Read Ntcham Esaïe 40 Bible Online

Esaïe 40 - Ntcham bible

Esaïe 40

¹Sɔ̀ŋkìmaan m-nibul pɔbil, sɔ̀ŋkìmaan bi-pɔbil, ni-Nimbɔtiu di lī míǹ.

²Sòom̀maan kí sɔ̀ŋkì Jeerusaleem pɔbil, ní bāakì kí tùkù-kì yii ki-tumpɔɔŋi dóò, kì pàn̄ ki-kpitii kɔkɔ pu, ti-Dindaan yāntì kì pàn̄[85] ki-yìntitam kɔkɔ pɔndi mili pu.

³Nneel ŋubɔ bíi báakí ki lì yii: «Ní bɔ́ntímaan nsan kuteeun kí tīī ti-Dindaan, ní tàntīmaan nsanjaa kitiŋkuliŋŋin kí tīī ti-Nimbɔtiu[86].

⁴Ní gbīŋkìmaan atantaka kɔkɔ, kí bìtī ajoon nì ŋgbantamu kɔkɔ! Ní tàntīmaan ipaan in bí kpábiti kpabitee, kí yàntī ŋgbantamu ń kpántí atantaka.

⁵Niinee ti-Dindaan nyooti làá nyā mpaampiin pu, ní inifunaan kɔkɔ ń dāá wāl̀-tì. Ti-Dindaan di sòon̄ míǹ[87].»

⁶Nneel ŋubɔ bí yii: «Bāakìm̄!» Ní m bālifì yii: «Ḿ bāakì yii ba?» Ní ŋu kíí-mi yii: «Bāakì yii binib kɔkɔ sá kii kumoouee ní, ní bi-nyaaŋku sá kii tisatin pumpukumee.

⁷Ti-Dindaan yaa púfì kumoou nì nsupumpukumee puee, kumoou kōō ní nsupumpukum ń yɔ́ĺ. - Tiŋman, binib kaa pée pɔ̄ɔ̄ kii kumoouee ní.

⁸Kumoou kōō ní nsupumpukum ń yɔ́ĺ, ama ti-Nimbɔtiu úǹ bɔti pée bí ní kí cá jaanjaan[88]!»

⁹Sii Siiyɔn un ŋúbiń tibɔmɔntiil kí nàatēe, jɔ̄m̀ dijool din fɔ̀kɔ̀ee yilpu kí téeń mpɔn. Sii Jeerusaleem un ŋúbiń tibɔmɔntiil kí nàatēe, téeń mpɔn mpɔn, á taa fàŋkì báà tiba. Tùkù Juuda timmu yii: «Kpèèmaan ni-Nimbɔtiu!

¹⁰Kpèèmaan ti-Dindaan Unimbɔti! U dòoń nì mpɔn. U cáá mpɔn kí jī dibeel. Kpèèmaan, u cāabìń u-paati, u ŋúbiń u-gìńdi paatii[89].

¹¹U sá kii upikpaal un kpàá u-picaŋkpuŋkuee ní, u cáá u-ŋal ki kōontí u-pibiliŋ ki kpáfí. U yòontí u-pibiyaamu ki bìb̀, ní ki kpòotī ipinaati in cáá mbiyaamu ŋáaḿee ki cáǹ nsɔŋfin[90].»

¹²Ŋma di ŋmāntì tiŋku nyim u-ŋantilin? Ŋma di yātì u-ŋambiyaamu ki dūu ŋmāntì kutagbɔŋu? Ŋma di dū gbakiti ki ŋmāntì kitiŋ kɔkɔ tam? Ŋma di ŋmāntì ajoon saniyaluntikaa pu, àá ŋgbantamu saniyapaaŋkaa pu?

¹³Ŋma di ŋmāntì ti-Dindaan Fam ki ká? Ulanil di sáŋkì-u dalba u ŋá tiba ki ká?

¹⁴Ŋma ní Unimbɔti pée bālifì isaŋki kí ŋmā kí sòoǹ tibɔti tiŋan, àá udaan dàkā-u dinyil àá iciin?

¹⁵Kpèè, atimbun sá kii nnyim nín nyēeń gbakiti nyɔɔgbandi kí jōō kitiŋ puee ní, a lì kii dibul kibilii di pá saniya puee. Kpèè, ntimu mun nnyim māntìi túee nyiŋfiŋu bí kii ŋkpɔŋkpɔmee ní.

¹⁶Leebanɔn tiŋki dɔi kɔkɔ kaa bà bí kpāā ŋŋmi nsaraafan pu, ní ki-waŋkuti kɔkɔ kaa bà bí ŋá ti-Dindaan saraawɔkaa.

¹⁷Atimbun kɔkɔ kaa pée bí tiban u-nimbiin, ŋi-kɔkɔ sá fám ní u-cee, ŋi bí kii kubuŋuee ní.

¹⁸Ŋma ní ni cáá Unimbɔti ki ŋmàntīǹ ní? Kunaŋu kulɔkɔ ní ni làá dū-u kí nántíǹ?

¹⁹Diwaalaaa? Ukúduntil di dūntì tikúti ki dūu mɔ́ɔ́-dì, ní goosimiiti dū sindaariya ki nyūntì-dì ní ki mɔ́ɔ́ animbil kúti léeŋkaati ki léeǹ-dì[91].

²⁰Un di yaa kaa cáá ŋŋmam kí ŋá an saraauee, nyàab̀ ndɔ ŋun kaa bùkùee ní kí tīī ukpiŋkpiiti un ŋūǹ u-tundi tiŋanee, ni úǹ ń dūú kpítí diwaal kí síiń-u.

²¹Mimmee naa nyáaa? Baa sòon̄ ni gbìl̄aaa? Baa nìn báakì ki tùkū-ni doooo ŋkilkaaminaaa? Mimmee naa nyàab̄ ki béè kitiŋ náanliuaaa?

²²Ti-Dindaan kóò kutagbɔŋu kun dàn̄ kitiŋ yilpuee, ní binib bin kóò kitiŋ puee bí u-cee kii icatee. U kpátì kutagbɔŋu kii ŋŋaalikiŋkaayee, ní ki dū-ku ki cóoǹ kii tantee ki kóò.

²³U nāaǹ duulinya yidambi, ní ki yāntì kitiŋ pu bɔsoonliibi kaa ti pée bí tiban.

²⁴Bi tin lì yii bi lèekī-bi, kí kàan̄-bi, bí kàl̄ kí báań inyaanee ní ti-Dindaan fooku ń ŋàtī-bi kí fá ní bí kpā, ní kunaakpaabuŋŋu ń yòon̄-bi kii tifeelee.

²⁵Unimbɔti Circirdaan di bālifì yii: «Ŋma ní ni ŋūǹ kí dū-mi kí ŋmàntīǹ ní? Ŋma di ŋūǹ kí nīn sá man juti ní?»

²⁶Wáam̀maan kí kpèè kutaa. Ŋma di náań iŋmalbijaa ní? Ŋma di yàntī i-kɔkɔ nyēē ki kpáfí kii dijanjakitilee ní? Úǹ di yíì uŋmalbija kamaa nì u-yindi. U cáá dibaatandi nì mpɔŋkpaan, an puee u yaa yíiń-iee, i-kansikin báà ubɔ kaa fɔ́tí.

²⁷Isirayeel, Jaakɔb nibul, ba pu ní a sòoǹ yii: «M-Dindaan kaa wāĺ tin bāań-mee, m-Nimbɔtiu kaa pée wāĺ man baamɔŋyi.»

²⁸Mimmee saa nyáaa? Baa sòon̄ a gbìl̄aaa? Ti-Dindaan di sá Unimbɔti kí nīn cá jaanjaan. Úǹ di náań kitiŋ kí yòon̄ ki-gbeennyɔkɔ kiba kí cáá tin sāā kin kíǹee. Waa wɔ̀b̀ dalba dalba, kaa tí gì mun. U-nyil kaa cáá kigbeennyɔkɔ.

²⁹U tìì un kaa ti cáá mpɔnee mpɔn, ki tìì un gīīyee kunyannyaau.

³⁰Binipɔmbi gba gì kí wɔ̀b̄, bibaatandambi mun gbéetí ki lítí.

³¹Ama bin máká ti-Dindaan puee fàtīi pɔ̀ntī bi-pɔŋŋu ní. Bi yíkí ki ŋàaǹ kii ikaabuee ní. Bi sáń ama ní kaa gì, bi còom̄ ama ní bi-wunti kaa yɔ̀tī.