Read Ntcham Esaïe 43 Bible Online

Esaïe 43 - Ntcham bible

Esaïe 43

¹Ama kɔŋkɔnnee, Jaakɔb ti-Dindaan un di náań-see, úǹ un di máń-see, Isirayeel nín sòon̄ puee sèé: «Taa fàŋkì, di sá yii m dá-si ki líì, ki yíiń-si nì a-yindi, man di yì-si.

²A yaa bíi dùtī nnyim, m làá nīn bí a-cee, a yaa tí bíi dùtī ibun, i kpá ki làá yòon̄-si. A yaa bíi còom̄ ŋŋmi poon, ŋuaa làá wà-si, ní aŋmilimbil kaa làá gbēē-si.

³Di sá yii man a-Dindaan di sá a-Nimbɔtiu, man Isirayeel Circir Nimbɔtiu di sá a-Fiiliu. «M dū Eejipiti tiŋki ní ki tīī ki fātìi dá-si ki líì, ní ki dū Kuusi nì Seeba timmu ki kpántì-si ki fōō-si ki líì.

⁴Di sá yii a pɔ̄ɔ̄ kudaau m-nimbiin, ní maa mɔ̄ a-pu ki néeń-si. An puee m dū binib ki téeǹ a-yil, ní ki dū anibul ki pàn̄ a-maŋfal pɔndi.

⁵«Taa fàŋkì, kun puee m bí a-cee. M làá yòon̄ní a-naantiibi doooo ŋwìiń nyalaŋki pú kí gíiǹní, kí yòon̄ní-bi doooo ŋwìiń jeetilaŋki pú kí kpāfì.

⁶M làá lì ŋgan pú yab yii: <Gíim̀maan-bi kí tīī-mi>, ní kí lì ŋgiil pú yab yii: <Taa cúúmaan-bi kí kàan̄!> Gíiǹnímaan m-jipɔmbi bin bíń ntindandatimunee, kí gíiǹní m-bisalib bin bíń kitiŋ kúntilaŋkee.

⁷Gíiǹnímaan binib bin fōō m-yindee, binib bin m náań, ki máń, ki nyántì bí nīn tìì-mi tinyoolee.»

⁸Ní nyāntí dinibul nee doo! Dì cáá animbil ama ní kaa wāĺ, ki cáá atafal, ama ní kaa gbìl̀.

⁹Atimbun kɔkɔ ń kóoǹ kí kpāfì dicilpu, anibul kɔkɔ ń kóoǹ kí kpāfì. Bi-kansikin ŋma di ŋūǹ kí tùkù-ti tin bíi jītí nee? Ŋma di ŋūǹ kí yàntī tí gbìl̄ tin jítèe? Bí cáań bi-seeradambi kí dàkà yii bi cáá mbaamɔn! Ní bi-seeradambi gbanti ń pīlifì bi nín sòon̄ puee kí lì yii: «An sá ibaamɔn!»

¹⁰«Nimbi m-nibul di sá man seeradambi. Ni sá m-tɔntɔnliibi bin ní m lēēyee ní. M là yii ní fōō-mi kí kíí, kí béé kí gbìl̄ yii man di sá Unimbɔti. Kí wàatī ḿ nīn bée, unimbɔti ubɔ nìn kpá, ní m-boonee ubɔ mun kaa làá ti nín̄ bí. Ti-Dindaan di lī míǹ.

¹¹M-baba nì m-baba di pée sá ni-Dindaan, man boonee, ufiil ubɔ nì ubɔ pée gíti kpá.

¹²Man di fìil̄, ki sòon̄ ki síiǹ ní ki yàntī binib béetí-tì. An sá man, kaa sá unimbɔticaan ubɔ un bi ŋūǹ kí ká ni-ceeyee. Ni sá m-seeradambi ní man sá Unimbɔti. Ti-Dindaan di lī míǹ.

¹³Míǹ ní m làá nīn sá kí nīn cá jaanjaan. Ubɔ kpá ki ŋūǹ kí fōō u-juti m-ŋaan. Tin ní m yaa ŋée, ubɔ kaa ŋūǹ kí kpántí-tì?

¹⁴Ti-Dindaan un di dá-ni ki líìyee, úǹ un sá Isirayeel Circir Nimbɔtiuee nín lī puee sɔ̀. Ni-puee, m làá tɔ̄ unil ubɔ Babiloon tiŋkin. M làá yàntī kitiŋ punyɔmmu ń cúú pìitī. Tiŋman, Babiloon yab ceeyee, mmɔn làá dāá kpántí iyaliŋki, bíǹ Kaaldee yab bin kā bi-meelabin ki bí ki tátí ki fàal̀ee.

¹⁵Man di sá ni-Dindaan, ni-Circir Nimbɔtiu, Isirayeel Náanliu nì ni-Bɔtiu.»

¹⁶Ti-Dindaan nín lī puee sèé. Úǹ di nìn tɔ́ didandi dimɔɔlin, ki cátì nsan nnyim min nyóòyee poon.

¹⁷Úǹ di nìn nyántì janjatɔrɔkub nì itaamu, ki kpáaǹ ajanjakiti nì bibaatandambi dicilpu. Bi-kɔkɔ lítì kaa ti yíkì, bi kpíì kɔkɔ múb, ki wùn̄ ki kúntì kii ŋfitilaŋmiiyee.

¹⁸«Ní taa ti téetí tibɔkpikil pu, ní taa ti dàkafì tin jítèe pu.

¹⁹Di sá yii m làá fàtīí ŋá tiwan mpɔm[95], tì kíĺ ki bíi nyēē gba, naa wāĺ-tàaa? M làá tɔ̄ nsan kuteeun, kí yàntī ibun ń cɔ́tí kitiŋkuliŋŋi pu.

²⁰Kumooun peelii làá dāá nyɔ̄ŋkì-mi, ki kpáaǹ sinsiŋkub nì taataabi. Di sá yii m làá dāá yàntī nnyim ń pùub̀ kuteeun, ní ibun ń cɔ́tí kitiŋkuliŋŋi pu. Tiŋman, m làá tīī dinibul din m lēēyee nnyim dí nyɔ̀.

²¹Dinibul din m máń ki tīī m-bee làá dāá gāā ilan kí nyɔ̄ŋkì-mi.»

²²Jaakɔb, an kaa sá man ní a tíminsì ki yíiń, Isirayeel, a gīī nì mi ní.

²³Saa cáań apibil ki ŋá bisaraawɔkaabi ki tīī-mi, kaa tí kūū tiwaŋkuti ki ŋá saraabi ki tīī-mi tinyool. Man kaa dū-si ki kpántì uyumbu á nīn ŋáań tijin saraabi ki tìì-mi, kaa tí páb́-si yii á nīn sèetī talaalutuukaabi ki tìì-mi.

²⁴An kaa sá man pu ní a dū a-nimbiliŋ ki dáal̀ talaalutuukaabi bin sɔ́fèe, kaa tí dū tiwaŋkuti saraabi kpam ki tīī-mi m ŋmɔ́ ki díkí. Ama a dū-mi ki kpántì uyumbu a-kpitii pu ní, a-yìntitam yāntì m gīī.

²⁵Ama an sá mama m-ba di dū a-kpitii ki pú-si, maa làá ti téetí a-yìntitam pu.

²⁶Téetí-mi tin a cáá kí kɔ̄kɔl̀-mee man nì si tí cù ibɔsoon. Pée kàaǹ a-bɔti kí lēē kí dàkà yii tì ŋān̄.

²⁷A-naanja upeepeekaa nìn yīntiǹ-mi[96], ní a-bɔnaatiliibi yíkì ki bíi jáà nì mi.

²⁸An pu ní m kpákatì bikpilib bin m nìn kāaǹee, ki dū Jaakɔb nibul ki tīī bí kpɔ̀ kí céetí, ki dū Isirayeel yab ki tīī bi-nannanliibi ń bèel̀-bi.