Read Ntcham Esaïe 59 Bible Online

Esaïe 59 - Ntcham bible

Esaïe 59

¹Kpèè, ti-Dindaan ŋal kaa bí kigiŋgiŋ kaa ŋūǹ kí fīī-ni, u-tafal mun kaa kpáá kaa ŋūǹ kí gbìl̄ tin ni sòoǹee!

²Ama an sá ni-yìntitam di cāabìń diyakatil ni nì ni-Nimbɔtiu kansikin. Ni-kpitii di yì-tì ní u fātì u-boon, kí taa gbìl̄ tin ni sòoǹee.

³Di sá yii ni-ŋalii táká fatiku, ní tikpitil táká ni-ŋambiyaamu. Ni cáá ni-nyɔmmu ki mɔ́ntí inyimɔn, ní ki sòoǹ ki bíiĺ ni-jutiibi.

⁴Ubɔ kaa yíì u-juti tibuul ki nóó deedee saŋŋu. Naa dì ibaamɔn kí mɔ̄tì ni-jutiibi pu. Ni máká tin kaa bée pu, ki sòoǹ tinyimɔmbɔti. Ni cáá ikpiti pool ní ki màl̄ nnaabu.

⁵Bi náká ukoowaati jiŋŋi pu, ki lù tinaŋgbantalindi. Un di yaa ŋmɔ́ an jiŋŋee kúù ní. Dijindi din kamaa pu ní bi yaa nákáǹee kákatí ukoobu ní.

⁶Bi-naŋgbantalinti kaa ŋál̀ tiwampeeŋkaal, ní unil kaa ŋūǹ kí dū tin bi lùn̄ee kí bìin̄. Atuun ŋin ní bi tūǹee sá atuŋkpiti ŋma ní, ní bi cáá bi-ŋalii ki ŋáań tipɔmbɔti ŋma!

⁷Ni sáń malaa malaa kí cùú ŋá ikpiti, ni yáb̀ kí cùú kpɔ̀ maanyiibab. Ni-landɔkɔi sá ilandɔkɔkpiti. Laakin kamaa ní ni yaa jítèee, ni ŋáań tipɔmbɔti ní ki bíiĺ tikɔkɔ.

⁸Naa nyí ŋgbansɔŋfi saŋŋu, baa kāntí deedee laakin ní ni còom̄ee. Ni-saŋyi kɔkɔ sá in gɔ́ĺ gɔ́ĺee ní, un kamaa di yaa dī-iee kpá kí ká ŋgbansɔŋfi[141].

⁹An pu ní Unimbɔti kaa bíi mɔ́tí ti-pu, kaa bíi sòoǹ kí pɔ̀-ti. Ti bàà cɔ́tí kí ká ŋwalifi, ama ní ti kɔ́ dibɔmbɔndin. Ti bàà kā ki cí án nyáatí ti-pu, ama ní ti bí ki còom̄ an bɔ̀ǹ ti-pu.

¹⁰Ti bí ki táfí kii bijɔfub di náká digundee. Ti bí ki tìliŋkī kii bin kaa wāĺ laakin bi còom̄ ki cée. Ti gbéetí kuwiŋkaŋu pu kii ti bí ntaafaabɔmbɔminee. Ti baasii pée cáá ŋgbampɔn tiŋan, ama ní ti bí kii bitaŋkpiibee.

¹¹Ti-kɔkɔ bí ki mùuǹ kii agbiŋgbilee, ti bí ki yáliŋkí kii abeenanjilee. Ti bàà kā ki cí Unimbɔti ń sòoǹ kí pɔ̀-ti, ama ní taa ká báà tiba. Ti bàà kā ki cɔ́tí yii ti làá ká difiil, ama ní dì dáá gbíntìi dátiǹ-ti.

¹²Di sá yii ti yīntiǹ-si tikpil, ní ti-kpitii kɔ́kɔĺ-ti. Ti pée dàkafī ti-yìntitam pu ní kaa gbèentí, ti nyí ti nín ŋá-si ikpitee.

¹³Ti-Dindaan, ti yīntiǹ-si, ki nyáń a-boon, ti gbēeǹ kaa ti nóó sii ti-Nimbɔtiu. Ti pée sòoǹ min ní ti làá ŋá kí wɔ́b́ bin kíǹee kí já nì see ní. Ti bɔ́ntí ti-pɔbilin kí sòoǹ tinyimɔmbɔti ŋma ní.

¹⁴An pu ní bi dū ibaamɔn ki ŋá ŋkpaŋkpamboon ní taa ŋūǹ kí bà deedee laŋki. Di sá yii ibaamɔn kaa ti bí kubɔsoondiin, ní kí sòoǹ tibɔti deedeeyee kaa ti bí ku-ni.

¹⁵Tiŋman, ibaamɔn wáŋkì, ní un là kí nīn yú deedeeyee, bi fúkuĺ-u. Ti-Dindaan wál̀ tíǹ kɔkɔ. U ká yii ibaamɔn kpátam kaa sá tiwammɔntiil.

¹⁶U dáań ki ká yii báà uniseen kpá, an ŋá-u bitii yii ubɔ kaa pée bíi ŋáań tiba. An pu ní u lēē yii úǹ u-ba làá tɔ̄ u-tundi, u-deedeeu làá tīī-u mpɔn ú ŋá míǹ.

¹⁷U dū deedee ki pēeǹ kii dijanjabɔkutilee, ki dū difiil ki cíkiǹ kii kijanjafuuliiyee. U dū ipɔntoon bɔkutil ki pēeǹ, ní ki dū ipoompoon ki bīiǹ kii dibɔkutipaaŋkaalee[142].

¹⁸U làá téeǹ báà ŋma tin u máaǹee. U-ŋuul sá ki tīī u-nannanliibi ní, ní ditafadaaldi sá ki tīī bin kaa là u-bɔtee, ki kpáaǹ gba ntimu mun nnyim māntìi túee.

¹⁹Niinee, binib làá dāá fàŋkì ti-Dindaan yindi doooo ŋwìiń jeetilaŋki, ní kí dāá fàŋkì u-nyooti doooo ŋwìiń nyalaŋki. Di sá yii ti-Dindaan làá dāá dāan̄ kii mbun ŋun nyim pùub̀ mpɔn, kubuŋkpaaŋŋu téekí-mèe ní.

²⁰Ti-Dindaan làá dāan̄ Siiyɔn tiŋkin, kí fīī Isirayeel nibul poon binib bin di fá bi-kpitiiyee[143]. Ti-Dindaan di lī míǹ.

²¹Ní ti-Dindaan kútì ki lī yii: «Mpèé ŋun làá nīn bí man nì bi kansikinee sèé: <M-Fam bí ni-pu, m-nyɔɔbuŋŋi kā ni-nyɔkɔn. Ŋi làá nīn sá ki tīī ni nì ni-biyaamu nì ni-naantiibi ní kí yòon̄ kɔŋkɔnnee kí nīn cáa cá jaanjaan. M kpá kí fàtīí fōō-dì.> Man ni-Dindaan di lī míǹ.»