Read Ntcham Esaïe 52 Bible Online

Esaïe 52 - Ntcham bible

Esaïe 52

¹Fìntim̄, Siiyɔn, fìntī malaa! Fàtīí ká a-pɔŋkpaaŋŋu! Circir tiŋki Jeerusaleem, dū a-wannyaanti kí pèen̄. Di sá yii kí yòon̄ díǹ kí nīn cée, bin kaa gíí dikpancandee, bin di kaa bí circiree pée gíti kpá kí kɔ́ a-ni[116].

²Gbāfì kukpɔŋkpɔŋu a-wunti pu kí fá. Jeerusaleem usarkadaan, yīkì kí fàtīí fōō a-paaŋŋu! Sii Siiyɔn tiŋki uyumbu, léetí a-neen kpancikiliu.

³Di sá ti-Dindaan di lī yii: «Bi dū-ni ki nyáfì kaa fōō tiba, míǹ mbaantiim ní bi làá fàtīí dā-ni kí taa pà báà gboo.»

⁴Ti-Dindaan Unimbɔti gíti lī yii: «Ŋkilkaaminee, Eejipiti tiŋkin ní m-nibul nìn cūtìi kɔ́. Kí kúntée, Asuur yab wɔ́b́-bi.

⁵Too, kɔŋkɔnnee ba ní m páatì? Ti-Dindaan di lī míǹ! Bi cúú m-nibul ki cūnnì kuyuŋu kaa pàn̄ báà tiba. Bin jíń bi-pu dinyandee kūuntí nì dijajil, ní baabadalee, bi bí ki sòoǹ ki bíiĺ m-yindi. Ti-Dindaan di lī míǹ[117]!

⁶An puee m-nibul làá dāá béé ŋwindal un ní m baasii sée. Yaadalee bi làá dāá béé yii man di sòon̄ ki bí yii: <M dòoń!>»

⁷Kpèè an nín ŋān̄ á ká ntuun ŋun sòoǹ ŋgbansɔŋfi bɔtee ń páanní ajoon pu puee[118]! Ŋu sòoǹ ŋgbansɔŋfi nì dipɔɔpindi nì difiil pu. Ntuun ŋun di nàatī-ti difiil bɔtee, Jeerusaleem, ŋu bí ki tùkù-si yii: «A-Nimbɔtiu sá ubɔti!»

⁸Pīlifì binib bin a yóoǹ sintilee. Bi kpáfì dicilpu ki tátí mpɔn mpɔn, di sá yii bíǹ bi-ba nimbil ká ti-Dindaan nín fàtīi gítiń Siiyɔn tiŋkinee.

⁹Jeerusaleem digbuŋŋi, ni-kɔkɔ ń kpāfì dicilpu kí nīn tátí mpɔn ki fàal̀! Di sá yii ti-Dindaan bíi sɔ̀ŋkī u-nibul pɔbil, u bíi fìil̄ Jeerusaleem tiŋki.

¹⁰Ti-Dindaan làá lēē u-circir pɔŋŋu kí páań mpaampiin pu atimbun kɔkɔ ń ká. Ní kitiŋ kúntilaŋki yab kɔkɔ ń dāá ká ti-Nimbɔtiu fiil.

¹¹Nín̄ cámaan! Nín̄ cámaan! Nyāmaan niin! Ní taa gbēēmaan tin kaa bí circiree[119]. Nimbi bin tú ti-Dindaan diikun wantee, ní ŋámaan ni-ba circir kí nyā Babiloon tiŋkin.

¹²Min bí neeyee, naa làá nīn sáń kii ni sáń kukunsaŋuee, àá kii bi jì-nee, di sá yii ti-Dindaan di làá nīn līī ni-nyɔkɔpu, Isirayeel Nimbɔtiu di làá nīn pá ni-boon.

¹³«Kpèè, án làá bútí m-tɔntɔnliu. U làá yīkì kí kàl̄ mpaan ŋun jítiǹ ipaan kɔkɔee pu, ní kí fōō tinyool.

¹⁴Binib tikpil nín ká-uee, an nìn kɔ́-bi tiwool, di sá yii u-nimbiin nìn cúu kpántì, ní waa nìn pée gíti náań nì nisaal.

¹⁵Míǹ mbaantiim u-puee, án làá ŋá atimbun tikpil bitii, ní bibɔtiibi kaa dāa gíti nyí tin bi làá lèe. Di sá yii bi làá ká tin baa láá máafì-bi ki kée, ní kí dāá wāl̀ tin baa gbìl̄ dalba dalbee[120].»