Read Ntcham Esaïe 36 Bible Online

Esaïe 36 - Ntcham bible

Esaïe 36

¹Ubɔti Eeseekiyaasi nín jíń dibeel dibindi diba kpá saalku poonee ní Asuur bɔtiu Seenakeeriibi dɔ́miń ki jáń nì Juuda yab timmu mun bi máń agun ki māntìi túee kɔkɔ ní ki fōō-mu.

²Asuur bɔtiu nìn bí Lakiisi tiŋkin ní ki dū u-janjakpiliu ki tú ubɔti Eeseekiyaasi cee Jeerusaleem tiŋkin, u nì dijanjakitikpaandi diba nóó. Ujanjakpilee bàn̄ee ní ki síl̀ kunyiŋfuŋu kun bi cátì nnyim dì ki kóò dinyimbɔbil din bí yilpu púee. Dinyimbɔbil gbanti nìn dɔ̄ didandi din cá biwaŋfintiliibi kpaabunee watil pú ní[77].

³Ní Yiilkiyaawuu jipɔɔn Eeliyaakiim un kpèé ubɔti cindee, nì ubɔti gbaŋŋmaliu Seebina nì Asaafi jipɔɔn Yoowa un kpáafí ubɔti gbɔntee nyáń ki túŋkì ujanjakpilee.

⁴Bi bàn̄ee ní ujanjakpilee bí-bi yii: «Ní cùú tùkù Eeseekiyaasi yii tibɔti tin ní Ubɔtikpaan, Asuur bɔtiu sòon̄ee sèé: <Ba pu ní a máká ní?

⁵A dàkafī yii anyɔɔbun fám ŋūǹ kí fōō kujaau bɔ́ntitam nì dibaatandi paaŋŋu kí já kujaauaaa? Ŋma pu ní a baasii máká ní ki yíkì kaa kíí aba pu man cee na?

⁶Eejipiti tiŋki kin sá kii kukaluu kun gíìyee pu ní a mákáaa[78]? Saa nyí yii unil un yaa dū u-ŋal ki nyīī ku-puee, ku gífí udaan níii! Too, míǹ ní Eejipiti bɔtiu Faaroo sá ki tīī bin kɔkɔ dū bi-mákal ki páaǹ u-puee.>

⁷An yaa yíì a làá lì yii: <Ti-Dindaan ti-Nimbɔtiu pu ní timbi máká.> An kaa sá sii di kúntì ipaan in bí ŋgbantamu pu bi jáaḿ Unimbɔtee nì u-saraafaŋyaaa? M nyí sii di bí Juuda nì Jeerusaleem yab yii: <An sá nsaraafan ŋun bí Jeerusaleem tinkin doo nee baba nimbiin ní ní nīn gbàantí ki jáaḿ ti-Dindaanaa!>

⁸A yaa là sii nì m-kpiliu Asuur bɔtiu ń kpáká kí kpèè. A yaa ŋúń ki ká bitanjakaliibi, man làá tīī-si itaamu kutukub bili.

⁹Aa kpáàa ŋūǹ kí já kí pɔ̄ɔkiǹ m-kpiliu tɔntɔnliibi kiwaai gba. Kin ba pu ní a nín máká Eejipiti pu ú tīī-si janjatɔrɔkub nì itaamu na!

¹⁰A dàkafī yii ti-Dindaan kaa là ní m dɔ́miń kí já nì kitiŋ nee kí nàan̄-kàaa? Ti-Dindaan u-ba di bí-mi yii: <Cùú já nì kitiŋ nee kí nàan̄-kì!>»

¹¹Niinee ní Eeliyaakiim nì Seebina nì Yoowa bí Asuur janjakpiliuee yii: «Ti gbāam̀-si ní, sòoǹ nì timbi a-tɔntɔnliibi Aram yab sooŋyi poon[79], di sá yii ti gbìl̀-i. Taa ti sòoǹ nì ti eebru sooŋyi poon, kun puee binib tɔ́kɔ́ digundi pu ki pílifí.»

¹²Ama ní ujanjakpilee kíí yii: «A dàkafī yii a-kpiliu nì sii baba ní m-kpiliu túnní-mi yii ḿ cáań tibɔti nee kí sòoǹaaa? Tibɔti gbanti sá ki tīī binib bin kɔkɔ bí agun pu nee mun ní. An kaa làá ti yúntí, ni nì bi làá ŋmɔ́ ni-binti kí nyɔ̀ ni-nyeem[80].»

¹³Míǹ boonee ní Asuur yab janjakpiliuee yíkìi síl̀ ní ki téeń mpɔn Juuda yab sooŋyin yii: «Ní pīlifìmaan tibɔti tin ubɔtikpaan, Asuur bɔtiu cáá kí sòoǹee!

¹⁴Ubɔti nín lī puee sèé. Ní taa yàntī Eeseekiyaasi ń mɔ̄ntì-ni, di sá yii waa làá ŋmā kí fīī-ni!

¹⁵Ní taa yàntī Eeseekiyaasi ń kīil̀-ni ní dū ni-mákal kí páań ti-Dindaan pu. U bí ki lì yii: <Báà án ŋá pu, ti-Dindaan làá fīī-ti, kitiŋ nee kpá ki kɔ́ Asuur bɔtiu ŋaan!>

¹⁶Ní taa pīlifì Eeseekiyaasi, ama ní pīlifì tin Asuur bɔtiu bí ki sòoǹ-ni nee. Píímaan-mi kubɔɔtiiu, ní sāǹ kí kɔ́maan-mi! Ni yaa ŋá míǹ, báà ŋma làá ŋmɔ́ u-fiinyi nì u-fiigi subiliŋ, ní kí nyɔ̀ u-lɔkɔu nyim,

¹⁷kí nīn cí ŋyunti ŋun m làá dāan̄ kí yòon̄-ni kí cùnnì kitiŋ kin bí kii ni-yaka nee poonee. Kitiŋ gbanti poonee, bilee nì ndamam bí, ní tikpaajin nì fiinyi sufii sati bí.

¹⁸Míǹ puee ní taa yàntī Eeseekiyaasi ń mɔ̄ntì-ni. U bí ki lì yii: <Ti-Dindaan làá fīī-ti!> Atimbun ŋin kíǹee waaŋi ŋúń ki fīī ŋi-timmu ki nyántì Asuur bɔtiu ŋaanaaa?

¹⁹Amaati nì Aripaadi yab waaŋi bí la? Seefarfayiim yab waaŋi bí la? Ŋi ŋúń ki fīī Samaarii tiŋki ki nyántì m-ŋaanaaa?

²⁰Ntimu gbanti kɔkɔ waaŋi poonee, dilal di ŋúń ki fīī di-tiŋki ki nyántì m-ŋaan? Kin án làá dī mana ní ti-Dindaan ń fīī Jeerusaleem tiŋki kí nyāntí m-ŋaan?»

²¹Binib bin kɔkɔ nìn pée bí niinee, báà ubɔ kaa nìn wāaǹ kinyɔkɔ ní kaa nín gātì-u, di sá yii ubɔti nìn kpáafì-bi yii: «Ní taa pée kíí-u tiba!»

²²Míǹ boonee ní Yiilkiyaawuu jipɔɔn Eeliyaakiim un kpèé ubɔti cindee, nì ubɔti gbaŋŋmaliu Seebina nì Asaafi jipɔɔn Yoowa un kpáafí ubɔti gbɔntee nín gítí ubɔti Eeseekiyaasi cee. Bi nìn dáaĺ ki cátì tiwan tin bi pēēyee, ní ki dū tibɔti tin ujanjakpilee sòon̄ee ki máafì-u.