Read Ntcham Esaïe 63 Bible Online

Esaïe 63 - Ntcham bible

Esaïe 63

¹Ŋma di nyánní Eedoom tiŋkin, Bɔsiraa, ki-tiŋyilin ní? Udaan wampeeŋkaati jōotì mmam. U pēē tiwampeeŋkaal tinyaandi ki còom̄ diyil gáań ki máká u-pɔŋŋu pu. Ti-Dindaan bí yii: «An sá man di sòoǹ binib bɔti nì deedee, m cáá mpɔn kí fīī-ni.»

²«Ba pu ní a-bɔkutil jōotì mmam, ní a-wampeeŋkaati náań nì unil un tà ki fɔ́bití fiinyi subiliŋ kubɔbikunee?»

³«Man baba di tāā ki fɔ́bitì fiinyi subilŋ kubɔbikun. Anibul kansikin, báà uniseen kaa nìn kútì m-pu. M tàn̄ ki mátì-bi m-ŋuul poon, ní ki nàn̄-bi m-bum poon. Bi-fatikuu yāaǹ m-bɔkutiŋ pu, ní m-wampeeŋkaati kɔkɔ mántì[151].

⁴Di sá yii m lēē m-pɔbilin kí tɔ̀ ipɔntoon ní. Ŋyunti bāań ḿ fīī m-nibul kí líí.

⁵M nìn kpēē ama kaa ká ubɔ ń tūtuǹ-mi. An nìn ŋá-mi bitii. Ubɔ kaa nìn bí kí tíkiń-mi. Niinee ní m-ŋal pɔŋŋu tútuǹ-mi, ní m-ŋuukpaandi tīī-mi mpɔn.

⁶M-ŋuul poonee m nàn̄ anibul kunaau, m nyūntì-bi m-bum kii ndaamee bi gbí, ní ki yāntì bi-fatikuu pùub̄ kitiŋ.»

⁷M làá téetí ti-Dindaan ŋanti nì tin pu ti máaǹ kí nyɔ̄ŋkì-uee pu: tin kɔkɔ ti-Dindaan ŋá ki tīī-tee, tiŋaŋkpaandi tin u ŋá ki tīī Isirayeel nibulee, tin kɔkɔ u ŋá u-neendin, nì u-laŋŋaŋfitiikuee pu.

⁸U nìn lī yii: «Bi lafun sá m-nibul ní, bi sá m-jipɔmbi bin kaa làá mɔ̄ntì-mee ní.» U nìn kpántì bi-fiiliu.

⁹Bi-nimbinaamandi kamaa poonee, an kaa nìn sá ntuun ŋubɔ di fīī-bi, ama ti-Dindaan u-ba di nìn fīī-bi. U-neendi nì u-saasɔl poonee, u nìn fīī-bi ki líì. U nìn yōoǹ-bi ki túǹ kii iyunti in nìn jítèe poonee.

¹⁰Ama bíǹ nìn jáń nì u, ní ki nìn kɔ́ǹ u-Circir Fam kunimbaau. Niinee ní ti-Dindaan dūu kpántì bi-nannanliu, ní ki kíĺ ki bíi jáà nì bi.

¹¹Niinee ní u-nibul téetì iyunti in jítèe pu, iyunti in Mooyiisi nìn bí[152] di-ceeyee pu ki lī yii: «Un di nìn nyántì u-picaŋkpuŋku nì u-pikpaaliu dimɔɔlinee bí la? Un di nìn yāntì u-Circir Fam bí bi-kansikinee bí la ní?

¹²Úǹ di nìn tāntì u-ŋampɔfiŋu ki cúú Mooyiisi ŋaŋgiil ki tíkiǹ-u. Úǹ di nìn cúú nnyim ki yākatì mili bi-nimbiin, ní ki nyáń diyindi kí nīn cá jaanjaan.

¹³U nìn yāntì bi cōom̀ tiŋku un nyóòyee poon ki dūtì kii utaamu un sáń kuteeunee, kaa nìn gbéetì ki lítì.

¹⁴Bi nìn náań nì tiwaŋkuti tin sìntī ditantakalinee ní. Ti-Dindaan Fam nìn kpòotī-bi ki cáǹ diŋuŋfil laŋki ní.» Míǹ ní ti-Dindaan, a nìn kpōotì a-nibul ki nyáń diyiŋkpaandi.

¹⁵Kpèeń doooo yilpu, circir paaŋŋu nì laakin cáá kunyaaŋŋu a kóòyee. Kpèè tin bíi jītí ti-puee. A-neendi din nìn fòol̄ ti-pu lìblibee bí la? A-pɔŋŋuee bí la? A-poommɔŋŋu nì a-laŋŋaŋfitiikuee bí la?

¹⁶Di sá yii sii di sá ti-Baa. Abraam kaa nyí timbi, Jaakɔb mun kaa nyí-ti. Sii ti-Dindaan di sá ti-Baa, sii ní bi yíì doooo jaanjaan yii <Ti-Fiiliu>.

¹⁷Ti-Dindaan, ba ŋá ní a yāntì ti wáŋkì ki fá a-saŋyi, ki yāntì ti-pɔbiliŋ tīlifì taa ti fàŋkí-si míǹ? Dineendi din a cáá timbi a-tɔntɔnliibi bin sá a-nibulee puee, fàtīí gítiń.

¹⁸Timbi a-circir nibul, taa kpáàa kāl̀ kitiŋ kin a tīī-tee ni ki yúntì. Ti-nannanliibi nàn̄ a-circir paaŋŋu dúsi dusi.

¹⁹An yúntì tikpil, a nín kaa ti jíń ti-pu dibeel, ní baa ti yíì-ti nì a-yindee. Áà! A yaa bàà cúú kutagbɔŋu ki dáaĺ ki cátì ki kpákatìń, ajoon bàà làá cìŋkì a-nimbiin ní!