Read Ntcham Esaïe 65 Bible Online

Esaïe 65 - Ntcham bible

Esaïe 65

¹M yāntì bin kaa nìn bàlifī m-puee kíǹ ki bàlifī m-pu, m yāntì bin kaa nìn nyàab̀-mee ká-mi. Ditimbundi din kaa nìn yíì m-yindee, m kíí-dì yii: «M sèé, m sèé!»

²M tāntì m-ŋalii iwiin kɔkɔ ki túĺ dinibul din sá pɔɔgaatee watil, dinibul din nìn nóó nsan ŋun kaa ŋān̄, ní ki ŋáań tin dì pée lèe.

³An sá dinibul din di gbítí m-ŋuul kaa gbèentée ní. Bi ŋáań saraabi akpaanni, ki tùutī talaalub brikisib pu,

⁴ki dɔ̀ akaakulin[155], ki dɔ̀ titaŋkpanaakɔti poon, ki ŋmóò tigbeetinan ní tinan tin kɔ́ tijɔkɔndee kā bi-kumbooŋi poon.

⁵Bi lì yii: «Nín̄ nyí nì a-ba, taa sútí kí pìl̄-mi, an yaa sá fám a làá túń a-kpuulool, di sá m dū m-ba ki sú Unimbɔti ní.» M yaa kpēē ni-ŋáaǹtamee, m-ŋuul fòol̄ ní lìblib ní ki fòol̄ kaa gbèentí, ní ki wù áli ŋwimmɔn.

⁶Ama an ŋmàn̄ ki dɔ̄ m-nimbiin. Maa làá nīn kā ki ŋmí, see m téeǹ-bi bi-tuuŋŋi paati.

⁷Man ni-Dindaan di lī yii: m làá téeǹ nimbi ni-ba kpitii nì ni-baabi yai dicilpu. Bíǹ di nìn tùutī talaalub ajoon pu, ní ki nìn sìí-mi ŋgbantamu pu. M làá téeǹ-bi an nín máaǹ puee, m làá ŋmàntī bi nín nìn ŋáaǹ puee ní kí dāá téeǹ-bi míǹ deedee.

⁸Ti-Dindaan di lī yii: «Binib yaa ká fiinyi subiliŋ disakal bīń tiŋanee, bi lì yii: <Taa bīil̀-dì, di làá tīī ndamɔntiim.> Míǹ mbaantiim ní m làá ŋá m-tɔntɔnliibi pu. Maa làá nàan̄ bi-kɔkɔ.

⁹M làá yàntī nnibool ŋubɔ ń nyā Jaakɔb maaliŋun. M làá yàntī Juuda ń jī m-jooŋŋi pu difakal. Bíǹ bin m lēēyee di làá nīn yì-ŋi, m-tɔntɔnliibi di làá nīn kóò ŋi-pu.

¹⁰M-nibul nì bin làá dāá fàtī bi-ba kí túliń-mee ceeyee, Saarɔn tantakal di làá dāá kpántí kupikpaapɔɔu ki tīī bi-piii ní Akɔɔr tantakal[156] ń dāá kpántí kunaabakau ki tīī bi-naai.

¹¹«Ama nimbi bin dū man ni-Dindaan ki fée, nimbi bin di súntì m-circir jool puee, ni tòotī diwaal Gaadi, ki ŋmàlintí idafi ki féeń diwaal Meenii.

¹²Too, m làá dū-ni kí líiǹ ni-nannanliibi. Ni-kɔkɔ làá dāá gbàan̄ kitiŋ ní bí làntì-ni. Di sá yii m yíiń ní naa kíí, m sòon̄ ní naa pílifì. Ni ŋá tin kaa ŋān̄ee m-cee, ní ki lēē kí ŋá tin di kaa fáatiǹ-mee!

¹³An puee man ni-Dindaan Unimbɔti nín lī puee sɔ̀. Ní kpèè, m-tɔntɔnliibi làá dāá ká kí jī ama ní ŋkùm ń dāá cúú nimbi. M-tɔntɔnliibi làá dāá ká kí nyɔ̀, ama ní nnyinnyoo ń dāá kpɔ̀-ni. M-tɔntɔnliibi làá dāá nīn fàal̀, ama ní icoo ń dāá cúú-ni.

¹⁴M-tɔntɔnliibi làá dāá nīn fàal̀ ní bi-pɔbiliŋ ń nīn pīiǹ, ama nimbi làá dāá nīn sūǹ ki yáliŋkí ní ni-pɔbiliŋ ń nīn bí kunimbaaun.

¹⁵Bin m lēēyee, bi làá dāá nīn cáá ni-yiŋŋi ní ki tòó mbusu ki lì yii: <Ti-Dindaan Unimbɔti ń yàntī á kpú kii ŋmɔŋŋmɔkɔ àá waaniiyee>. Ama an yaa sá m-tɔntɔnliibee, diyindi diba ní bi làá nīn cáa yíì-bi.

¹⁶Un kamaa yaa láa là kí mèè kí bìin̄ ubɔ pu kitiŋ gbanti puee, udaan dāa dù ibaamɔn Nimbɔtiu yindi ní kí mèè kí bìin̄. Un kamaa yaa láa là kí pùtī kí pòon̄ kitiŋ gbanti puee, udaan dāa dù ibaamɔn Nimbɔtiu yindi ní kí pùtī kí pòon̄.» Di sá yii binib làá dāá súntí animbinaaman ŋin jítèe pu, ŋi làá dāá wāŋkì m-nimbiin.

¹⁷Di sá yii m làá fàtīí náań kutagbɔmpɔŋu nì kitimpɔŋ[157]. Ubɔ kaa dāa gíti téetí tin jítèe pu, unil kaa dāa gíti dàkafī tíǹ pu gba.

¹⁸Ama án nīn mɔ̄ǹ-ni ní nīn fàal̀ kaa gbèentí tin m làá fàtīí náańee pu. M làá náań Jeerusaleem tiŋki kí nīn pée bí ifaal poon, ní ki-nib ń nīn bí dipɔɔpindi poon.

¹⁹Án làá mɔ̄ɔkiǹ-mi Jeerusaleem tiŋki pu ní ḿ nīn bí dipɔɔpindin ki fàal̀ m-nibul pu. Kí yòon̄ kí nīn cée, baa làá ti gbìl̄ nsiim pu, kaa làá ti gbìl̄ ibiil pu[158].

²⁰Baa làá ti ká mbipɔmu kaa yúntì ki kpíì, kaa làá ti ká utikpil kaa púĺ ki bál̀ ki kpíì. Un kaa pée yúntì pílpilee di sá un cáá abin dilaataal ki kpíìyee. Unil yaa kaa láá bàn̄ abin dilaataal ní ki kpíìyee, mimmee, bi tɔ́-u mbusu dee.

²¹Bi làá dāá mā adiin ní kí ká-ŋi kí kɔ́, bi làá dāá cóoń fiinyi sufii ní kí dāá ká i-biliŋ kí ŋmɔ́.

²²Baa làá ti mā adiin kí yóoń biba ń dāá kɔ́, kaa làá ti cóoń fiinyi sufii biba ń dāá kìtī abil kí ŋmɔ́. Di sá yii m-nibul làá dāá yúntí kii isufee. Bin m lútèe làá dāá jī ditundi din bi túńee pu[159].

²³Baa làá ti gīī digìńdi fám, kaa làá ti màal̀ mbiyaamu kí tīī ŋkúm. Di sá yii bíǹ di dāa sá dinibul din boon ti-Dindaan bīiǹee, bíǹ nì bi-biyaamu.

²⁴Baa láá yíiń-mi ní ḿ kíí-bi. Bi dāa bíi sòoǹ kinyɔkɔ kaa láá ŋmíl̀ ní ḿ dāá gbìl̄ kí tīiǹ-bi.

²⁵Sinsiŋku nì kipibiki di dāa kpáfí ki ŋmóò timool, gbikinti dāa ŋmóò timool kii unaa nín ŋmóò puee ní. Ukoobu làá dāá nīn jīǹ ntam ní. Tiweendi dāa gíti kpáaa, dinàandi mun dāa gíti kpá m-circir jool kɔkɔ pu. Ti-Dindaan di lī míǹ.