Read Ntcham Esaïe 55 Bible Online

Esaïe 55 - Ntcham bible

Esaïe 55

¹Nimbi bin nnyinnyoo cááyee, dāam̄maan, nnyim bí doo! Báà ni yaa kaa cáá animbil, dāam̄maan! Dāmaan tijin kí jī, an sá faalaa ní[133]! Dāam̄maan kí dā ndaam nì nnaabiim kí taa pà tiba.

²Ba pu ní ni jīǹ animbil tiwan tin kaa kpīintée pu? Ba pu ní ni gì digìńdi fám tiwan tin kaa díkèe pu? Ní pīlifìmaan, pīlifìmaan-mi, ní kí ká tijimmɔntiil kí jī, ní kí jī tijin tin mɔ̄ee.

³Ní kpòon̄ ni-tafal kí pīlifì ní kí dāan̄ m-cee, ní pīlifì ní kí dāá ká dimaŋfal. M làá pòon̄-ni dipoondi din làá nīn bí ki cá jaanjaanee, m làá ŋá-ni tiŋan tin m nìn pōoǹ Daafiidee[134].

⁴Kpèè, m nìn yāntì u kpántì anibul seeradaaŋwu, ki nìn kāaǹ-u ú nīn sá atimbun bɔtiu nì ŋi-kpiliu.

⁵Kpèè, a làá kúuǹ kí yíiń ditimbundi din ní saa nyée, ditimbundi din kaa nyí-see làá sāǹní kí dāan̄ a-cee. Di làá sāǹní kí dāan̄ a-Dindaan a-Nimbɔtiu un sá Isirayeel Circir Nimbɔtiuee pu, di sá yii úǹ di tīī-si tinyool.

⁶Nyàab̀maan ti-Dindaan, ŋyunti ŋun u ŋūǹ kí yàntī ní ká-uee. Ní yíiḿmaan-u ŋyunti ŋun ní u bí ki pìlīǹ-nee.

⁷Unikpiti ń fá u-saŋkpitii, ukpitiŋal ń fá u-landɔkɔkpitii. Bí gítiń ti-Dindaan cee, di sá yii u làá sɔ̄ bi-saai! Bí gítiń ti-Nimbɔtiu cee, di sá yii u pūǹ ikpiti nì dipɔbil diba ní!

⁸Di sá yii ni-landɔkɔi nyáń i-ba nì man landɔkɔi, ní man saŋyi nyáń i-ba nì ni-yai, ti-Dindaan di lī míǹ.

⁹Kii kutagbɔŋu nín bíń yilpu ki dátì nì kitiŋ puee, míǹ ní m-saŋyi dátì nì ni-saŋyi, ní m-landɔkɔi dátì nì ni-yai.

¹⁰Utaa nyēeń yilpu ní ki nì ní ntaayim nyēeń yilpu ki lítí. Bi yaa kaa sɔ̄ŋkì kitiŋ, kaa tīī kitiŋ ntiŋkpam, kaa yāntì iwambool nyánnée, baa fàtīí gítí yilpu. Míǹ ní bi tìì iwambool nì tijikaal[135].

¹¹Míǹ mbaantiim ní dinyɔɔbundi din nyēē m-nyɔkɔnee kaa fàtīí gítiń m-cee kaa túń ditundi din pu dì nyáńee. Dì ŋáań tin m lèe ní ki tūǹ ditundi din m dūu ŋúbiǹ-dèe.

¹²Tiŋman, nì dipɔɔpindi ní ni làá nyā Babiloon tiŋkin, ní bí fàtīí gíiǹní-ni ni-tiŋkin nì ŋgbansɔŋfi. Ni yaa láa jītée, ajoon nì ŋgbantamu dāa kūuntí nì dipɔɔpindi ní tisatin sufii kɔkɔ dāa kpáafí abaal.

¹³Laakin bàà sá kukuŋkuncikuu ń nyēe, siipreesi subu di dāa nyēē niin, laakin bàà sá ŋkuŋkumbɔmu ń nyēe, miirti subu di dāa nyēē niin. Án dāa sá diyiŋkpaandi ní ki tīī ti-Dindaan, kudaaŋkpaaŋŋu kun làá nīn pée bí ki cá jaanjaanee.