Read Ntcham Esaïe 61 Bible Online

Esaïe 61 - Ntcham bible

Esaïe 61

¹Ti-Dindaan Unimbɔti Fam bí m-pu[146]. Tiŋman, u lēē-mi ḿ sòoǹ tibɔmɔntiil kí tīī biwɔfib. U túnní-mi ḿ cáaǹ bin pɔbiliŋ bíil̀ee, kí bāakì kí tùkù bin bi cúú kuyuŋuee yii bi làá líí-bi, kí tùkù bisarkadambi yii bi làá ká dibatɔl.

²U túnní-mi ḿ bāakì kí tùkù binib yii: «Dibindi din ní ti-Dindaan làá sɔ̄ bi-saayee sèé! Ŋwiin ŋun ní ti-Dindaan làá tɔ̀ u-nannanliibi ipɔntoonee sèé! U túnní-mi ḿ sɔ̀ŋkì bin kā dikpoolee pɔbil[147].

³Siiyɔn pu ní bi kā dikpool. M làá pítí ŋfantam min bi dūu pùkū bi-yilee kí dū ŋŋaamɔnti kí fìn̄ bi-yiliŋ. M làá cúú kpɔsata kí pèetī-bi ní kí dū ŋkpam min sɔ́fèe kí ŋmìtī-bi. M làá dū dijiŋaabɔkutil kí pèen̄-bi ní dí fōō diwuŋyɔtil paaŋŋu. Niinee bi làá dāá yíiń-bi yii isufi in tìì Unimbɔti tinyoolee, bukpaa bun dàkà ti-Dindaan nyootee.

⁴Bi làá dāá fàtīí mā dooooyee guŋkatiŋ, bi làá dāá fàtīí mā dooooyee digbuŋkatiŋ. Bi làá dāá fàtīí náań ntimu mun bi nìn nāaǹee, ntimu mun bi nìn nāaǹ abin abinee.

⁵Binicambi làá dāá dāan̄ kí nīn kpàá ni-piii nì ni-ŋoobui. Laaba nib làá dāá dāan̄ kí nīn kù ni-sati nì ni-fiinyi kpaaŋŋi.

⁶Nimbee, bi làá dāá yíiń-ni yii <Ti-Dindaan saraaŋaliibi>. Bi làá dāá nīn yíì-ni yii <Ti-Nimbɔtiu tɔntɔnliibi>. Ni làá dāá jī atimbun nib gaajawanti pu, ní kí dāá nīn gà ni-biŋŋi bi-gaajati pu.

⁷«An nín bàà sá icoo ń cúú-nee, ni làá dāá fōō jilma mili pu. An nín bàà sá bí sìì-ni puee, ni làá nīn fàal̀ dijandi din ni fōōyee pu. Di sá yii ni làá dāá fōō ni-tiŋkin difakal mili pu, ní kí dāá nīn bí ifaal in kaa cáá dikúntilee poon.

⁸Di sá yii man ni-Dindaan néeń ibaamɔn bɔti ní, m ná bunaayubu nì tin kaa bí deedeeyee. M làá dāá pà-ni ni-paati nín pée sá puee ní deedee, m làá dāá yóoń man nì ni kansikin mpèé ŋun làá nīn bí ki cá jaanjaanee.»

⁹Ni-naantiibi làá dāá nyā diyindi atimbun ŋin kíǹee kɔkɔ poon, binib làá dāá béé-bi anibul kansikin. Bin kɔkɔ di yaa láa pée ká-bee làá dāá béé yii bíǹ di sá dinibul din boon ti-Dindaan bīiǹee.

¹⁰An mɔ̄ǹ-mi tikpil m-Dindaan pu, m bí dipɔɔpindin m-Nimbɔtiu pu. Di sá yii u dū difiil ki pēeǹ-mi kii dibɔkutilee, ní ki dū u-deedeeu ki bīiǹ m-pu kii dibɔkutipaaŋkaalee kii unimpucaan cal un di dū jiŋaal ŋaabuŋu ki fìn̄ u-yilee, a lì kii unimpucaan di dū abeedimbil ki nyáantì u-bee[148].

¹¹Tiŋman, kii kitiŋ nín yàntī tiwan ń pā kí nyā pu, ní bukpaa ń yàntī ŋwambool ń nyā puee, míǹ ní ti-Dindaan làá yàntī deedee nì inyɔŋki ń pā kí nyā atimbun kɔkɔ nimbiin.