Read Ntcham Esaïe 50 Bible Online

Esaïe 50 - Ntcham bible

Esaïe 50

¹Ti-Dindaan nín lī puee sèé: «Ni lì yii m jìn̄ ni-na Jeerusaleem. Too, dàkàmaan-mi kugbɔŋu kun dàkà yii m jìn̄-uee! Ni gíti lì yii m dū-ni ki nyáfì kii iyumbuee kí ŋmā kí pà m-pɔɔŋŋi[111]. Too, tùkùmaan-mi un ní m dū-ni ki nyáfíǹee? Kpèèmaan, an sá ni-kpitii pu ní bi dū-ni ki nyáfì, an sá ni-yìntitam pu ní bi jìn̄ ni-na ki nyántì!

²M nín dɔ́mińee, ba pu ní maa ká báà ubɔ? M nín yíińee, ba pu ní báà ubɔ kaa kíí? Mimmee m-ŋal kaa fɔ̀kɔ̀ kí ŋmā kí fōō-ni kí líí níii? Maa cáá mpɔn kí ŋmā kí fīī-naaa? Ní kpèè, m yaa pée kpìl̄ tiŋkuee, see ú kpā, ní kí yàntī amɔɔ ń kpántí kuteeu. Nnyim kpátam puee, ní nnyinnyoo ń kpɔ̀ ijɔm, ní í sūū kí nūukì.

³M tí ŋūǹ kí dū dibɔmbɔndi kí bìin̄ kutagbɔŋu pu, ní kí pèen̄-ku tiwan kii ku kā dikpoolee.»

⁴Ti-Dindaan Unimbɔti dàkà-mi tin m máaǹ kí lèe ḿ ŋmā kí sɔ̀ŋkì un wunti yɔ̄tèe pɔbil. Kutaafaau kamaayee, u fìntī-mi ní ki ŋátí m-tafal ḿ nīn pílifí kii ubifilee.

⁵Ti-Dindaan Unimbɔti ŋátì m-tafal, ní maa mɔ́tí m-ba pu, kaa sútí ki gítí boon.

⁶M fātì m-boon ki tīī binib bin gbáà-mee, ki fātì m-taŋkpundi ki tīī bin dátí ki fùkù m-nyimpulee. Maa bál̀ m-nimbiin bin bèel̄-mi, ní ki tíiĺ timɔtan ki sìtī m-puee cee[112].

⁷Di sá yii ti-Dindaan Unimbɔti di tútúǹ-mi, an pu ní bi-siibiliŋ kaa ká-mi. M yàntī m-nimbiin ń pɔ̄ɔkì kii ditaŋkpalee. M nyí yii icoo pée kpá kí cúú-mi.

⁸Un di pɔ̀-mee bí ki kɔ́ĺ-mi. Ŋma di làá táká-mi tibɔti? Udaan ń nyā tí yūĺ ubɔsoonli nimbiin! Ŋma di làá kɔ̄kɔl̀-mi? Udaan ń nyānní kí yūĺ m-nimbiin!

⁹Ti-Dindaan Unimbɔti di tútúǹ-mi, kin ŋma di gíti ŋūǹ kí kpɔ̀ m-bɔti[113]? M-nannanliibi kɔkɔ làá sátí kii tiwampeeŋkaalee ní, dikɔtuul di làá ŋmɔ́-bi.

¹⁰Ni-kansikin ŋma di fàŋkí ti-Dindaan? Udaan máaǹ kí pīlifiǹ u-tɔntɔnliu. Ŋma di cōom̀ dibɔmbɔndin kaa ká ŋwalifi ní? Udaan ń nīn máká ti-Dindaan pu, kí dū u-ba kí fìtīǹ u-Nimbɔtiu!

¹¹Ama nimbi bin kpà ŋŋmi, ipiin in fòol̄ lìblibee māntìi tú-nee, ní kɔ́maan ni-ŋmiŋu ŋun fòol̄ lìblibee poon, ipiin in ni tūū ŋŋmee kansikin. An sá man ŋal pɔŋŋu di làá ŋá míǹ, agìń poon ní ni làá dāá kpú.