Read Ntcham Esaïe 6 Bible Online

Esaïe 6 - Ntcham bible

Esaïe 6

¹Dibindi din ubɔti Oosiyasi kpíìyee, an nìn lēē ki dàkā-mi. M nìn ká ti-Dindaan kā dibeejafɔŋfɔkɔl diba pu. U-bɔkutil gbeeŋgbeeŋyi nìn gbí kunimbɔtidii kɔkɔ.

²Seerafiimbi nìn yú u-yilpu ki cáá ifeen iluu iluu. Seerafiim kamaa feeŋyi ili nìn bīī u-nimbiin, ní ili bīī u-wunti pu ní u cáá ili in kíǹee ki ŋàaǹ.

³Bi nìn bí ki kūuntí ki lì tɔb yii: «Circir, circir, circir! Ti-Dindaan Mpɔŋkɔdaan sá circirdaan! U-nyooti gbí kitiŋ kɔkɔ[12]!»

⁴Bi bíi kūuntí mimmee ní kunimbɔtidii punyɔmmu cīŋkì doooo mu-nyeel, ní nnyiim yíkì ki gbí kunimbɔtidiin[13].

⁵Niinee ní m lī yii: «Mbusu kɔ́-mi! M-bɔti dóò ní nee, kun puee tijɔkɔndi nyɔɔbuŋŋi ŋma di nyēē m-nyɔkɔn, ní m kóò binib bin nyɔmmun tijɔkɔndi nyɔɔbuŋŋi nyēēyee kansikin. Nì míǹ kɔkɔee, m-nimbiliŋ baasii ká Ubɔti, ti-Dindaan Mpɔŋkɔdaan.»

⁶Niinee ní seerafiimbee ubɔ dū kubabiku ki bábiń dimɔsiŋkɔndi diba nsaraafan pu ní ki ŋàan̄ ki nín dòoń m-cee.

⁷U bāań ki dū dimɔsiŋkɔndee ki gbēē m-nyunculiŋ ní ki bí-mi yii: «Dimɔsiŋkɔndi nín gbēē a-nyunculiŋ nee, bi pítì a-yìntitam, ki dū a-kpitii ki pú-si.»

⁸Míǹ boonee ní m gbìl̄ ti-Dindaan bālifì yii: «Ŋma ní m làá tɔ̄ ní? Ŋma làá nīn sá ti-bɔnaatiliu?» Ní m kíí yii: «M sèé, tɔ̄-mi!»

⁹Ní u bí yii: «Cù kí tùkù dinibul nee yii: <Ni làá pīlifì kí pīlifì, ama naa làá gbìl̄ taapu. Ni làá kpèè kí kpèè, ama naa làá wāl̀ tiba.>

¹⁰Yàntī binib gbanti pɔbiliŋ ń tìlifì, bi-tafaliŋ ń kpáá ní bi-nimbiliŋ ń ŋúb́. Yàntī bí taa ti wāl̀, kí taa ti gbìl̄, kí taa ti béé tibɔti taapu. Án nín làá ŋá pu bí taa kpántí bi-bimbim kí fàtīí gítiń m-cee ḿ cáaǹ-bee[14].»

¹¹Niinee ní m bālifì yii: «Ti-Dindaan, án làá nīn bí míǹ kí tin sāā ŋyunti ŋulɔŋu?» Ní u kíí-mi yii: «Kí tin sāā ŋyunti ŋun ní bi làá nàan̄ ntimu, binib ń taa ti nín̄ kóò mu-poon, adiin ń nīn kíǹ ki yú fám ní tikpaatan ń kpántí kii kuteeuee.»

¹²Iiin, ti-Dindaan làá jà binib kí nyāntí kitiŋ nee poon kí cùnnì ndan, ní tikpaatan dāa kíǹ ki dɔ̄ fám.

¹³Báà binib saalaa poon ubaanti di yaa kíǹ kitiŋ nee ni, ŋŋmi làá wà-u kii busubu bun bi gāā ki lúkúee ní. Kun làá dāá pée kíńee di sá disuyil, ama disuyil gbanti di làá dāá nīn sá circir wambooliŋu.