔŋŋu.

¹¹Ni nín bɔ́ntí kí ŋá tiŋyee sá kii timɔkulindee ní. Ni-fooku di sá ŋŋmi ŋun làá dāá wà-nee.

¹²Anibul ŋin kíǹee làá dāá wà ŋŋmi, kí kpántí kii kaluuyee. Ŋi làá dāá wà kii ikuŋkuŋfi in bi gāā ki fée ní.

¹³Nimbi bin bíń ndandatee, ní pīlifìmaan tin ní m ŋée. Ní nimbi bin bí ki pìlīǹ dooyee, ní béémaan m-pɔŋŋu nín sá ŋuŋyee.»

¹⁴Dinyoondi kɔ́ bikpitiŋaliibi bin bí Siiyɔn jool puee, binikpitib wunti fōō dijinjikil. Bi kíǹ ki bàlifī yii: «Ti-kansikin ŋma di ŋūǹ kí yūĺ ŋŋmi ŋun wù ki céetí nee caŋin? Ŋma di ŋūǹ kí yūĺ kí kɔ́ĺ aŋmilimbil ŋin kaa kúù jaanjaan nee?»

¹⁵- See unil un nóó deedee saŋŋu, ki sòoǹ ibaamɔnee. An niliuee kaa ŋáań tipɔmbɔti kí ká ipaati, úǹ kaa kíikí kí fōō dinyɔɔŋeebil jim. Bi yaa bíi sòoǹ nnikpaakoon bɔtee, u ŋēeb̀ u-tafaliŋ ní kí taa gbìl̄. U ŋúb̀ u-nimbiliŋ kí taa wāl̀ tikpitil.

¹⁶Udaan làá nīn kóò ajoon yilpu. Kutaŋkpanaakoou di làá nīn sá u-balilaŋki. U làá nīn kāntí tijin ki jīǹ, ní nnyinyɔkaam kpá kí lóó-u.

¹⁷A-nimbil làá dāá ká ubɔti u-nyaaŋku kɔkɔ poon, ní kí dāá ká kitiŋ nín pée dɔ̄ ki wāā puee.

¹⁸A làá dāá dàkafì tin nìn kɔ̄ntí-si dinyoondee pu ní kí bàlifì a-ba yii: «Bin nìn kàaǹ lampoo nimbiliŋee bí la? Bin nìn kpèé lampoobee bí la? Bin nìn kpèé sintil difɔkɔŋee bí la?»

¹⁹Aa làá dāá gíti ká dinibul din cáá dilambilee, dinibul din sooŋyi unil kaa gbìl̀ taapuee, isooncaan in báà ubɔ kaa gbìl̀ee.

²⁰Kpèè Siiyɔn tiŋki kin poon ti kpáfí ki jīǹ jiŋaalibee, a-nimbil làá dāá ká Jeerusaleem, dipɔɔsɔŋkil tiŋki. Kì dāa sá tanti un ní baa làá ti sútée, tanti un kpakpaaŋi baa làá ti cóotée, tanti un ŋmiii baa làá ti kútí dalba dalbee.

²¹Niin ní ti-Dindaan làá dàkà-ti u-pɔŋŋu. Án dāa sá laakin ní amɔɔ nì ibun in wāāyee bée, baa dāa ŋàal̀ niin iŋaliŋfi, meelab bin sá bikpaambee kaa làá dāá dùtī niin.

²²Tiŋman pu, ti-Dindaan di sá ti-bɔsoonliu, úǹ di sá ti-marayóonliu. Ti-Dindaan di sá ti-bɔtiu, úǹ di sá ti-fiiliu.

²³A-ŋmiii cúu kútì ní nee, iaa ti ŋúb́ ndɔ ŋun pu meela ŋaabuŋu sàkantée, baa ti ŋūǹ kí sàkan̄ meela ŋaabuŋu ndɔ pu. An pu ní ti làá dāá yàkatī tigaajawan tikpil. Ki kpáaǹ gba bin tà bi-taaŋi puee làá dāá kūtì ti-pu tí fūkul̀.

²⁴Binib bin kóò Jeerusaleem tiŋkinee, ubɔ kaa dāa gíti lì yii: «M būǹ!» Binib bin kóò niinee làá dāá ká bi-kpitii pɔ̄tam.