Read Ntcham Esaïe 45 Bible Online

Esaïe 45 - Ntcham bible

Esaïe 45

¹Ti-Dindaan sòon̄ nì Siirusi, ubɔti un ní úǹ u-ba lēēyee yii: «M cúú a-ŋal kí dū atimbun kí ŋá a-ŋaan. M làá cúú bibɔtiibi pɔŋyi kí fōō bi-ŋaan, ní kí pìitī ntimu punyɔmmu mun pīīyee a-nimbiin.

²Mama m-ba làá nīn līī a-nyɔkɔpu, m làá cúú aganlaka kí làkatī a-saŋŋu pu, kí gbá kí wìil̀ tasa kúti punuubi ní kí gbá kí bīil̀ tikúti kpàlkaati.

³M làá tīī-si tigaajawan tin bí dibalinee, tigaajati tin bi dūu bál̀ee. Niinee a làá béé yii man di sá ni-Dindaan. Siirusi, m yíiń a-yindi, man di sá Isirayeel Nimbɔtiu.

⁴M-tɔntɔnliu Jaakɔb nibul pu, Isirayeel nibul din m lēēyee pu ní m yíiń a-yindi ki tīī-si jilma, nì min kɔkɔ saa nyí-mee.

⁵Man di sá ni-Dindaan, ubɔ pée gíti kpá. Báà unimbɔti kaa ti pée bí ki kútì man pu. M dū dambala ki gbìn̄ a-caŋ kí tīī-si mpɔn nì min kɔkɔ saa nyí-mee.

⁶Kí yòon̄ ŋwìiń nyalaŋki pú kí cáá sāā ŋu-jeetilaŋki púee, báà ŋma làá béé yii tiba kaa ti pée bí ki kútì man pu. Man di sá ni-Dindaan, ubɔ pée gíti kpá.

⁷Man di mɔ́ɔ̀ ŋwalifi ní ki nāantí dibɔmbɔndi, man di nyāntí nnaam ní ki cāabìń nnaabu. An sá man ni-Dindaan di ŋáań tíǹ gbanti kɔkɔ.

⁸«Yilpu, yàntī dipɔ̀ńdi ń nyānní kutaa pu kí tɔ̄ń. Atagban ń yàntī deedee ń sìtīń kitiŋ pu kii utaayee. Kitiŋ ń wàan̄ kinyɔkɔ, difiil ń púkuḿ ní deedee ń nyā. Man ni-Dindaan di náań tíǹ gbanti kɔkɔ.»

⁹Mbusu dɔ̄ ki cí unil un kpākantí un máń-uee. Unil sá kii aboon kansikin dibee ní. Kuyɔkɔu bàlifī uyɔɔmaati yii: «Ba ní a ŋáańeeee»? Tiwan tin bi máńee kaa lì un máń-tèe yii: «Waa nyí ditundi tiŋan[101].»

¹⁰Mbusu dɔ̄ ki cí un di yaa lī ubaati yii: «Ba ní a màl̄ nee ní?», àá un di yaa lī umati yii: «Ba ní a màl̄ nan ní?»

¹¹Ti-Dindaan, Isirayeel Circir Nimbɔtiu nín sòon̄ u-nibul din u máńee puee sèé: «Ni bàlifī-mi tin làá bàń m-biyaamu puee. Ni làá tīī-mi mara ditundi din m túńee puɔɔɔ?

¹²Man di ŋá kitiŋ ní ki náań inifunaan ki-pu. Man nì m-ŋalii ní m dūu kpátì yilpu ki dāntì, ní iŋmalbijaa in bí niinee kɔkɔ bí m-taapu.

¹³Man di lūkutìń unil nee ki nóó nì deedee saŋŋu, ní ki làá cúú aganlaka kɔkɔ kí làkatī u-saŋŋu pu. Úǹ di làá fàtīí mā m-tiŋki, Jeerusaleem ní kí gíiǹní m-nib bin cūtì kuyuŋuee. Baa dāa cáá tiba kí pàaa, kaa làá tīī tiba mun.» Ti-Dindaan Mpɔŋkɔdaan di lī míǹ.

¹⁴Ti-Dindaan nín lī puee sèé: «Eejipiti yab tundi paati, Kuusi yab bantiliibi nimbiliŋ nì Seeba yab tijawɔkɔlee, tíǹ kɔkɔ làá kɔ́ a-ŋaan á nīn kíǹ ki yì. Binib gbanti kɔkɔ làá dāá nīn gbìn̄ ikusaka ki pá a-boon. Bi làá dāá gbàan̄ a-nimbiin kí dāá mèè ŋwimmeem kí lì yii: <Sii baba cee ní Unimbɔti bí, báà ubɔ kaa ti pée bí ki kútì u-pu!>»

¹⁵Isirayeel Nimbɔtiu, sii un di fìil̄ee, a lafun sá Unimbɔti un bál̀ee ní.

¹⁶Icoo làá cúú bin kpítí awaayee kɔkɔ, ní sòoǹ kí bīil̀ bi-yindi. Bi còom̄ dicilpu ki cá bi-yiliŋ tīī.

¹⁷Ama ti-Dindaan fīī Isirayeel nibul, u fīī-bi kí nīn cáa cá jaanjaan. Nimbi bin sá u-nibulee, icoo pée gíti kpá kí cúú-ni, ní ni-yindi pée gíti kpá kí bīil̀ jaanjaan.

¹⁸Ti-Dindaan nín lī puee sèé. Ti-Dindaan di náań yilpu, úǹ Unimbɔti di máń kitiŋ, ki nyántì-kì ní ki yāntì kì bá ki pɔ̄ɔ̄. Waa náań-kì kí nīn dɔ̄ fám, u máń-kì yii binib ń nīn kóò ki-pu ní. U bí yii: «Man di sá ni-Dindaan, ubɔ kaa ti pée bí ki kútì man pu.

¹⁹Maa sòon̄ dibalin, dibɔmbɔndi poon laaba. Maa lī Jaakɔb naantiibi yii: <Ní nyàab̀maan-mi kubuŋu pu.> Man di sá ni-Dindaan, m sòoǹ tin bí deedeeyee ní, m lì tin sá mbaamɔn ki cáá dikílee ní.»

²⁰Ní kpāfìmaan kí dāan̄, nimbi bin ŋmátì ki nyáń atimbunee. Ní sútí kí pìl̄maan dicilpu. Binib bin tú bi-waakpitikaaŋi, ki mèé unimbɔti un kaa ŋūǹ kí fīī-bee, bidambi kaa nyí tiba.

²¹Sòom̀maan, ní cáaḿmaan kun dàkà yii ni-bɔti ŋān̄ee. Ní kpāfìmaan kí sòoǹ dicilpu. Ŋma di sòon̄ tin bíi jītí kɔŋkɔnnee pu ŋkilkaamin? Ŋma di nìn dū-tì ki nāatì doooo cannaaku? An kaa sá man, ni-Dindaanaaa? Unimbɔti ubɔ kaa ti bí ki kútì man pu. Man boonee deedee Nimbɔtiu, Unimbɔti un fìil̄ee ubɔ pée gíti kpá.

²²Nimbi bin kɔkɔ kóò kitiŋ kúntilaŋkee, ní fàtīí gítiḿmaan m-cee, ni làá ká difiil, kun puee man di sá Unimbɔti, ubɔ kaa ti bí ki kútì man pu.

²³M pūtì m-ba yii ibaamɔn di làá nyā m-nyɔkɔn, m-nyɔɔbundi kpá ki làá kpántí: Ditabiŋyil kamaa làá dāá gbàan̄ m-nimbiin, dilimbil kamaa làá dāá pùtī kí lì yii[102]:

²⁴«Ti-Dindaan baba cee ní ibaamɔn nì mpɔn bí.» Bin kɔkɔ nìn pée jáń nì mee làá dāá dāan̄ m-cee nì icoo.

²⁵Ama ti-Dindaan puee, bi làá sòoǹ kí pɔ̀ Isirayeel naantiibi kɔkɔ, ní bí dāá nīn bí ki fàal̀.