Read Ntcham Esaïe 60 Bible Online

Esaïe 60 - Ntcham bible

Esaïe 60

¹Jeerusaleem, yīkì kí ŋmíntí, di sá yii a-walfiŋu bāań, ti-Dindaan nyooti nyáń a-pu kii ŋwìińee.

²Tiŋman, kpèè dibɔmbɔndi bīī kitiŋ pu ní kunyeeu mɔ́ ki bīiǹ anibul pu. Ama sii puee, ti-Dindaan làá nyā kii ŋwìińee ní u-nyooti ń ŋmíntí-si.

³Atimbun làá còom̀ kí dāan̄ a-walfiŋu cee, ní bibɔtiibi ń dāá dāan̄ ŋwalifi ŋun nyáń a-puee cee.

⁴Yáatí a-yil kí kpèè kí màntīí tū, bi-kɔkɔ kóoǹ ki kpáfì ki dòoń a-cee. A-jipɔmbi nyánní ndandati ki dòoń, binib ŋúbiń a-bisalib ki cāabìń.

⁵A làá dāá ká míǹ ní án mɔ̄ɔkiǹ-si tikpil, a-pɔbil làá dāá pīil̀ ní kí sɔ̀ŋkì. Di sá yii tiŋkub gaajati làá dāá kpìntìń kí dāan̄ a-cee, ní atimbun gaajawanti ń dāá kóoǹ kí dāan̄ a-cee.

⁶Igutaamu tikpil làá dāá kóoǹní kí léeń a-pu, án dāa sá Madiyan nì Eeyifa timmu gutaamui. I-kɔkɔ làá dāá nyānní Sabaa tiŋkin ní kí dāan̄. I làá dāá nīn tú sindaariya nì talaalutuukaa, ní kí dāá nīn gà ilan ki nyɔ́ŋkí ti-Dindaan.

⁷Keedaar tiŋki piii nì ki-ŋoobui làá dāá kóoǹní kí kpāfì a-nimbiin. A dāa ŋūǹ kí dū Neebayɔti tiŋki pijaai kí ŋá a nín là puee. Bi làá dāá cáá-i kí jɔ̄m̀ m-saraafaŋŋu pu, ní ḿ dāá fōō saraabi bin a làá dū-i kí ŋée. M làá dāá nyāantì m-diiku ní kí tīī-ku tinyool.

⁸Bilab di bínní lapu nee ní? Bi ŋàaǹ kii atagbanee, a lì kii abeenanjil di ŋàaǹ ki cá ŋi-diiŋŋi watil púee.

⁹Ntimu mun nnyim māntìi túee máká m-pu. Taarsiisi tiŋki meelab di līiń nyɔkɔpu ki cāabìń a-jipɔmbi bin bíń ndandatee, nì bi-nimbiliŋ nì bi-sindaariyau. Bi dòoń kí tīī ti-Dindaan a-Nimbɔtiu tinyool, kí tīī Isirayeel Circir Nimbɔtiu tinyool, di sá yii úǹ di tīī-si jilma gbanti.

¹⁰Binicambi di làá fàtīí mā a-guŋŋi ní bi-bɔtiibi ń dāá nīn bí a-tundin. Di sá yii m-ŋuul poonee m nìn dáaĺ a-tafal, ama m-niti poonee, m làá dàkà-si m-saasɔl.

¹¹A-punyɔmmu dāa pée wāā ní. Mu làá dāá nīn pée wāā ní ŋwiimpu nì kunyeeu. Niinee ní bí dāá cáań atimbun ŋin kíǹee gaajati kí kɔ́ǹní[144], ŋi-bɔtiibi dāa pá tɔb pu kí kɔ́nní.

¹²Atimbun nì abee ŋin làá dāá yíí kí taa nín̄ bí a-tundinee làá dāá wāŋkì. Atimbun gbanti làá dāá nàan̄ ní pílpil.

¹³Leebanɔn tiŋki nyooti làá dāá dāan̄ a-cee, ki kpáaǹ idɔpiŋkaa kɔkɔ dicilpu. I làá yàntī m-circir kɔŋkooŋŋu ń nīn ŋān̄. Míǹ ní m làá ŋá kí tīī laakin m-taaŋi yūlifée tinyool.

¹⁴Binib bin nìn ŋúb́-si ki sàantée jipɔmbi làá dāá dāan̄ kí sìntīǹ bi-ba taapu kí tīī-si. Bin kɔkɔ nìn kpèé-si fámee làá dāá gbàan̄ a-taaŋi taapu. Bi làá dāá yíiń-si yii <Ti-Dindaan tiŋki>, <Isirayeel Circir Nimbɔtiu jool Siiyɔn!>

¹⁵Bi nìn dū-si ki fá, kaa nìn là a-bɔti, ní báà ubɔ kaa nìn gíti dòoń a-cee. Kɔŋkɔnnee m làá nyāantì-si ní binib ń nīn fàal̀ a-pu kí nīn cá abin abin.

¹⁶Atimbun ŋin kíǹee di làá dāá kpíiǹ-si ní á dāá jī bibɔtiibi gaajawanti. Niin ní a làá dāá béé yii man a-Dindaan di sá a-Fiiliu, un dá-si ki líìyee di sá Jaakɔb Nimbɔtiu Mpɔŋkɔdaan.

¹⁷An nín bàà sá ḿ cáań tasa kútee, sindaariya ní m làá cáań. An nín bàà sá ḿ cáań tikútee, animbil kúti ní m làá cáań. An nín bàà sá ḿ cáań idɔee, tasa kúti ní m làá cáań. An nín bàà sá ḿ cáań ataŋkpeeyee, tikúti ní m làá cáań. Man puee, ŋgbansɔŋfi di làá nīn kpòotī-ni ní deedee ń nīn sá ni-kpiliu.

¹⁸Baa làá ti gbìl̄ bi sòoǹ tipɔmbɔti pu a-tiŋkin, kaa làá ti gbìl̄ bi sòoǹ dinàandi àá dibiildi pu a-tiŋki kpaanyɔmmu poon. A làá dāá nīn yíì a-guŋŋi yii <Difiil>, kí dāá nīn yíì a-punyɔmmu yii <Inyɔŋki>.

¹⁹An kaa ti làá nīn sá ŋwìiń di làá nīn ŋmíntí-si ŋwiimpu, àá uŋmal kunyeeu. Man ni-Dindaan a-Nimbɔtiu di làá nīn sá-si ŋwalifi kí nīn cá jaanjaan, ní kí nīn ŋmíntí-si nì m-walifiŋu kɔkɔ.

²⁰Kí yòon̄ kí nīn cée, a-wìiŋ́ŋu kaa làá ti jēetí, ní a-ŋmaliu kaa làá ti wāŋkì. Di sá yii man a-Dindaan di làá nīn kíǹ ki sá-si ŋwalifi kí nīn cá jaanjaan[145]. Iwiin in a dūu kāl̀ dikpoolee làá kúntí.

²¹A-nibul kɔkɔ làá dāá nīn sá deedeedambi, bi làá dāá fōō kitiŋ difakal kí nīn cá jaanjaan. M dū m-ŋalii ki máń-bi bí lēē m-nyooti kí dàkà. Bi sá kii busubu bun man m-ba cóoǹee ní.

²²Ni-kansikin un pée sá kiwaayee làá dāá màal̀ binib kutuku, ní un kaa bí tibanee ń dāá kpántí ditimbundi din pɔ̄ɔ̄yee baa. Ŋyunti yaa láa bāańee, man ni-Dindaan làá dāá yàntī tibɔti gbanti ń jītí malaa malaa.