Read Ntcham Esaïe 62 Bible Online

Esaïe 62 - Ntcham bible

Esaïe 62

¹Dineendi din m cáá sii Jeerusaleem puee, maa làá nīn kā ki ŋmí. Dineendi din m cáá sii Siiyɔn puee, maa làá nīn kā ki jòon̄ iŋal, kí nīn cí ŋyunti ŋun ní a-baamɔŋyi làá dāá nyā kí páań kii ŋwalifee, ní a-fiil ń dāá ŋmíntí kii ŋŋminaapoolee.

²Atimbun làá dāá ká a-deedeeu, ní bibɔtiibi kɔkɔ ń dāá ká a-nyooti. Bi làá dāá páań-si diyindi[149] din ní a-Dindaan làá dāá lēē bí nīn yíì-see.

³A làá dāá nīn sá kii kibeefuulii kinyaaŋŋi a-Dindaan ŋaan, ní kí nīn sá ubɔti ŋaayilkaaŋu a-Nimbɔtiu ŋaan.

⁴Baa làá dāá nīn gíti yíì-si yii <Kitiŋ kin bi dūu fée>, baa làá dāá gíti yíiń a-tiŋki yii <Kitiŋ kin dɔ̄ fámee>. Ama bi làá dāá nīn yíì-si yii <Kitiŋ kin bɔti fáatiǹ-mee>, ní kí dāá nīn yíì a-tiŋki yii <Unimpu un mɔ́ǹ ticamɔntiilee>. Di sá yii a-bɔti làá dāá nīn fáatiǹ a-Dindaan, ní a-tiŋki ń dāá nīn sá ucamɔnli.

⁵Kii unaacimpɔɔn nín cāab̀ usapɔɔn puee, míǹ mbaantiim ní bin làá dāá fàtīí mā-see làá dāá nīn sá a-cal. Kii unimpucaan bɔti nín mɔ̄ǹ u-cal puee, míǹ ní a-bɔti làá dāá nīn mɔ̄ǹ a-Nimbɔtiu.

⁶Jeerusaleem, m kāaǹ biciitiliibi a-guŋŋi pu. An yaa sá ŋwiimpuɔɔɔ, kunyeeuɔɔɔ, baa pée máaǹ kí nīn kā ki ŋmí. «Nimbi bin di téetí ti-Dindaan Jeerusaleem puee, ní taa ŋùŋfì.

⁷Ní taa pée yàntī ú ŋùŋfì kí tin sāā ŋyunti ŋun u làá dāá fàtīí yòon̄ Jeerusaleem tiŋki yilpu ní duulinya kɔkɔ ń nīn nyɔ́ŋkí-kèe.»

⁸Ti-Dindaan pūtì ki pōoǹ yii: «Man ni-Dindaan un sá Mpɔŋkɔdaanee nín lī puee sɔ̀. Dalba dalba maa làá ti dū a-kpaajinti kí tīī a-nannanliibi bí jī, dalba dalba binicambi kaa làá ti nyɔ̀ a-damam min a gīī digìńdi ki kée.

⁹Ama bin cáń tikpaajinee di làá dāá jī-tì ní kí dāá nyɔ̄ŋkì man ni-Dindaan. Bin di yaa láa kītì fiinyi subiliŋee di làá dāá nyɔ̀ ŋi-damam m-Circir kɔŋkooŋŋu cindin.»

¹⁰Jeerusaleem yab, nyāmaan, ní nyāmaan kitiŋin malaa. Ní cátímaan nsan m-nibul ń dī. Ní gbīŋkìmaan abɔbil didandi pu kí kóom̀maan ataŋkpee kí fá ní kí cóoḿmaan kiŋaabiki anibul nimbiin.

¹¹Tibɔti tin ti-Dindaan sòon̄ bi tin gbìl̄-tì doooo kitiŋ kuntilaŋkee sèé: «Ní tùkùmaan Siiyɔn tiŋki yii: <Kpèè a-Fiiliu di dòońee. Kpèè úǹ di dòoń ki ŋúbiń u-paatee, u-tundi paatii di līiń u-nyɔkɔpuee[150].>

¹²Bi làá dāá yíiń a-nib yii <Dinibul din di bí circiree>, <binib bin ní ti-Dindaan dá ki líìyee>. Baa ti làá yíiń-si yii <kitiŋ kin bi dūu fée>, bi làá dāá nīn kíǹ ki yíì-si yii <Kitinneeŋkaai ní>».