Read Ntcham Esaïe 35 Bible Online

Esaïe 35 - Ntcham bible

Esaïe 35

¹Án nīn mɔ̄ǹ kuteeu nì kitiŋkuliŋŋi, kitiŋ kin pu nnyim kpée ń nīn fàal̀ kí púkuḿ.

²Tisatin pumpukum ń bìin̄ ki-pu. Nín̄ fàal̀, nín̄ fàal̀ kí nīn fátí iwiliili. Ti-Dindaan làá tīī-si Leebanɔn jooŋŋi nyooti juti, kí tīī-si Kaarmeel jool nì Saarɔn timpiliŋki nyaaŋku. Niinee báà ŋma làá dāá ká ti-Dindaan nyooti, ti-Nimbɔtiu nyaaŋku.

³Ní pɔ̄ɔkìmaan iŋal in gīīyee, kí pɔ̄ɔkì atabiŋyil ŋin yɔ̄tèe[75].

⁴Tùkùmaan bin pɔbiliŋ bíil̀ee yii: <Ní kámaan dipɔbil, ní taa fàŋkìmaan. Kpèèmaan ni-Nimbɔtiu. U dòoń kí tɔ̀-ni ipɔntoon kí téeǹ ni-nannanliibi tikpitil tin bi ŋá-nee. Ni-Nimbɔtiu u-ba di dòoń kí fīī-ni nee.>

⁵Niinee, bijɔfub nimbiliŋ làá ŋúbití, ní bitafakpaafub tafaliŋ ń ŋátí.

⁶Niinee, udeen làá dāá nīn yùkufī kii upeemanee[76], ní umuun ń dāá nīn kíǹ ki tátí mpɔn ki fàal̀. Nnyim làá dāá cɔ́tí kuteeu pu, ní ibun pùub̀ kitiŋkuliŋŋi pu.

⁷Kitiŋ kin tùm̀ kpaŋkpamee làá kpántí mbúun, inyimbul làá cɔ́tí nnyinnyoo tiŋki poon. Laakin ní sinsiŋkub nìn dɔ̀ee, niin làá kpántí kupuu ní tikati ń nyā.

⁸Bi làá dāá tɔ̄ didandi diba niin, kí dāá nīn yíì-dì yii <circir saŋŋu>. Unil un kaa bí circiree kaa dāa dì-ŋu, ŋu dāa sá ki tīī ti-Dindaan nibul ní. Báà ugbaan ubɔ kaa dāa yìntī kí dī-ŋu.

⁹Gbikinti ubɔ dāa kpá niin, upeecuncuti ubɔ kaa dāa jītí niin. Baa dāa kāntí tíǹ gbanti báà tiba niin. Binib bin ti-Dindaan fōō ki líìyee baba di dāa dì nsan gbanti.

¹⁰Niin ní bin ti-Dindaan dá ki líìyee làá dī kí fàtīí gítiń. Bi làá bàń Siiyɔn jool pu ki gà ilan ki fàal̀. Bi làá dāá gbí mmɔn ŋun kaa kúntée. Mmɔn nì dipɔɔpindi làá dāá céeǹ-bi ní kunimbaau nì iyaliŋki ń gbèen̄.