Read Ntcham Esaïe 57 Bible Online

Esaïe 57 - Ntcham bible

Esaïe 57

¹Bi kù deedeedambi ní an kaa ká báà ubɔ. Bibulcinnib wáŋkí ní báà ubɔ kaa kpáà béetí gba. Tiŋman, bin tɔ́ Unimbɔtee wáŋkí binikpitib toonam pu.

²Ama ŋgbansɔŋfi làá dāan̄, ní bin nóó deedee saŋŋuee ń dòon̄ kí gèeǹ kí taa fàŋkì tiba.

³Sútiḿmaan doo nee, nimbi usoopu biyaamu. Ni sá bilaakpaadambi nì nlaakpaamu[137].

⁴Ŋma ní ni bèel̄ ní? Ŋma ní ni dɔ̀tī kinyɔkɔ ki nyāntí dilimbil ní? Ni lafun sá pɔɔgaatib ní, inyimɔn nibooliŋu.

⁵Ni mɔ̀nnì tɔb teereebinti sufii caŋin, nì busubu bun kamaa faati yaa múkúee taapu. Ni cáá mbiyaamu ki tòotī ibun nì itaŋkpalɔkɔn.

⁶Mbun poon taŋkpeeŋi ŋin jɔ̀m̀ pɔ́lpɔlee ní a là, ŋíǹ di sá a-gaajawammɔntiiti, Isirayeel. Ŋíǹ ní a féeń ndaam, ní ki tòotī! Ní ní bí yii tin bí nee ń sɔ̀ŋkì man pɔbilaaa?

⁷A bɔ́ntì a-dooŋu dijoofɔŋfɔkɔl pu. Niin ní a jɔ́ḿ ki tòotī.

⁸A dū a-waal ki kúĺ ki lúntì dikampiil dɔŋu boon. A bāal̀-mi ní kí cúú a-wanti kí pèetī, kí jɔ̄m̀ a-dooŋu ŋun wāāyee pu. Sii nì a-bɔmbi pūtì ki pōoǹ tɔb, a-bɔmbi bin a néeń bi dɔ̀ nì si, ní a kpèé bi-ninjatee!

⁹A ŋúb́ ŋkpam ki cūnnì ki pú diwaal Mooleeki, ki pú-dì talaalub mun. A tú ituun i cūtì ntindandatimun, a sīntì taapu ki tin bàn̄ ditaŋkpiilin.

¹⁰A pɔ́ɔǹ tikpil ní a-pɔ́ɔǹtam yāntì a gīī. Ama aa lī yii: <M yaan pūtìi yāntì an bàà sɔ́!> A fātìi ká mpɔn mpɔmin, ní kaa yɔ̄tì a-wunti.

¹¹Ŋma di yāntì dinyoondi kɔ́-si ní a fāŋkì ki mɔ́ntì nnyimɔn, ki súntì m-pu, ní kaa ti dàkafī m-pu ní? M kāl̀ diŋmiŋŋmil an yúntì. An pu ní aa nìn gíti fàŋkí-mi.

¹²Ama m làá bìitī a-bɔɔŋŋi pu. Aa làá ká ipaati iba tin a ŋáańee poon. Án kaa làá kèetī-si.

¹³A yaa láa kúuǹ ki nyàab̀ dijòońdee, a-waaŋi ŋin a kóoǹ ki kpúkuǹee ń dāá fīī-si! Kubuŋu làá yòon̄ ŋi-kɔkɔ kí fá, kufoou làá kpáaǹ ŋi-kɔkɔ. Ama un kamaa di yaa sáǹ ki kɔ́-mee làá dāá fōō kitiŋ nee kí nīn kíǹ ki yì, ní kí dāá fōō m-circir jool mun.

¹⁴Ti-Dindaan bí yii: «Ní gbīŋkìmaan didandi, ní cátímaan nsan malaa, ní lēēmaan aganlaka ŋin dɔ̄ m-nibul saŋŋu puee.»

¹⁵Di sá yii circir Nimbɔtiu un bí yilpu fɔ́ŋŋŋ ní u-kɔŋkooŋŋu bí kí nīn cá jaanjaanee, nín lī puee sèé: «Man Unimbɔti un bí circiree, m kóò yilpu fɔ́ŋŋŋ ní. Ama m bí bin bi wɔ́b́ bi sīntiǹ bi-ba taapuee cee. M làá tīī bin sīntiǹ bi-ba taapuee dimaŋfal, m làá tīī bin bi wɔ́b́ee dimaŋfal[138].

¹⁶Maa làá nīn kɔ́kɔĺ m-nibul kí nīn cá jaanjaan, maa làá gíí di-pu diŋuul kí nīn cáa cá talku. M yaa ŋá míǹ, binib bin m náańee kaa làá nīn gíti cáá dimaŋfal.

¹⁷Isirayeel nimbiliŋ nín máǹ tiwan kɔkɔ pu puee yāntì u yīntì. An yāntì m gíí diŋuul, ní m-ŋuul poonee m fáá-u. M-nimbil kaa nìn gíti là kí wāl̀-u. Ama ní waa pée fātìi tɔ́ ní ki ŋá u nín là puee.

¹⁸M ká u-bimbim, ama man làá cáaǹ-u. M làá kpòotī-u, ní kí sɔ̀ŋkì u-pɔbil. Bin kā dikpoolee,

¹⁹m làá dū inyɔŋki laŋyi kí ŋá bi-nyɔmmun. Bin bínní ndandatee ń nīn bí ŋgbansɔŋfin, bin bí kɔŋkɔmee ń nīn bí dipɔɔsɔŋkilin[139].» Ti-Dindaan di lī míǹ. «Tiŋman, m làá cáaǹ m-nibul!»

²⁰Ama binikpitib bíǹ sá kii an nín yòontí tiŋku nyim pu waa ŋūǹ kí dòon̄ soooo puee ní, ní u-nyiŋgbanti kùtī ki nyāntí tikpati nì tijɔkɔndi kɔkɔ.

²¹M-Nimbɔtiu bí yii: «Binikpitib kpá kí ká ŋgbansɔŋfi!»