Read Ntcham Esaïe 39 Bible Online

Esaïe 39 - Ntcham bible

Esaïe 39

¹Ŋyunti gbantee, Babiloon bɔtiu Baladan jipɔɔn Meeroodaki-Baladan nìn gbìl̄ yii Eeseekiyaasi nìn búŋkì ní ki fātìi pɔ́ɔkì. Di sá ní u ŋmàn̄ kugbɔŋu ki nyàab̄ tiwampɔkaal ki tú bí cáá cùnnì kí tīī-u[83].

²Bin bi túee nín bàn̄ee, ní an mɔ́ɔkiǹ Eeseekiyaasi ní u yōoǹ-bi ki kɔ́ǹ kudii kun poon ní u nìn kpáafí u-gaajawanti nì animbil nì sindaariya nì talaalub nì ikpafi in sɔ́fèe ki dàkā-bi. U nìn dàkā-bi laakin u nìn kpáafí u-janjawanti mun nì tijanjawan kɔkɔ. Tiba kaa nìn kíǹ Eeseekiyaasi cindin nì u-beelin waa dūu dàkā-bi.

³Míǹ boonee ní Unimbɔti bɔnaatiliu Yeesaya dɔ́miń ki ká ubɔti Eeseekiyaasi ní ki bālifì-u yii: «Binibee tùkū-si yii ba ní? Ní la ní bi nyánní?» Ní Eeseekiyaasi kíí yii: «Bi nyánní ndan ní. Doooo Babiloon tiŋkin ní bi nyánní.»

⁴Ní Yeesaya gíti nìkī ki bālifì-u yii: «Ba ní bi ká a-beecindin?» Ní Eeseekiyaasi kíí yii: «Bi pée ká tin kɔkɔ pée bí m-beecindinee ní. Tiba kaa kíǹ m-nimbikpaafidiikun maa dūu dàkā-bi.»

⁵Niinee ní Yeesaya bí Eeseekiyaasi yii: «Pīlifì tibɔti tin ti-Dindaan Mpɔŋkɔdaan sòon̄ee:

⁶<Ŋwiin ŋubɔ bí ki dòoń, tin kɔkɔ bí a-dumpu nee nì tin kɔkɔ a-baabi kpáafì ki síiǹee, bi làá dāá kóoǹ kɔkɔ kí cùnnì Babiloon tiŋkin. Tiba kaa làá dāá kíń doo, ti-Dindaan di sòon̄ míǹ.

⁷Bi làá dāá cúú a-jipɔmbi tikpil bin sisi a-ba màl̄ee, kí cùnnì Babiloon bɔtiu cee kí dū-bi kí ŋá bifaabi bí nīn tūǹ atuun ki tìì-u[84].>»

⁸Ní Eeseekiyaasi kíí Yeesaya yii: «Tibɔmɔntiil ní ti-Dindaan tùkū-si a cáań ki nāatì-mi nee.» Di sá yii u nìn lī u-neen yii: «Ti làá nīn bí ŋgbansɔŋfi nì dibatɔlin m-maŋfal wiiŋyi kɔkɔ poon.»