Read Ntcham Esaïe 41 Bible Online

Esaïe 41 - Ntcham bible

Esaïe 41

¹Ntimu mun nnyim māntìi túee, ŋmīĺmaan kí pīlifiǹ-mi. Anibul kɔkɔ nib, fàtīí kámaan kunyannyaau. Ní sútiḿmaan kí dāá sòoǹ. Ti-kɔkɔ ń cùú kpāfì ibɔsoon laŋki.

²Ŋwìiń nyalaŋki púee, ubɔ dòoń. Laakin kamaa u yaa jítèe, u jáà ki jīǹ ŋma ní. Ŋma di yāntì u kíĺ nsan ní? Ŋma di dū anibul ki ŋá u-ŋaan ní? Ŋma di dū bibɔtiibi ki ŋá u-taaŋi taapu ní? U-tàataajiki càkà-bi músi musi ní u-tɔbu jì-bi kii kubuŋu nín yòontí tifeel puee.

³U jì-bi ki jītí bi-kansikin báà tiba kaa ŋáań-u, ní u-taaŋi kaa kpáàa gbèetī kitiŋ gba.

⁴Ŋma di ŋá tíǹ gbanti kɔkɔ? Úǹ di bɔ́ntì tibɔti nín dòoń ki jītí puee ki síiǹ doooo ŋkilkaamin. Man di sá ni-Dindaan. M sá upeepeekaa, ki làá nīn pée sá míǹ áli duulinya kúntitam.

⁵Ntimu mun nnyim māntìi túee yab ká-u ní ki fāŋkì. Kitiŋ gbeennyɔkɔ yab ká-u ní bi-wunti bíi jìkì. Bi sútí ki pìlìń, bi kāń nsan pu ki dòoń.

⁶Bi bíi tútúǹ tɔb, ní báà ŋma lì u-nabiki yii: «Ká dipɔbil!»

⁷Ukpiŋkpiiti tìì goosimiiti kunyannyaau. Ucaa un cáá dinantaŋkul ki gbáà ki jɔ̀lifī tikútee tìì un gbáà ki tàntī-tèe kunyannyaau. U tùkù ukúduntil yii: «An ŋān̄.» Ní bí dū ipiin kí kpáá kí cúú diwaalee án taa nín̄ cìŋkī.

⁸Ama sii Isirayeel, a sá m-tɔntɔnliu ní, Jaakɔb, a sá dinibul din ní m lēēyee ní, a sá m-bɔɔ Abraam naantiiu ní[92].

⁹M cūtì ki nyàabìń-si doooo kitiŋ gbeennyɔkɔ ní. M yíiń-si doooo ntindandatimun ní, ní ki lī yii: <M-tɔntɔnliu di sá-si, m lēē-si ní, maa dū-si ki fá.>

¹⁰Taa fàŋkì, kun puee m bí a-cee. Taa nín̄ kā ki yáliŋkí, kun puee m sá a-Nimbɔtiu. M dòoń kí tīī-si mpɔn, kí tūtuǹ-si, kí dū m-ŋaŋgiil ŋun pɔ̄ɔ̄ ki tìì dijajilee kí wúń a-pu.

¹¹Tiŋman, bin nyàab̀-si tikpitilee, icoo làá cúú-bi gbòooo bí fá bi-jilimau. Bin jáà nì see, án làá nàan̄-bi bí kpú kí céetí.

¹²Bin tákà-si tibɔtee, a làá dāá nyàab̀-bi kaa làá ti ká-bi. Bin jáà nì see, án làá nàan̄-bi ní bí wāŋkì.

¹³Di sá yii man a-Dindaanee, m sá a-Nimbɔtiu ní. Man di ŋúb́ a-ŋal ní ki bí-si yii: «Taa fàŋkì, m làá jòoń-si.»

¹⁴Jaakɔb nibul, sii un kpántì kii ujiliŋkpaamee, sii un kpántì kii utaŋkpiilee, taa fàŋkì. M dòoń kí jòoń-si. Man a-Dindaan di sòon̄ míǹ. Un di làá dā-si kí lííyee di sá Isirayeel Circir Nimbɔtiu.

¹⁵Kpèè, m dū-si ki kpántì kii tɔrɔku un bi fù tijimpin pu an gbátée upɔmpɔɔn ní. A làá nà kí mátí ajoon ní dúsi dusi, kí yàntī ŋgbantamu ń kpántí kii tifeelee.

¹⁶A làá dāá càatī-bi kubuŋu ń yòon̄-bi, ní kunaakpaabuŋŋu ń yàaǹ-bi an kɔkɔ pu. Ama siiyee, a làá dāá nīn tátí ki fàal̀ ti-Dindaan pu, kí dāá nīn làntī Isirayeel Circir Nimbɔtiu pu.

¹⁷Bifalaadambi nì binandambi bí ki nyàab̀ nnyim kaa bíi kāntí, nnyinnyoo cúú-bi ní bi-neeŋyi kūń. Man ni-Dindaan làá fōō bi-wimmeem, man Isirayeel Nimbɔtiu kaa làá dū-bi kí fá.

¹⁸M làá yàntī ibun ń pùub̀ ajoon ŋin yilpu kaa cáá isufee pu, kí yàntī inyimbul ń cɔ́tí atantaka poon. M làá yàntī kuteeu ń kpántí anyimbɔbil ní kí yàntī kitiŋkuliŋŋi ń kpántí inyimbul.

¹⁹Kuteeunee, m làá dāá cóoń seedir nì akasiya nì miirti nì ɔliifi sufii, ní kí dāá cóoń kitiŋkuliŋŋi pu siipreesi nì piini nì buwii sufii dicilpu.

²⁰Mimmee báà ŋma làá dāá ká, báà ŋma làá dāá béé, báà ŋma làá dāá dáań kí ká kí gbìl̄ taapu yii ti-Dindaan di túń atuun nee, Isirayeel Circir Nimbɔtiu di náań-tì.

²¹Ti-Dindaan bí yii: «Ní cáaḿmaan ni-bɔti kí bíĺ bí sòoǹ kí tīī-ni», Jaakɔb nibul bɔtiu bí yii: «Ní dāá lìmaan tin ní ni cááyee kí mɔ̄tì ni-ba pu.

²²Sútiḿmaan kí dāá tùkù-ti tin bí ki dòońee. Tibɔti tilati di dɔ́miń ki jítì ní? Ní dàkà-ti-tì ní timbi ń dàkafì ti-pu, àá ní tùkù-ti tin di bí ki dòoń foolboonee, ní tí béé tin bí ki dòońee.

²³Ní tùkùmaan-ti tin làá fu dāan̄ foolboonee ní tí béé yii ni lafun sá inimbɔti. Ní ŋámaan tiŋan àá tikpitil tiba tí ká án ŋá-ti bitii ní kufaaŋŋu ń kɔ́-ti.

²⁴Ama nimbi ni-ba kaa bí tiban, tin ni ŋáańee mun kaa pée sá tiba. An sá ntimbiil ní unil ń lēē kí nīn nóó-ni.

²⁵M lūkutìń unil ubɔ u yíkìń ŋgan pú ki dòoń. Doooo ŋwìiń nyalaŋki pú ní m yíiń-u. U bí ki tàń biyidambi pu kii bi nín tà tikpati puee, a lì kii uyɔɔmaati nín tà kuyɔkɔu puee.

²⁶Ŋma nìn sòon̄ tin bí nee doooo ŋkilkaamin tí bàà nín̄ nyí-tì ki yóoǹ? Ŋma nìn sòon̄-tì doooo cannaaku tí bàà lì yii: <A sá míǹ ní?> Báà ubɔ kaa nìn sòon̄ ti-pu, báà ubɔ kaa nìn wāaǹ kinyɔkɔ, báà ubɔ kaa nìn gbìl̄ ni sòon̄ ti-pu.

²⁷Man di péé péé ki tùkū Siiyɔn yii: <Kpèè, bi sèé!> M tú ntuun ŋu cūnnì tibɔmɔntiil Jeerusaleem tiŋkin.

²⁸«M kpēē ki māntìi tú kaa ká báà uniseen. Anibul ŋin kíǹee nimbɔtii kansikinee, usaŋkil kpá! M bàà làá bàlifì-i ní í bàà tùkù-mi.

²⁹Ama binibee kaa bí tiban. Tin bi ŋáańee kɔkɔ sá fám ní. Bi-waaŋi kɔkɔ sá kubuŋu ní ki sá fám!»