Read Ntcham Esaïe 5 Bible Online

Esaïe 5 - Ntcham bible

Esaïe 5

¹M làá gāā m-bɔɔ nlan ŋubɔ. Nlanee sòoǹ m-bɔɔ nì u-fiinyi kpaabu bɔti ní. M-bɔɔ nìn cáá fiinyi kpaabu, ní bu nìn tɔ́kɔ́ kigbantaŋ kin cáá ntiŋkpamee pu.

²M-bɔɔ yɔ̄kɔtì kitiŋ gbanti, ki lēē ataŋkpee kɔkɔ ki fá, ní ki cóoǹ ifiinyisumɔnti. U gāā isupaa bukpaayee kansikin, ki gbìn̄ mbòó ŋun ni u làá nīn ŋmāam̀ isufee biliŋee[11]. U bàà nìn cɔ́tí yii bukpaayee làá lòoǹ asubimɔnti, ama ní bu dūu lòon̄ asubikpiti.

³Niinee ní m-bɔɔ bí yii: «Kɔŋkɔnnee, nimbi bin kóò Jeerusaleem tiŋkinee nì nimbi bin sá Juuda tiŋkin yabee, ní sòom̀maan man nì m-fiinyi kpaabu bɔti kí tīī-mi!

⁴Ba ní m bàà máaǹ kí ŋá m-kpaabu gbanti ní maa ŋá? M bàà cɔ́tí yii bú lòoǹ asubimɔnti, ba di ŋá ní bu lòon̄ asubikpiti ní?

⁵«Too, m làá tùkù-ni m nín làá ŋá m-kpaabu gbanti puee. M làá bàkatī bu-naabakaku ní tiwaŋkuti ń kɔ́ kí ŋmɔ́ fiinyee faati. M làá téé digundi din māntìi tú-buee kí lúkú ní bisanjitiliibi ń tāā tāā kí bīil̀-i.

⁶M làá yàntī bú kpántí kupɔɔu, maa ti làá ŋāŋkì fiinyi sufii gbanti ní kaa nín kɔ̄tì-i. Ikuŋkuŋfi nì abɔjanaakun di làá nyā i-ni, ní ḿ yàntī utaa ń taa ti nì i-pu.»

⁷«Ti-Dindaan Mpɔŋkɔdaan fiinyi kpaabuee di sá Isirayeel tiŋki, isufi in u nìn néeń tikpilee di sá Juuda yab. Ti-Dindaan bàà nìn cɔ́tí yii bi làá nīn nóó deedee saŋŋu, ama ní bi bí ki ŋáań ikpiti. U bàà nìn cɔ́tí yii bi làá nīn sá ibaamɔn dambi, ama ní bi yāntì biwɔfib bí ki gbòoǹ pɔ̀ɔɔɔ.»

⁸Mbusu dɔ̄ ki cí binib bin di māā adiin ki kútí adiin pu, ki fòol̄ tisati ki kútí tisati puee. Án dāa pée kúntíǹ yii bíǹ di jíń mpaan kɔkɔ, ki kíǹ ki kóò kitiŋ nee pu bi-baba.

⁹M gbìl̄ ti-Dindaan Mpɔŋkɔdaan pōoǹ yii: «M pūtì yii adiin nee kɔkɔ làá dāá wìil̀, báà uniseen kaa làá dāá nīn gíti kóò adikpaan ŋin ŋān̄ nee poon.

¹⁰Unil yaa cóoǹ fiinyi sufii iŋmii itee, u làá dāá ká ndamam kii liitirib imuŋku ili ja ní, ní unil yaa kùn̄ bilee asambil saalaayee, ú dāá cā disambibaantiil.»

¹¹Mbusu dɔ̄ ki cí binib bin fìntī kutaafaau pɔ̀lpɔl kí dūú gùl̄ ndaam min pɔ̄ɔ̄yee pu dinyɔlee, nì bin yìiǹ kunyeeu ki nyù ndamam an nyàatī-bee!

¹²Bi kpáfí ki nyù idafi ní bi bɔ̀ɔ́-bi tibati nì saŋgub, ki cákafí-bi cancakantib ní ki búǹ-bi awul. Ama baa wāĺ tin ti-Dindaan bíi ŋáańee, kaa kpèé gba tin ní u ŋée.

¹³Míǹ pu ní bi làá cúú m-nibul kí cùnnì kuyuŋu bi nín kaa là kí nīn nyí tibee pu. Bi-kpilib làá kpú ŋkùm, ní samaa ń kpú nnyinnyoo.

¹⁴An puee ditaŋkpiil wāaǹ kinyɔkɔ bàaa, di wāaǹ di-nyɔɔkpaaŋku. Jeerusaleem kpilib nì samaa kɔkɔ làá kɔ́ poon, bi nì bi-jiŋaalib wooku kɔkɔ.

¹⁵An pu ní binib kɔkɔ làá nīn dɔ̄ kitiŋ ki fìlim̀, ní bilambidambi ń tìntī bi-yiliŋ.

¹⁶Ti-Dindaan Mpɔŋkɔdaan làá sòoǹ tibɔti ibaamɔn kí dàkà u-kpaanti. Circir Nimbɔtiu làá sòoǹ tibɔti deedee kí dàkà yii u sá circirdaan.

¹⁷Ipii làá dāá ŋmɔ́ timool niin kii kupikpaapɔɔunee, ní ŋŋɔbiyaamu mun bi là mú gbìfiǹee ń dāá jī niin.

¹⁸Mbusu dɔ̄ ki cí binib bin nyimɔŋyi sá kii iŋmii ki bóob́-bi ki nákáǹ bi-kpitiiyee! Bi còom̄ ikpiti pá bi-boon kii tɔrɔku ní bi dàtēe.

¹⁹Bi bí ki lì yii: «Ti-Dindaan ń yáb́, ú ŋá tin u là kí ŋée malaa timbi ń ká. Tin ní Isirayeel Circir Nimbɔtiu bɔ́ntì ki yóoǹ yii u làá ŋée, ú ŋá, timbi là kí béé.»

²⁰Mbusu dɔ̄ ki cí binib bin yíì tiŋan yii tikpitil, ki yíì tikpitil yii tiŋanee. Bi dù dibɔmbɔndi kí kpántí ŋwalifi, ní kí dū ŋwalifi kí kpántí dibɔmbɔndi. Bi dù mmɔn kí kpántí ntuntun, ní kí dū ntuntun kí kpántí mmɔn.

²¹Mbusu dɔ̄ ki cí binib bin yíì bi-ba biciŋfitiibi, ki gà bi-biŋŋi yii bi sá binyiliibee.

²²Mbusu dɔ̄ ki cí bin dàkà dibaatandi ki nyù ndaam, ki cáá tininjati kí dū idafi in pɔ̄ɔ̄yee kí ŋmàlim̀ kí nyɔ̀ee.

²³Bi fòol̄ dinyɔɔŋeebil jim kí pɔ̀ dibɔkpil daan, ama baa kíikí kí pɔ̀ ibaamɔndaan.

²⁴An pu ní kii ŋŋmi nín wù timool pu, timɔkulindi ń wà búkú buku puee, míǹ ní bi-nyaaŋyi làá sūū ní bi-pumpukum ń kpántí kii ŋkpɔŋkpɔmee kubuŋu ń yòon̄, kun puee bi fá ti-Dindaan Mpɔŋkɔdaan marau, kaa fātìi tɔ́ Isirayeel Circir Nimbɔtiu bɔti.

²⁵An pu ní ti-Dindaan fōō u-nibul pu mbum ki tāntì u-ŋal ki fáá-dì. Ajoon cīŋkì ní anikpil dɔ̄ adan pu fìlfilfil kii timool tin bi ŋātì ki fée. Ama nì míǹ kɔkɔee u-ŋuul kaa sɔ̄ŋkì, ní u-ŋal dáá pée gbíntìi tèen̄.

²⁶U cóoǹ kudaaŋŋu kubɔ ki dàkā ndandati nibul diba, ki búń ŋfoon ki yíiń-dì doooo kitiŋ gbeennyɔkɔ ní di yáb́ malaa ki bāań.

²⁷Di-nib kansikinee, báà ubɔ kaa gīī, báà ubɔ kaa gbéetì, báà ubɔ kaa gèen̄ ki yīntì, báà ubɔ kaa dōoǹ ki gèen̄, báà ubɔ kaa gbīntì u-dambalau ní kaa nín kútì u-naataaŋmiii.

²⁸Bi lōoǹ bi-piiŋyi, ki píĺ bi-tɔfii ki páaǹ ipiin ki cí. Bi-taamui tafuŋfukuti pɔ̄ɔ̄ kii ataŋkpacancalee, ní bi-tɔrɔkub taaŋi màntī kii kunaakpaabuŋŋuee.

²⁹Bi mùuǹ kii ugbikintinaatee, ki gà kuwoou kii ŋgbikintibiyaamu nín sūǹ puee. Bi mùuǹ kí cúú bi-jinti kí kpáàá cáá búntí, ní báà ubɔ kpá ki làá cúú-tì kí fōō bi-ŋaan.

³⁰Ama ŋwindalee, bi làá dāá téeń ditimbundi gbanti pu kii kubuŋkpaaŋŋu nín yàntī tiŋku wòoǹ puee. A yaa láa gbóoń ki kpēē kitiŋee, dibɔmbɔndi nì dinimbinaamandi ní a dāa pée kíǹ ki wāĺ, ní atagban ń dāá dūú bìin̄ ŋwalifi pu.