Read Ntcham Esaïe 51 Bible Online

Esaïe 51 - Ntcham bible

Esaïe 51

¹«Ní pīlifìmaan-mi, nimbi bin nyàab̀ ibaamɔnee, nimbi bin bí ki nyàab̀ man ni-Dindaanee. Ní kpèèmaan ditaŋkpal din bi dūu kpítì-nee, kí kpèèmaan mbòó ŋun poon bi nyántìń-nee.

²Ní kpèèmaan ni-baa Abraam, kí kpèè Saara un màl̄-nee. Abraam kaa nìn cáá kibiki ŋyunti ŋun m nìn yíiń-uee. Ama ní m bīiǹ u-boon ki yāntì u kpántì ditimbuŋkpaandi naanja.»

³Tiŋman, ti-Dindaan làá sɔ̄ Siiyɔn tiŋki saai, u làá sɔ̄ ki-digbuŋkatiŋ saai. U làá yàntī kitiŋ kin kpántì kii kuteeuee ń kpántí kii Eedeen kpaabuee. U làá dū kitiŋkuliŋŋi gbanti kí kpántí kii ti-Dindaan kpaabuee. Dipɔɔpindi nì ifaal làá nīn bí ki-poon, bi làá nīn gà ipampakalan ní ki bɔ̀ɔ́ tiwambɔɔkaal ki-poon.

⁴«Ní pīlifìmaan-mi tiŋan, m-nibul. M-timbundin yab, kpòom̄maan ni-tafal kí pīlifì-mi. Di sá yii man di làá nyāntí mara, ní ibaamɔn in m làá cáańee làá nīn ŋmíntí anibul kɔkɔ.

⁵M-deedeeu tóobiń, m-fiil nyáń ki páaǹní. M làá dū mpɔŋkpaan ní kí sòoǹ anibul bɔti. Ntimu mun nnyim māntìi túee làá nīn máká m-pu, ní kí nīn cɔ́tí m-pɔŋkpaaŋŋu pu.

⁶Wáaǹ kí kpèè kutaa, ní kí tìntī kí kpèè kitiŋ. Kutagbɔŋu làá wāŋkì kii nnyiimee, kitiŋ làá sátí kii tiwampeeŋkaalee, ní ki-nib ń kpú kpú kii isiiyee. Ama man fiil làá nīn bí ní ki cá jaanjaan, m-deedeeu pée kpá kí kúntí dalba dalba.

⁷«Pīlifìmaan-mi, nimbi bin nyí tin bí deedeeyee, nimbi dinibul din ŋúb́ m-marau di-pɔbilinee. Ní taa fàŋkìmaan nisaaleen siibiliŋ, kí taa yàntī binib beelii ń yɔ̀tī ni-wunti.

⁸Dikɔtuul làá mɔ́-bi kii tiwampeeŋkaalee, akoosibil làá ŋmɔ́-bi kii ipii kuti wampeeŋkaatee. Ama man deedeeu làá nīn bí ki cá jaanjaan, m-fiil làá nīn bí ní ki cá abin abin.»

⁹Fìntim̄, ti-Dindaan fìntim̄! Dàkà a-pɔŋkpaaŋŋu! Fìntim̄ kii a nín nìn ŋá pu cannaakuee, kii a nín nìn ŋá pu njaminee! Sii di nāaǹ Raab, ki sāā ki pūutì tiŋkun peebiliŋku[114].

¹⁰Sii di tí yāntì tiŋku nyim fóotì, ki yāntì tiŋkukpaŋkpaan nyim kūń. Sii di tɔ́ nsan tiŋku poon, ní ki yāntì binib bin a fīī ki líìyee cōom̀ ki jítì.

¹¹Binib bin ti-Dindaan dá ki líìyee làá dāá fàtīí gítiń. Bi làá dāá kɔ́nní Siiyɔn tiŋkin ki fàal̀, ní dipɔɔpindi din kaa cáá dikúntilee dāa ŋmíntí bi-nimbiiŋyi. Mmɔŋkpaan làá dāá gbí-bi, ní falaa nì iyaliŋki ń dāá wāŋkì.

¹²Ti-Dindaan bí yii: «An sá man di bíi sɔ̀ŋkī ni-pɔbil. M-nibul, ba pu ní a fàŋkí nisaaleen un kúùyee ní? U nì kumoou kúntitam sá mbaantiim ní.

¹³A súntì a-Dindaan un náań-see pu, úǹ di kpátì kutagbɔŋu ki dāntì yilpu, ní ki náań kitiŋ. Baabadalee, a kā ki fàŋkí yɔ́kɔ́ yɔkɔ uwɔ́bil ŋuul pu, kii u bɔ́ntì ki làá nàan̄-see! Uwɔ́bil ŋuul gbantee baasii bí la ní?

¹⁴Án kaa làá sūŋkì usarkadaan un kaa ti cáá dimákalee làá tɔ̄ u-ba. Waa làá kpú u-sarkaun, ní tijikaal kpá kí lóó-u dalba dalba.

¹⁵Man di sá a-Dindaan a-Nimbɔtiu. Man di kùtī tiŋku ní ki yàntī u-nyiŋgbanti wòoǹ. M-yindi di sá ni-Dindaan Mpɔŋkɔdaan.

¹⁶Man di kpátì kutagbɔŋu ní ki náań kitiŋ, ní ki bí Siiyɔn yii: <Sii di sá m-nibul! M dū m-nyɔɔbuŋŋi ki ŋá a-nyɔkɔn, ní ki dū m-ŋal booŋŋu ki līkiǹ a-pu.»

¹⁷Jeerusaleem, fìntī, fìntī kí yīkì kí yūĺ! Ti-Dindaan yāntì a nyùn̄ u-ŋuul kii ndaamee. A nyùn̄-dì ki tin dóò kɔkɔ, ní a-nimbiliŋ kíǹ ki bɔ̀ntī[115].

¹⁸A-jipɔmbi bin a màl̄ee kansikinee, báà ubɔ kaa dàkā-si nsan. A-jipɔmbi bin a kpēē bi cíkitèe, báà ubɔ kaa cúú a-ŋal kí tíkiń-si.

¹⁹Ibɔl nee táá tɔb ili ili ki bāań-si: difukuldi nì dinàandi, ŋkùm nì kujaau. Ama ŋma di làá yāliŋkì a-pu? Ŋma di làá sɔ̀ŋkì a-pɔbil?

²⁰A-jipɔmbi dɔ̄ an kɔkɔ fìlfil asaŋkaŋkpil pu. Kii kutaliŋŋu nín sàtī mpeewumu puee, míǹ ní bi dɔ̄ kaa ti cáá mpɔn. Ti-Dindaan ŋuul di fáá-bi, a-Nimbɔtiu di kpìl̄-bi.

²¹«Kɔŋkɔnnee, pīlifì tin bí nee, sii Jeerusaleem un gbí inimɔɔnee: A gbí, ama an kaa sá ndaam ní a nyùn̄.

²²Ti-Dindaan, a-kpiliu, a-Nimbɔtiu un mɔ́tí a-nibul puee nín lī puee sɔ̀. M làá fàtīí fōō m-ŋuul kɔŋkɔŋwu un yàntī a-nimbiliŋ bɔ̀ntēe. Aa ti làá pée nyɔ̀ m-ŋuul dalba dalba.

²³M làá dū di-kɔŋkɔŋwu gbanti kí ŋúbiǹ bin nìn sàantí-see ní. Bíǹ bin nìn lì-si yii: <Tàtīí dòon̄ kitiŋ timbi ń tāā a-pu kí còom̀ee!>, A nìn lafun dū a-boon ki tīī bi dūu kpántì nsan, kii didandi din pu bi nìn còom̄ee.»