Read Ntcham Esaïe 49 Bible Online

Esaïe 49 - Ntcham bible

Esaïe 49

¹Ntimu mun nnyim māntìi túee yab, ní pīlifìmaan-mi. Nimbi bin kóòń ntindandatimunee, ní kpòon̄ ni-tafal kí pīlifì. Baa láá màl̄-mi ní ti-Dindaan yíiń-mi. Doooo m-na poon ní u yíiń m-yindi[107].

²U yāntì m-nyɔkɔ kpántì kii kitàataajiki kin jītée[108]. U dū u-ŋal ki bīiǹ m-pu. U dū-mi ki kpántì mpiin ŋun cɔ́m̀ee, ní ki dū-mi ki bál̀ u-baatandi poon.

³U tùkū-mi yii: «Isirayeel, sii di sá m-tɔntɔnliu. Sii pu ní m làá dī kí dàkà m-nyooti.»

⁴M bí ki lì m-ban yii: «Man gīī digìńdi fám ní, m bɔ̄ɔ̄ abaa ki tīī kutaa.» Ama ti-Dindaan di làá pɔ̀-mi, u kpáafì m-paati ki cíitì-mi.

⁵Kɔŋkɔnnee ti-Dindaan sòon̄. Úǹ di máń-mi ki tākaǹ m-na poon ḿ nīn sá u-tɔntɔnliu. U là yii ḿ fàtīí gíiǹní Jaakɔb naantiibi u-cee, ḿ kóoǹ Isirayeel nibul kí kpāfì. M ká disíndi ti-Dindaan nimbiin, di sá yii m-Nimbɔtiu di sá m-pɔŋŋu.

⁶U bí-mi yii: «Á nīn sá m-tɔntɔnliu kí yòon̄ Jaakɔb naakɔti yilpu, ní kí gíiǹní Isirayeel yab bin ŋmátèe. Ama an kaa dóò. M lēē-si á nīn sá atimbun walifiŋu, kí cáá difiil kí bànnì kitiŋ gbeennyɔkɔ[109].»

⁷Ti-Dindaan Ufiil, Isirayeel Circir Nimbɔtiu nín sòon̄ puee sèé. Sii un ní bi kpèé fámee, sii un báà ubɔ kaa là kí wāl̀ee, sii un sá biwɔ́biliibi yumbuuee, u bí-si yii: «Bibɔtiibi yaa láa wál̀-see, bi làá dāá yīkì bi-beejaliŋ pu kí yūĺ. Abɔtibil yaa láa ká a páaǹnée, bi làá dāá gbàan̄ a-nimbiin ní. Ti-Dindaan un sá deedeedaanee pu, Isirayeel Circir Nimbɔtiu un lēē-see pu ní bi làá dāá ŋá míǹ.»

⁸Ti-Dindaan nín lī puee sèé: «M-niti yuntiŋuee, m nìn pílifiǹ-si, ní difiil wiiŋŋuee, m nìn tútuǹ-si. Man di máń-si kí ŋmā kí dī a-pu kí ŋá mpèé nì dinibul nee. M làá fàtīí fōō kitiŋ nee ní kí fàtīí yàkatī atinjan ŋin dɔ̄ ki bíil̀ nee.

⁹M bí bisarkadambi yii: <Nyānnímaan!>, nimbi bin kóò dibɔmbɔndinee: <Nyānnímaan mpaampiin pu!> Bi làá dāá ká tijin asaŋkaŋkpil pu kí jī, kí dāá ká ŋgbantamu kɔkɔ pu tijin kí jī.

¹⁰Ŋkùm kaa dāa gíti cútí-baaa, nnyinnyoo kaa dāa gíti cútí-bi. Nnantantum kaa dāa gíti sèetī-baaa, ŋwìiń mun kaa dāa gíti píl̀-bi. Di sá yii m làá dū dineendi ní kí kpòotī-bi, ní kí cáá-bi kí cùnnì inyimbul in sɔ̀m̀ee laŋki bí nyɔ̀[110].

¹¹M làá tɔ̄ m-jooŋŋi kɔkɔ pu isan, ní kí dāá ŋāŋkì m-daŋŋi kɔkɔ tiŋan.

¹²Kpèè, bíǹ di nyánní ndandati ki dòońee. Biba nyánní ŋgan pú ní biba mun nyánní ŋwìiń nyalaŋki pú, ní biba nyánní Eejipiti tiŋki ŋgiil pú.»

¹³Yilpu, nín̄ tátí ki fàal̀! Kitiŋ, nín̄ kūuntí nì dipɔɔpindi! ajoon, fáámaan iwiliili! Di sá yii ti-Dindaan bíi sɔ̀ŋkī u-nibul pɔbil, u bíi dàkà binandambi u-neendi.

¹⁴Siiyɔn nìn bí ki lì yii: «Ti-Dindaan dū-mi ki fá, m-Dindaan súntì m-pu.»

¹⁵Ama ní ti-Dindaan kíí yii: Unimpu súntí u-bipɔŋki puɔɔɔ? U ŋūǹ kí taa ti dàkà u-poon biki dineendaaa? Báà u yaa súntì ki-pu, man kaa làá súntí a-pu!

¹⁶Kpèè, m ŋmàn̄ a-yindi m-ŋal poon, ŋyunti kamaa m wāĺ a-guŋŋi m-nimbiin.

¹⁷Jeerusaleem tiŋki, bin làá fàtīí mā-see di sánní malaa malaa ki dòońee. Bin nìn kpéelikì-si ki nāaǹ-see làá sāǹ kí wàatī-si.

¹⁸Yáatí kí kpèè kí màntīí tū: a-biyaamu kɔkɔ kóoǹ ki kpáfì ki dòoń a-cee. Man ni-Dindaan un bí dimaŋfalinee di lī yii, a làá dū-bi kí léeń kii tiléeŋkaalee, kí dū-bi kí gbìn̄ kii ubɔnti nín fùul̀ nnyim pu kí dū dambala kí cúú puee.

¹⁹Di sá yii a-tiŋki kin bi nāaǹ kì kpántì adigbuŋkati ubɔ kaa ti kóò ki-puee kaa làá dāá nīn gíti wāā kí bà a-nib ń kɔ́. Ama bin nìn nāaǹ-see làá sāǹ kí búntí ndan kí wàatī-si.

²⁰A-jipɔmbi bin a nìn dākafì yii baa ti bée, a làá dāá gbìl̄ bi lì yii: «Mpaan kaa wāā ki tīī-mi. Sútí fiii ma mun ń ká mpaan kí kɔ́».

²¹Niinee ní á dāá bàlifì a-ba yii: «Ŋma di kalin màl̄ mbiyaamu nee ki tīī-mi dee? Maa nìn cáá mbiyaamu, m nìn sá uŋmaŋŋmanti ní. Bi nìn cúú-mi kuyuŋu ní ki dū-mi ki fá. Kin bin bí nee, ŋma di nín lōō-bi dee? Ŋyunti ŋun m nìn kíǹ m-babee, bíǹ nìn bí la dee?»

²²Ti-Dindaan Unimbɔti nín lī puee sèé: «Kpèè, m làá dúkutí m-ŋal kí túĺ atimbun watil pú kí tīī-bi kudaaŋŋu. Bi làá dāá ŋúbiń a-jipɔmbi bi-ŋalii poon kí gíiǹní, kí dāá túnní a-bisalib bi-gbigbil pu kí gíiǹní.

²³Bibɔtiibi di làá dāá nīn dàkà a-biyaamu, ní bɔtiisalib ń dāá nīn lòó-mu. Bi làá dāá gbàan̄ a-nimbiin bi-yigbeeŋi tūū kitiŋ. Bi làá dāá líntí a-taaŋi kpɔŋkpɔm. Niinee ní a làá dāá béé yii man di sá ni-Dindaan, ní bin kɔkɔ máká m-puee, icoo kaa jīǹ-bi.»

²⁴Bi ŋūǹ kí fōō ubaatandaan cee tiwan tin u jáń ki fōōyee u-ŋaanaaa? Bi ŋūǹ kí cúú usarkadaan kí fōō uwɔ́bil ŋaanaaa?

²⁵Ti-Dindaan nín lī puee sèé: «Toooo! m làá fàtīí fōō ubaatandaan cee un u cúuń kujaaunee, kí fōō uwɔ́bil cee tiwan tin u jáń ki fōońee! Man di làá já nì bin di jáà nì see, mama m-ba di làá fīī a-biyaamu.

²⁶M làá yàntī bin sàantí-see ń fàtīí ŋmɔ́ bíǹ bi-ba nanti. Bi làá dāá nyɔ̀ bíǹ bi-ba fatikuu kí gbí kii bi nín yaa nyùn̄ ndapɔm bi gbéè puee. Niinee, unifoo kamaa làá dāá béé yii man di sá a-Dindaan un fìil̄-see. Man di dá-si ki líì, man Jaakɔb Nimbɔtikpaaŋwu!»