Read Ntcham Esaïe 37 Bible Online

Esaïe 37 - Ntcham bible

Esaïe 37

¹Ubɔti Eeseekiyaasi nín gbìl̄ tin bi máafì-uee ní u cúú tiwan tin u pēēyee ki dáaĺ ki cátì, ki dū kutuku ki pēeǹ ní ki nín cá ti-Dindaan diikun.

²U nìn dū Eeliyaakiim un kpèé ubɔti cindee, nì ubɔti gbaŋŋmaliu Seebina nì bisaaraaŋaliibi bin yúntèe ki tú Unimbɔti bɔnaatiliu Yeesaya, Amɔtisi jipɔɔn cee. Binib gbanti kɔkɔ nìn pēē kutukub ní ki cūtì.

³Bi bàn̄ Yeesaya ceeyee ní ki bí-u yii: «Eeseekiyaasi nín sòon̄ puee sèé: <Díǹ wiiŋŋu nee sá-ti dinimbinaamandi nì ditafadaaldi nì icoo wiiŋŋu ní. A lì kii kibiki di bīń ki-na poon ki ŋmāntì bí bàà màal̀-kì, ama ní unaati kaa cáá ŋfam kí núuĺ kibiki ń nyānnée.

⁴An yaa yíì ti-Dindaan a-Nimbɔtiu tin máaǹ ki gbìl̄ tibɔti tin Asuur bɔtiu janjakpiliu sòon̄ee. U-kpiliu túnní-u u dɔ́miń ki sīī Unimbɔti un bí dimaŋfalinee. An yaa yíì ti-Dindaan a-Nimbɔtiu tin gbìl̄ tibɔti tin u sòon̄ee, ki làá dáaĺ u-tafal. An puee mèè kí tīī u-nibul din kíǹee.>»

⁵Niinee ní ubɔti Eeseekiyaasi tɔntɔnliibi bin u túee nín cá Yeesaya cee.

⁶Bi bàn̄ee ní Yeesaya tùkū-bi yii: «Ní gítí kí tùkù ni-kpiliu yii ti-Dindaan nín lī puee sèé: <Taa fàŋkì anyɔɔbun ŋin a gbìl̄ Asuur bɔtiu janjakpiliu sòon̄ee, u nín sòon̄ ki bíil̀-mi puee.

⁷Bi làá cáań tibɔti tiba kí tùkù ubɔti ní ḿ yàntī ú nīn gítí u-tiŋkin. U-tiŋkin niin ní m làá yàntī bí dū kitàataajiki kí kpɔ̀-u.>»

⁸Ujanjakpilee nín gbìl̄ yii u-kpiliu Asuur bɔtiu yíkì Lakiisi tiŋki ki cūtìi bíi jáà nì Liibina tiŋkee[81], ní u mun nín cá niin ki cūtìi ká-u.

⁹Asuur bɔtiu nìn gbìl̄ yii Eejipiti bɔtiu Tiiraka un sá Kuusi tiŋkinee dòoń kí já nì u. Niinee ní u tí tú binib Eeseekiyaasi cee ki bí yii:

¹⁰«Ní cùú tùkù Juuda bɔtiu Eeseekiyaasi yii: <A-Nimbɔtiu un pu ní a dū a-mákal ki páaǹee ń taa kīil̀-si kí lì yii Jeerusaleem tiŋki kaa làá kɔ́ Asuur bɔtiu ŋaan.

¹¹Sisi a-ba gbìl̄ Asuur bɔtiibi nín ŋáaǹ ntimu mun kíǹee kɔkɔ pu ki nāaǹ-muee, ní sii dàkafī yii a làá ŋmátáa!

¹²Goosan nì Karan nì Reeseefi timbuŋŋi nì Eedeen yab bin nìn kóò Teelasaar tiŋkin ní m-naanjab nìn nāaǹ bi-kɔkɔee, bi-waaŋi nìn ŋúń ki fīī-baaa?

¹³Amaati bɔtiu nì Aripaadi bɔtiu nì Layiir nì Seefarfayiim nì Eena nì Iwa bɔtiibi bí la díǹ pu na?»

¹⁴Eeseekiyaasi nìn fōō kugbɔŋu kun Asuur bɔtiu túnní bí cáań kí tīī-uee ki kàan̄. U kàan̄ ki dóòyee ní ki nín jɔ́ḿ ti-Dindaan diikun, ní ki kpátì kugbɔŋuee ki bíl̀ ti-Dindaan nimbiin.

¹⁵U ŋá míǹ ki dóòyee ní ki mēē ŋwimmeem nee yii:

¹⁶«Ti-Dindaan Mpɔŋkɔdaan, Isirayeel Nimbɔtiu un beejal tɔ́kɔ́ Keerubimbi[82] puee. Sii baba di sá kitiŋ nee kɔkɔ pu beeŋi Nimbɔtiu. Sii di náań kutagbɔŋu nì kitiŋ.

¹⁷Ti-Dindaan, kpòon̄ a-tafal kí pīlifì! Ti-Dindaan, ŋúbití a-nimbiliŋ kí kpèè! Pīlifì asiibil ŋin kɔkɔ ní Seenakeeriibi tuuŋyi sīī sii Unimbɔti un bí dimaŋfalinee!

¹⁸Ti-Dindaan, an lafun sá tiŋman ní yii Asuur bɔtiibi kūū ki céetì atimbun ŋin kíǹee nib ki nāaǹ bi-timmu.

¹⁹Bi nìn dū atimbun gbanti waaŋi ki tɔ́ ŋŋmin ki kúntì-ŋi, di sá yii bi-waaŋi gbanti kaa nìn sá Unimbɔti, idɔ nì ataŋkpee ní binib nìn dūu mɔ́ɔ́-ŋi.

²⁰Ama sii ti-Dindaan ti-Nimbɔtiu, fīī-ti kí nyāntí Seenakeeriibi ŋaan ní kitiŋ pu beeŋi kɔkɔ ń béé yii sii, ti-Dindaan baba di sá Unimbɔti.»

²¹Niinee ní Amɔtisi jipɔɔn Yeesaya tú bi cūtìi tùkū Eeseekiyaasi yii: «A nín mēē Seenakeeriibi pu puee, ti-Dindaan nín kíiń a-wimmeem puee sɔ̀.

²²Tibɔti tin ní ti-Dindaan sòon̄ Seenakeeriibi puee sèé: <Siiyɔn tiŋki bíi kpèé-si fám, kì bíi bèel̄-si. Jeerusaleem tiŋki kinyannyaaŋŋi bí ki lāā-si ki gbákafí diyil.

²³Ŋma ní a sīī ní? Ŋma ní a sòon̄ ki bíil̀ ní? Ŋma pu ní a téeń ní? Ŋma ní a yáatì ki kpēē nì dilambil ní? An sá man Isirayeel Circir Nimbɔtiu.

²⁴A dī a-tuuŋyi pu ki sīī man ni-Dindaan. «A lī yii: <Man Seenakeeriibi, m cáá janjatɔrɔkub náaǹ, an pu ní m ŋúń ki jɔ́m̀ ki tin bàn̄ ajoon yilpu, m jɔ́m̀ ki tin bàn̄ Leebanɔn jool yilpu. M gāatì ki-seedir sufii in pée fɔ̀kɔ̀ee, ki gāatì ki-siipreesi sufii in pée ŋān̄ee. M jɔ́m̀ ki bàn̄ ki-jooŋŋi ŋin fɔ̀kɔ̀ee yilpu, ki kɔ́ ki-bambaŋku kun múkúee poon.

²⁵M gbìn̄ lɔkɔb ntincamun ki nyùn̄ bi-nyim niin. M dū m-taaŋi ki tāā Eejipiti tiŋki, ní ki-buŋyi kɔkɔ fóotì.>»

²⁶Mimmee Seenakeeriibi, saa nyí yii an sá man di bɔ́ntì tin bíi jītí nee kɔkɔ ki yóoǹ doooodooooyeeee? Saa nyí yii an yúntì tikpil m nín bɔ́ntì-tèeee? Kɔŋkɔnnee ní m yāntì tin m bɔ́ntèe bíi jītí. Man di lēē-si á nà ntimu mun bi máń agun ki māntìi túee kɔkɔ dúsi dusi.

²⁷Binib bin kóò ntimu gbantinee ŋalii jòon̄ fám ní, dinyoondi kɔ́-bi ní icoo cúú-bi. Bi bí kii timool tin bí tisatinee, kii kumɔsɔŋu kun dáá pɔ̀fèe, kii timool tin nyēē kudii yilpuee, àá tin nyēē tisatin kaa láá bīńee.

²⁸A yaa kāaa, a yaa yúɔɔɔ, a yaa nyēēyaaa, a yaa kóòyaaa, a yaa tí gíí m-pu diŋuulaaa, m nyí.

²⁹Tiŋman, a lafun gíí m-pu diŋuul, ní tibɔfan tin a sòon̄-mee kɔ́ m-tafalin. An pu ní m làá dū dibɔmbil kí túuń a-maŋfal, kí dū tikúti kí kpàl̄ a-nyɔkɔ kí ŋmā kí kpòotī-si. Nsan ŋun a dī ki dɔ́miń dooyee, nsan gbanti ní a làá fàtīí dī kí kpì.

³⁰Eeseekiyaasi, kudaaŋŋu kun m tīī-see sèé. Dun bindi nee, ni làá jī dibindi din jítèe jinti tin sá aleenee, ní jiilee ní dāá tí jī míǹ. Ama dibintataatiil poonee, ni làá dāá kpɔ̀ kí bɔ̄l̀ kí cā ni-kpaajinti, ní kí dāá kpɔ̀ afiinyikpaan kí dāá kìtī abil kí ŋmɔ́.

³¹Juuda beel nib bin làá dāá ŋmátée làá dāá nīn bí kii disupɔmbilee ní. Bi làá dāá tɔ̄ inyaampɔɔn kitiŋ poon ní kí dāá lòoǹ abil yilpu.

³²Di sá yii binib biba làá dāá kíń Jeerusaleem tiŋkin, bin ŋmátì kaa kpíìyee làá dāá yīkì kí yūĺ Siiyɔn jool pu. Ti-Dindaan Mpɔŋkɔdaan neeŋkpaandi puee, u làá dāá ŋá míǹ.

³³Ti-Dindaan nín lī Asuur bɔtiu pu puee sèé: «Waa làá kɔ́ kitiŋ nee poon. Waa làá tɔ̄ mpimbambaanti doo. Waa làá dū digbampɔɔl kí lìkin̄ u-ba kí jáǹ-kì, kaa làá tí bíĺ ataŋkpuku ki-guŋŋi pu kí jáǹ-kì.

³⁴Nsan ŋun u dī ki dɔ́mińee, nsan gbanti ní u làá fàtīí dī kí gítí. U-taal kpá kí tāā kitiŋ nee poon. Man ni-Dindaan di lī míǹ.

³⁵M làá wúń Jeerusaleem tiŋki pu kí fīī-kì. Mama m-ba nì m-tɔntɔnliu Daafiidi pu ní m làá ŋá míǹ.»

³⁶Kunyeeu gbantee ní ti-Dindaan tuuŋŋu dɔ́miń Asuur yab janjanaapaal pu ki kūū binib kutukub dilaataal nì imuŋku inaa nì kutukub biŋmoo. Kutaa wúntì bin kaa kpíìyee fīntèe, ki ká anikpil dɔ̄ an kɔkɔ fìlfilfil.

³⁷Niinee ní Asuur bɔtiu Seenakeeriibi yíkì dinaapaalee pu ki nín gítí Niiniifi tiŋkin ki cūtìi gbíntì niin.

³⁸Dalba u gbāā u-waal Niisrooki diikun ki jáaḿ-dèe, ní u-jipɔmbi Adirameeleeki nì Sareeseer dū kitàataajiki ki gāā ki kūū-u ní ki sáǹ ki nín cá Ararati tiŋkin. U-jipɔɔn Asaradɔn di fōō u-yil ki kpántì ubɔti.