Read Ntcham Esaïe 58 Bible Online

Esaïe 58 - Ntcham bible

Esaïe 58

¹Ti-Dindaan di bí-mi yii: Téeń mpɔn, taa mɔ̄tì a-ba pu! Kúuǹ mpɔn kii dikantándee! Tùkù m-nibul di-yìntitam, tùkù Jaakɔb naantiibi bi-kpitii.

²Kutaa kamaayee, bi nyàab̀-mi, ní ki là kí béé m-saŋyi. Bi bí kii ditimbundi din ŋáań tin bí deedee kaa féeń di-Nimbɔtiu marabee ní. Bi là yii ḿ nīn sòoǹ tibɔti nì deedee, ní ki là ḿ nīn pìlīǹ-bi.

³Ama ní bi bí ki lì yii: <Ba pu ní tí nīn bōob̀ kinyɔkɔ ŋyunti ŋun ní sii kaa wāĺ-tee? Ba pu ní tí sìntīǹ ti-ba taapu ŋyunti ŋun ní sii kaa nyí yii ti bíi ŋáań tibee? Niinee ní m kíí yii: Ni-nyɔɔboobil wiiŋŋuee, ni gíti tūǹ atuun ŋin cāabìń-ni ipaatee, ní ki sàantí ni-tɔntɔnliibi.

⁴Ni bōob̀ kinyɔkɔ ní ki kpákà ki jáà, ní ki gbáà tɔb aŋaŋkul. Naa ŋūǹ kí bóob́ kinyɔkɔ míǹ kí nīn kā ki cí yii bí gbìl̄ ni-nyɔkɔ pu yilpu.

⁵Dinyɔɔboobil din fáatì-mee nín máaǹ kí nīn bí puee deeee? Ni nín máaǹ kí sìntī ni-ba taapu puee deeee? Ní nīn tīī diyil kii kukaluuee, àá kí nīn pēē kpɔsata, àá kí nīn dɔ̄ ŋfantam poon ní? An ní ni yíì yii dinyɔɔboobilaaa, ŋwiin ŋun fáatì man ni-Dindaaneeee?

⁶Dinyɔɔboobil din man lèe sèé. Á gbìntī binib bin kaa ŋá tiba bi bóob́-bi ikusakee, kí cúú diwaŋgul din nyìkī bi-puee kí nyìkitī, kí tīī bin bi wɔ́b́ee dibatɔl, an dàkà yii kí kúntí tin kɔkɔ nyìkī bi-pu baa tɔ́ bi-bee.

⁷Sii nì un ŋkùm cááyee ń yàkatī a-jinti kí jī, kí fōō uwɔfi un kaa cáá kikɔlaŋee a-dumpu. Á tīī un kaa cáá kí pèen̄ee tiwan ú pèen̄. Á taa fàtī a-boon kí tīī a-nabiki[140].

⁸Niinee a-walfiŋu làá nyā kí páań kii ntaafaawìińee, ní a-buuŋyi kaa làá pée sūŋkì ní kí kpú. A-baamɔŋyi di làá nīn līī a-nyɔkɔpu, ní ti-Dindaan nyooti ń nīn pá a-boon.

⁹A yaa láa yíińee, ti-Dindaan làá dāá kíí-si. A yaa láa kúuǹee, u làá dāá lì yii: «M sèé!» A yaa kúntì a-tiŋkin kun nyìkī binib pu, kaa ti dàkà bin kíǹee kiŋambiki ki lāā-bi, kaa ti sòoǹ ki bíiĺ-bi,

¹⁰ki yaa ŋmìntī a-ba un ŋkùm cááyee ń ká kí jī, ki cáa kpīintí binandambee, a-walfiŋu làá nīn ŋmíntí dibɔmbɔndin, dibɔmbɔndi làá nīn sá a-cee kii ŋwiimpuee ní.

¹¹Ti-Dindaan di làá nīn pée kpòotī-si. Báà kuteeun, u làá tīī-si á jī kí díkí ní kí tīī a-kpabiŋ mpɔn. A làá nīn sá kii bukpaa bun bi yāaǹ nnyim tiŋanee, kii nnyimbul ŋun nyim kaa fóotí jaanjaanee.

¹²A làá fàtīí mā adiin ŋin nìn lítèe. A làá mā-ŋi kí tɔ́kɔń adinyee ŋin bi nìn dūu fá abin abinee pu. Bi làá dāá yíiń-si yii: «Dinibul din fàtīi māā digundi, laakin bátì bátì ki lítèe, nì din ŋáŋkí kitiŋ sàmbiyaamuee.»

¹³«Tí dūú ŋmàntī tin bí nee: Aa tūǹ ditundi diba ŋwiŋŋuŋfikaa dal, kaa bàntī m-circir wiiŋŋu dal. A yíì ŋwiŋŋuŋfikaa yii <Mmɔn wiiŋŋu>, ki yíì ti-Dindaan circir wiiŋŋu yii <tinyool wiiŋŋu>, ki tɔ́-ŋu kaa tūǹ diba, kaa bàntī kaa gbíntí kubɔcaau pu ŋwiin gbanti dal.

¹⁴Niinee man a-Dindaan làá kpántí a-pɔɔpindi. M làá yàntī á còom̀ kí jītí kitiŋ nee jooŋŋi pu kii ujajilee. M làá yàntī á jī a-naanja Jaakɔb tiŋki difakal.» Tiŋman man a-Dindaan di lī míǹ.