Read Ntcham Esaïe 46 Bible Online

Esaïe 46 - Ntcham bible

Esaïe 46

¹Diwaal Beeli kpōoǹ, diwaal Neeboo lítì. Bi dū ŋi-naŋku ki túǹ tiwaŋkuti. Dooooyee, bi yaa nìn tòotī-ŋee, bi nìn dúkutí-ŋi ní. Kɔŋkɔnnee, ŋíǹ di kpántì diwaŋgul din nyìm̀ee tiwaŋkuti tú ki gīīyee.

²Awaa kpōoǹ, ŋi-kɔkɔ lítì dicilpu. Ŋaa ŋúń ki fīī ŋi-naŋku, bi cáǹ ŋíǹ ŋi-ba kuyuŋu.

³Pīlifìmaan-mi, Jaakɔb naantiibi, nimbi bin kíǹ Isirayeel nibul poonee, nimbi bin ní m ŋúb́ doooo ni-na poonee, nimbi bin m ŋúb́ doooo ŋyunti ŋun bi màl̄-nee.

⁴M làá nīn pée bí míǹ ní áli ni-putin. M làá nīn pée ŋúb́-ni ní áli ni-yikpiti ń pīil̀. Man di máń-ni, man di làá ŋúb́-ni. M làá kpèè-ni ní kí fīī-ni.

⁵Ŋma ní ni ŋūǹ kí dū-mi kí ŋmàntīǹ ní? Ŋma ní ni ká yii man nì u ŋmà ní? Ŋma ní ni làá dū-mi kí nántíǹ ní kí ká yii man ní u náań ní?

⁶Binib fùtīń sindaariya bi-lɔtin. Bi ŋmàntī animbil kúti saniya pu. Bi cáa tìì goosimiiti yii ú mɔ́ɔ́-bi diwaal. Boonee ní bi gbàantí di-nimbiin ki jáaḿ-dì.

⁷Bíǹ di yòontí-dì kí páań bi-gbigbipati pu, kí cáá-dì kí cùnnì kí síiń mpaan ŋubɔ pu. Laakin ní bi síiǹ-dèe, niin ní dì pée sí. Unil yaa kúuǹ ki yíiń-dàaa, dàa kíikí, unil yaa tí kɔ́ dinimbinaamandinaaa, dàa fìil̄-u.

⁸Téetímaan tin bí nee pu kí ká kunyannyaau! Pɔɔgaatib, ní kɔ́maan ni-ban kí dàkafì!

⁹Ní téetímaan tibɔkpikil tin nìn jítèe pu. Man di sá Unimbɔti, ubɔ pée gíti kpá. Unimbɔti ubɔ kaa ti pée bí kii mamee.

¹⁰Doooo ŋkilkaamin ní m báakì tin làá dāá bàńee. Doooo cannaaku ní m sòon̄ tin kaa láá ŋée pu. M bí yii: «M nín yóoǹ kí ŋá puee làá dāá ŋá. M yaa là puee, míǹ ní m ŋáań.»

¹¹M yíiń ukaabu ubɔ doooo ŋwìiń nyalaŋki pú. Úǹ di làá dāá ŋá tin m bɔ́ntì ki síiǹee. U làá dāá nyānní kitiŋ kin dátèe ni. M yaa lī puee, míǹ ní m ŋáań. M nín bɔ́ntì kí ŋá puee, m làá ŋá míǹ.

¹²Ní pīlifìmaan-mi, bipɔɔgbifindambi, nimbi bin dátiǹ difiilee.

¹³M làá cáań m-baamɔŋyi, iaa ti pée dátiǹ-ni báà fiii. M-fiil kaa làá sūŋkì ní kí bàń. M làá yàntī Siiyɔn ń ká m-fiil, m làá tīī Isirayeel m-nyaaŋku.