Read Ntcham Esaïe 34 Bible Online

Esaïe 34 - Ntcham bible

Esaïe 34

¹Atimbun, sútiḿmaan doo kí dāá pīlifì, anibul, ní kpòom̄maan ni-tafal kí pīlifì. Kitiŋ nì tin kɔkɔ bí ki-poonee ń pīlifì, duulinya nì tin kɔkɔ nyáń u-nee ń pīlifì.

²Ti-Dindaan fōō mbum atimbun kɔkɔ nib pu, u gíí diŋuul tikpil bi-janjakitiŋi kɔkɔ pu. U lēē ki síiǹ bí kpɔ̀ kí céetí-bi, u dū-bi ki tīī bí bɔ̀fì kí kúntí-bi.

³Bi-nib bin bi kūūyee dɔ̄ kitiŋ fìlfil, bi-nikpiliŋ sūū ki núukì, ní bi-fatikuu pùub̀ ajoon pu ki sìntī.

⁴Iŋmalbijaa kitil làá dāá yàl̄. Kutagbɔŋu làá kpáb́ kii kugbɔŋuee, ní tin kɔkɔ pée bí ku-puee ń kìtī kí lítiń kitiŋ, kii fiinyi subu àá fiigi subu faati nín gbátí kí lítí puee[71].

⁵Di sá yii ti-Dindaan tàataajiki nyáń ki páaǹní kutagbɔŋu pu. Kì lítì Eedoom tiŋki pu[72], dinibul din ní u lēē kí kpɔ̀ kí céetée.

⁶Ti-Dindaan tàataajiki nyùn̄ fatiku ki bál̀, kì ŋmɔ́ ŋkpam ki díkí, a lì kii apibil nì iŋɔjaa fatikuuee, a lì kii ŋkpam min bīī ipijaa ceebiliŋ puee. Bɔsiraa, ditiŋyilinee, ti-Dindaan bɔ́ntì kí ŋá saraa ubɔ. Bi làá pɔ̀fì binib tikpil Eedoom tiŋkin.

⁷Bi nì ipɔɔnaa nì anabil nì inajaa di làá kpāfì kí lítí. Bi-tiŋki làá nyɔ̀ fatiku kí báĺ, ní bi-tam ń nyɔ̀ ŋkpam kí díkí.

⁸Án sá ŋwiin ŋun ti-Dindaan làá tɔ̀ Eedoom yab ipɔntoonee ní[73], dibindi din ní u làá mɔ̄tì Siiyɔn pu kí pà Eedoom yab bi-tuuŋŋi paatee ní.

⁹Eedoom tiŋki buŋyi làá kpántí aŋɔ, ní ki-tam ń kpántí farwata. Kì làá kpántí kii aŋɔ un bí ki wùee ní.

¹⁰An yaa sá kunyeeuaaa, ŋwiimpuɔɔɔ, ŋu kpá ki làá kpú. Ŋu-nyiim làá nīn jɔ́ḿ kutaa pu ní ki cá jaanjaan[74]. Kitiŋ gbanti làá kpántí kii kuteeuee ní ki cá abin abin, báà uniseen kaa dāa gíti còom̄ ki jītí niin.

¹¹Ditulinjool nì kilabinsaŋ di làá dāá nīn kíǹ ki yì-kì, kitulinjakpatibooi nì digaliŋgaal di làá dāá nīn kóò ki-ni. Ti-Dindaan làá dāá tàntī dinàandi ŋmiiŋu Eedoom tiŋki pu, u làá dāá kpátí-kì ní tiba nì tiba kaa dāa gíti bí ki-pu.

¹²Akpambal kaa dāa gíti bí kí kàan̄ ubɔti, abɔtibil kɔkɔ dāa kpíì ki dóò dee.

¹³Ikuŋkum làá dāá nyā ki-beeciŋŋin, sintil difɔkɔŋi dāa kpántí abɔjanaakun nì ŋkuŋkumbɔmu ŋma ní. Niin làá dāá kpántí sinsiŋkub kɔŋkooŋŋu, kí dāá kpántí atulinjoo dumpu.

¹⁴Ilambunti dāa tūŋkí isaakpan nsanni, ní iŋɔjaa ń dāá kóoǹ kí kpāfì niin. Niin ní Liliiti, kunyeeu faŋfantiu dāa kóò. Niin ní u dāa kāntí diŋuŋfil.

¹⁵Niin ní ukoobu làá dāá ŋá u-diiku, kí tɔ̄ ajin, kí wùkun̄ ŋi-pu, kí wúń ŋi-pu ŋí dāá kákatí. Niin mun ní kaajiikub dāa kpáfí, kaajiiku kamaa nì u-ŋàliŋu.

¹⁶Ni yaa nyàab̄ ti-Dindaan gbɔŋkunee, ni làá ká bi ŋmàn̄ yii: «Bi-kansikin báà ubɔ kaa làá fɔ́tí, báà ubɔ kpá kí fá u-juti, di sá ti-Dindaan nyɔkɔn ní mara nyáń, u-Fam di kóoǹ-bi ki kpáfì.

¹⁷Úǹ u-ba di tɔ́ kasi ki tīī báà ŋma u-tinjandi, u dū ŋŋmii ní ki ŋmāntì kitiŋ ki tīī-bi. Bíǹ di làá nīn yì-kì kí nīn cá jaanjaan, bi làá nīn kóò ki-pu kí nīn cá abin abin.»