Read Ntcham Esaïe 48 Bible Online

Esaïe 48 - Ntcham bible

Esaïe 48

¹Pīlifìmaan tin bí nee, Jaakɔb nibul, nimbi bin bi yíì Isirayeel yab ní ni nyánní Juuda nyeeŋunee. Ni pòontí ipoon ti-Dindaan yindi pu, ní ki mèé ki yíì Isirayeel Nimbɔtiu, ama ní kaa ŋáań míǹ nì ibaamɔn nì deedee poon.

²Ni yíì ni-ba yii <Circir tiŋki yab>, ní ki máká Isirayeel Nimbɔtiu pu, úǹ un bi yíì yii <Ti-Dindaan Mpɔŋkɔdaanee>. Ní pīlifìmaan tin bí nee.

³M sòon̄ tibɔkpikil pu ki síiǹ an yúntì. Tì nìn nyáń m-nyɔkɔn, ní m nìn yāntì ni gbìl̄-tì. Dicilpu dicilpuee ní m yāntì tì dɔ́miń.

⁴M nyí a-pɔɔgbifiŋŋu pu. Di sá yii a-pɔbil tīlifì ní a-yil pɔ̄ɔ̄.

⁵An pu ní m nìn sòon̄ nì si tibɔti gbanti pu ki síiǹ dooooyee. M nìn yāntì a gbìl̄-tì ki wāatì ní tì nín bāań. Maa là yii á dāá lì yii: «An sá m-waal di túń an tundi, m-waakpitikaal àá m-waamɔ́ɔkaal di tīī mara ní ki yāntì an ŋá míǹ.»

⁶Ni nìn gbìl̄ tin m nìn sòon̄ ki yóoǹee, ní ni ká tin kɔkɔ dɔ́miń ki jítèe. Mimmee nimbi kaa béè mimmaaa? Kí yòon̄ kɔŋkɔnnee kí nīn cée, tibɔpɔn pu ní m làá sòoǹ. M nìn dū-tì ki bál̀ ní naa nìn dáá nyí-tì.

⁷An kaa sá tiwan tin nìn bí dooooyee, ama kɔŋkɔnnee ní m làá nín náań-tì. Kí yòon̄ kí dāá sāā díǹ wiiŋŋu nee, naa láá pée gbìl̄ bi sòon̄ ti-pu dalba dalba. Maa là ní dāá lì yii: <Ti nìn pée nyí ti-pu ki yóoǹ.>

⁸Naa nìn pílifì, kaa nìn béè, ni-tafaliŋ pée kpá ti-pu an yúntì. M nyí ni nín sá bin nyēē bi-jutiibi boonee, ní bi yíì-ni yii: <pɔɔgaatib doooo ni-na poon>.

⁹M-yindi pu ní m tāaǹ m-ŋuul ni-pu, m-nyooti pu ní m ká kimɔtii ni-pu, án nín làá ŋá pu ḿ taa kúntí-nee.

¹⁰Kpèè, m cɔ́ŋkì-ni ŋŋmin, ama an kaa nín sá kii ŋŋmi ŋun bi cáa cɔ́ŋkí animbil kútee, nnaabu ŋmiŋun ní m cɔ́ŋkì-ni.

¹¹An sá man m-ba yindi pu. Tiŋman ní, man m-ba yindi pu ní m ŋá míǹ. Di sá yii maa kíikí bí bīil̀ m-yindi. Maa kíikí kí dū m-nyooti kí tīī ubɔ.

¹²Pīlifìmaan-mi, Jaakɔb nibul, sii Isirayeel nibul din m yíińee. M pée gbíntìi sá ubaantee ní, man di sá upeepeekaa ki sá uluŋkikaa.

¹³Man m-ba ŋal ní m dūu máń kitiŋ, nì m-ŋalii ní m dūu kpátì kutagbɔŋu. M yaa yíiń tiwan gbanti liitilee, tì dòoń ní dicilpu dicilpu.

¹⁴Ni-kɔkɔ ń kóoǹní kí kpāfì kí pīlifìmaan: M cáá ubɔti ubɔ. U làá ŋá Babiloon tiŋki m nín là puee, u làá dàkà Babiloon yab m-pɔŋŋu. Ni-kansikin ŋma di sòon̄ tibɔti nee ki yóoǹ.

¹⁵An sá m-baba nì m-baba di sòon̄. Man di yíiń-u, ki yāntì u dɔ́miń. M làá yàntī ú ŋmā kí tɔ̄ u-tundi.

¹⁶Ní sútiń kí pìl̄maan-mi kí pīlifì tin bí nee! Doooo ŋkilkaaminee, maa sòon̄ dibalin. Ŋyunti ŋun ní tibɔti nee nìn jítèe, man nìn bí ní. - Ama kɔŋkɔnnee ti-Dindaan Unimbɔti di dū-mi ki tú nì u-Fam -.

¹⁷Ti-Dindaan un dá-si ki líìyee, Isirayeel Circir Nimbɔtiu nín lī puee sèé: «Man di sá ni-Dindaan a-Nimbɔtiu. Man di dàkà-si tin làá ŋmā kí kèetī-see. Man di kpòotī-si nsan ŋun a còom̄ee pu.

¹⁸Áù, a yaa bàà nìn pílifì tin m nìn kpáafì-see tiŋanee, a-gbansɔŋfiŋu bàà làá nīn sá kii dimɔɔlee, ní a-deedeeu ń bàà nín̄ bí kii tiŋku nyiŋgbantee.

¹⁹A-naantiibi bàà làá nīn wīikí kii dibulee, ní a-nibooliŋu ń bàà nín̄ wīikí kii itaŋkpabiitee[104]. Bi-yindi bàà kpá kí wāŋkì m-nimbiin jaanjaan!»

²⁰Ní nyāmaan Babiloon tiŋkin[105]! Ní sām̀maan-kì! Ní bāakìmaan tibɔti nee nì ifaal poon, ní yàntī tí gbìtī kí tin bà kitiŋ kúntilaŋki. Ní lìmaan yii: «Ti-Dindaan fīī u-tɔntɔnliu Jaakɔb ki líì.»

²¹Kuteeu kun pu u nìn dū Isirayeel yab ki dēe, nnyinnyoo kaa nìn cúú-bi. Bi-puee, u nìn yāntì nnyim nyáń ditaŋkpalin, u búkutì ditaŋkpal ní nnyim pùubìń[106].

²²Ti-Dindaan bí yii: «Binikpitib kpá kí ká ŋgbansɔŋfi.»