Read Ntcham Esaïe 44 Bible Online

Esaïe 44 - Ntcham bible

Esaïe 44

¹Kɔŋkɔnnee pīlifiǹ-mi, m-tɔntɔnliu, Jaakɔb nibul, Isirayeel, sii un ní m lēēyee.

²Man a-Dindaan un máń-see, man un náań-si ki tākaǹ a-na poon, ní ki tútúǹ-see nín lī puee sèé: «Taa fàŋkì, m-tɔntɔnliu Jaakɔb, sii Yeesurun[97] un ní m lēēyee.

³Di sá yii m làá yàaǹ kitiŋ kin kūńee pu nnyim, kí yàntī ibun ń pùub̀ kitiŋkuliŋŋi pu. M làá dāá yàntī m-Fam ń kpákatiń a-biyaamu pu, ní kí bìin̄ a-naantiibi pu.

⁴Bi làá nyā kii timool nín nyēē kusaaun puee, kii isufi nín nyēē ki yú dibuŋgbándi puee.

⁵Ubɔ dāa lì yii: <Man sá ti-Dindaan yɔu ní>, ní ubɔ mun ń dāá lì yii: <M sá Jaakɔb dicaŋkun ní>, ní un kíǹ mun ń dāá ŋmà u-ŋal poon yii: <Ti-Dindaan di yì-mi>, ní án dāa mɔ̄ǹ udaan bí nīn yíì-u Isirayeel yindi.»

⁶Ti-Dindaan, Isirayeel Bɔtiu un di dāā u-nibul ki líikée, ti-Dindaan Mpɔŋkɔdaan nín lī puee sèé: «Man di sá upeepeekaa ní ki sá uluŋkikaa, man boonee, unimbɔti ubɔ kaa ti bí[98].

⁷Ŋma di bí kii man? Udaan ń téeń mpɔn kí sòoǹ kí cántí taapu kí tùkù-mi! Udaan ń lì tibɔti tin jítì doooo m nín náań dinibupeepeekaalee, ní kí lì tin bí ki dòoń fool boonee!

⁸«Dinyoondi ń taa kɔ́-ni, ní taa pée fàŋkìmaan! Maa pée sòon̄-tì ki lēē-tì ki dàkā-ni dooooyeeee? Nimbi di sá m-seeradambaa! Unimbɔti ubɔ gíti bí ki kútì man puɔɔɔ? Aayee, ni-taŋkpal din pɔ̄ɔ̄yee, maa ti nyí diba ki kútì man pu!

⁹Binib bin mɔ́ɔ̀ awaayee kɔkɔ kaa bí tiban. Bi-wammɔɔkaati tin bi néeń gbantee kaa kèetī tiba. Tiwan gbanti di sá bíǹ seeradambi, ama tì sá biseeradambi bin kaa wāĺ tibaaa, kaa nyí báà tibaaa, ní ki làá kɔ́ǹ-bi icooyee ní.

¹⁰Kí mā diwaal, kí mɔ́ɔ́ diwaal din kaa ŋūǹ kí kèetī tiba poonee, an sá digbaantundi ní.

¹¹Kpèè, icoo làá cúú bin kɔkɔ nóó diwaal gbantee. Bin máń diwaal gbantee mun pée sá binib ní. Bi-kɔkɔ ń kóoǹní kí kpāfì kí dāan̄: dinyoondi làá kɔ́-bi ní icoo ń cúú bi-kɔkɔ!

¹²«Ucaa dù tikúti kí púĺ ŋŋmin, kí dū nsílin kí gbá ní kí dū u-pɔŋŋu kí mɔ́ɔ́ diwaal. Ama ŋkùm yaa cúú-uee, waa ti cáá mpɔn. U yaa kaa nyùn̄ nnyimee, digìńdi kɔ́-u dee.

¹³«Ukpiŋkpiiti dù ŋŋmii ní kí ŋmàntī ndɔ, kí lēē u nín là diwaalee ń nīn bí puee, kí dū kicɔkɔ kí kpítí, ní kí dū kijijɔlfikaai kí jɔ̀lifì, ní kí kpítí-dì kí nántíǹ unil, ní di kíǹ ki cáá kunyaaŋŋu kii unilee. U yaa ŋá míǹ ki dóòyee ní ú yòon̄-dì kí cáá kɔ́ǹ kí yóoń kuwaadiin.

¹⁴«U gāā seedir subu, ki lēē seeni subu nì teereebinti subu, isufi in bí kubambaŋŋunee kansikin ki yāntì i wíiǹ. U cóoǹ peeni subu ní utaa yāntì bu wíiǹ.

¹⁵Busubu gbanti ní binib làá dūú kpāā ŋŋmi. Búǹ ní binib làá dūú kpāā ŋŋmi kí wùl̀, àá kí dūú kpāā ŋŋmi kí púĺ kpɔnɔ. Busubaantiibuee ní bi tí dūú ŋá unimbɔti ki gbàantí ki jáaḿ. Bi dùú kpítí diwaal ní ki tòotī.

¹⁶Bi dù ndɔee dijandi kí kpāā ŋŋmi, ní kí dū tinan kí páań kí ŋɔ̄fì kí ŋmɔ́ kí díkí. Bi tí ŋūǹ kí wùl̀-ŋu ní kí lì yii: <Àaa! Ndɔee fòol̄ tiŋan, ŋŋmi kɔ́-mi fíŋfiŋ ki mɔ̄.>

¹⁷Dijandi din kíǹee, ní bí dūú kpítí diwaal ki yíì-dì unimbɔti. Bi gbàantí di-nimbiin ki jáaḿ-dì, ki mèé-dì ki lì yii: <Fīī-mi, kun puee sii di sá m-nimbɔtiu!>»

¹⁸Binib gbanti kaa nyí tibaaa, kaa gbìl̀ tibɔti taapu mun. Di sá yii bi-nimbiliŋ ŋúb́ ní baa ti wāĺ báà tiba, bi-pɔbiliŋ tīlifì ní baa ti gbìl̀ tibɔti taapu.

¹⁹Bi-kansikin ubɔ kaa kóò u-ban kí dàkafì, ubɔ kaa cáá iciin nì dinyil kí lì yii: «M dū ndɔ nee dijandi ki kpāā ŋŋmi, m púĺ kpɔnɔ ŋŋmi ŋun m kpāāyee pu, ki dū tinan ki páaǹ ki ŋɔ́fì ki ŋmɔ́. Mimmee, m làá dū digindi din kíǹee kí kpítí diwaal, ntimbiil wantaaa? Mimmee m làá gbàan̄ kí jāam̀ didɔgindaaa?»

²⁰Bi dū bi-ba ki tīī tin sá ŋfantamee ní. Bi-pɔbil din gáatèe yāntì bi-yiliŋ lábitì. Ŋaa ŋūǹ kí fīī-bi. Ama bi-kansikin ubɔ kaa lī yii: «Kun m ŋúb́ m-ŋaan nee kaa sá tinyimɔŋwan deeee?»

²¹«Jaakɔb nibul, á téetí tin bí nee, Isirayeel nibul, a sá man tɔntɔnliu ní. M máń-si á nīn sá m-tɔntɔnliu ní. Isirayeel nibul, maa làá súntí a-pu.

²²M yāntì a-yìntitam wáŋkì kii ditagbandee, ki yāntì a-kpitii wáŋkì kii ditaafaapɔ̀ńdee. Fàtīí gítiń m-cee, kun puee m dá-si ki líì ní.»

²³Yilpu, nín̄ tátí ki fàal̀, kun puee ti-Dindaan túń u-tundi. Kitiŋ taapu taapu, téeń mpɔn, ajoon, nín̄ gàmaan ipampakalan, ki kpáaǹ kubambaŋŋu nì ku-sufii kɔkɔ. Ti-Dindaan dá Jaakɔb nibul ki líì, u fīī Isirayeel ki lēē u-nyooti ki dàkā.

²⁴Ti-Dindaan un dá-si ki líìyee, úǹ un máń-si ki tākaǹ a-na poonee nín sòon̄ puee sèé: «Man ni-Dindaan di náań tikɔkɔ. Man baba di kpátì kutagbɔŋu ki dāntì yilpu, man di tí dū kitiŋ ki kpátì ki bíl̀ taapu, báà ubɔ kaa tútúǹ-mi.

²⁵M ŋáań bibɔɔbi nín sòoǹ tiŋyee fám. M cúú bin kàal̀ abɔɔjalee yiliŋ ki lábitì. M pīiǹ biciŋfitiibi nyɔmmu, ní ki yāntì bi-ciiŋŋu kpántì tiwaatibɔti[99].

²⁶Ama m-tɔntɔnliibi nín sòoǹ tiŋyee, m yàntī an ŋáań míǹ, ní m-tuuŋyi nín bɔ́ntì kí ŋá puee, m tí yàntī an ŋáań míǹ. M lī Jeerusaleem pu yii: <Binib ń fàtīí kɔ́-kì>, ki lī Juuda timmu pu yii: <Bí fàtīí mā-mu.> Tiŋman, bi làá fàtīí mā adiin kí tɔ́kɔń mu-digbuŋŋi pu.»

²⁷M lī ibuŋkpaan in nyóòyee yii: «Ní kpāmaan, m làá yàntī ni-nyim ń fóotí.»

²⁸M lī Siirusi pu yii: «U sá upikpaal un m lēēyee ní. U làá yàntī tin kɔkɔ m lèe ń ŋá. U làá lì Jeerusaleem tiŋki pu yii: <Bí fàtīí mā-kì>, ní kí lì kunimbɔtidii pu yii: <Bí fàtīí bíĺ ku-nyeel[100]!>»