Read Ntcham Esaïe 64 Bible Online

Esaïe 64 - Ntcham bible

Esaïe 64

¹A bàà làá nīn bí kii ŋŋmi ŋun wù kimɔgbaai àá ki yàntī nnyim nùuǹee ní. Niinee a bàà làá dàkà a-nannanliibi dinimbɔticil din ní a sée. A-nimbiinee, atimbun bàà làá nīn jìkì

²a yaa láa ŋá titumbilindi tin baa láá ká ki kée. Tiŋman, a làá kpákatiń ní ajoon ń cìŋkì a-nimbiin.

³Dalba dalba ubɔ kaa láá gbìl̄ bi sòon̄, àá ditafal gbìl̄, àá dinimbil ká yii sii boonee, unimbɔti ubɔ mun gíti ŋá tin a ŋá nee ki tīī un máká u-puee[153].

⁴A túŋkí unil un tūǹ deedee tuuŋŋi nì mmɔnee, nì binib bin téetí a-pu ki nóó a-saŋŋuee. Ti-yìntitam puee, a gíí diŋuul. Ama isan gbanti pu ní ti làá ká difiil.

⁵Ti-kɔkɔ nìn sá kii unil un kɔ́ tijɔkɔndee, ní ti-tummɔntiŋ kɔkɔ cáá titantan kii ticaliŋkpun tin bi dūu pítì fatikuee. Ti-kɔkɔ pée kūń kii tifaalee, ní ti-kpitii yòontí-ti ki féeń kii kubuŋuee.

⁶Báà ubɔ kaa ti pée yíì a-yindi, ubɔ kaa fìntī kí dū u-ba kí nákáǹ-si. Di sá yii a fātì a-boon ki tīī-ti, ní ki dū-ti ki líiǹ ti-yìntitam.

⁷Nì míǹ kɔkɔee, ti-Dindaan, sii di sá ti-Baa. Timbi sá kuyɔkɔu, ní a sá uyɔɔmaati. Sii di máń timbi kɔkɔ nì a-ŋalii[154].

⁸Ti-Dindaan, taa gíí diŋuul kí jītí mara pu. Taa nín̄ téetí ti-kpitii pu kí nīn cá jaanjaan. Ti gbàam̄-si, fàtīí kpèè-ti, ti-kɔkɔ sá a-nibul ní.

⁹Báà ubɔ kaa ti kóò a-circir timmun, Siiyɔn jool kpántì kuteeu, Jeerusaleem tiŋki kpántì adigbun ŋma.

¹⁰Ti-circir Nimbɔtidiiku kun nìn ŋān̄, ti-baabi nìn gà ilan ku-poon ki nyɔ́ŋkí-see, bi sēē-ku ŋŋmi. Tin kɔkɔ ti nìn néeńee kpántì adigbun ŋma.

¹¹Ti-Dindaan, tin kɔkɔ pée jítì nee kaa sòoǹ nì si tibaaa? Mimmee a làá nīn kā ki ŋmí kí sìntīǹ-ti taapu án gíti lákatí mara puɔɔɔ?