Read Ntcham Esaïe 66 Bible Online

Esaïe 66 - Ntcham bible

Esaïe 66

¹Ti-Dindaan nín lī puee sèé: «Yilpu di sá m-beejal ní kitiŋ sá m-taaŋi tɔkɔnlaŋki[160]. Kudii kulɔkɔ ní ni làá gíti mā-mi? Mpaan ŋulɔŋu pu ní m làá ŋmā kí ŋùŋfì?

²Nì m-ŋalii ní m dūu náań tin kɔkɔ bí nee. Man di yì tíǹ gbanti kɔkɔ[161], man ni-Dindaan di lī míǹ. Ama unil un m làá fàtīí kpèèyee di sá ufalaadaan un sīntiǹ u-ba taapuee, unil un di yaa gbìl̄ m-nyɔɔbundi, dì cáá-u tifaandi u jìkèe.

³«Unil làntī unaja kí ŋá saraa, ama ní kí fáá kí kpɔ̀ u-nijuti. Unil làntī upii, ama ní kí dū kibɔkɔ kí ŋá saraa. Unil cāabìń-mi tijimpin saraau, ní kí cáań ugbeeti fatikuu mun kí ŋá saraa. Unil tùutī talaalutuukaa kí ŋá-mi saraa, ama ní ki bí ki jáaḿ awaa. Binib gbanti lēē kí ŋá tin fáatiǹ bíǹ bi-bee, ní an mɔ̄ǹ-bi bí nīn tūǹ ntimbiil tuuŋŋi gbanti.

⁴Ma mun lēē kí dū-bi kí líiǹ bi-landɔkɔkpitii. M làá cáań dinyoondi kí tɔ̄ bi-pu. Di sá yii m yíiń ní báà ubɔ kaa kíí, m sòon̄ ní baa ubɔ kaa pílifì. Bi ŋá tin kaa ŋān̄ m-ceeyee, bi lēē kí ŋá tin kaa fáatiǹ-mee.»

⁵Pīlifìmaan ti-Dindaan nyɔɔbundi, nimbi bin fòol̄ u-nyɔɔbundi nì kufaaŋŋuee: Ni-nabiyaamu biba ná-ni, ní ki jìn̄-ni man pu. Bi sòoǹ ki bèel̄-ni yii: «Ti-Dindaan ń dàkà u-nyooti ní tí ká ni nín làá nīn fàal̄ puee!» Ama bíǹ ní icoo làá cúú gbòooo.

⁶Pīlifìmaan kuwoou kun nyánní kitiŋinee, kuwoou kun di nyánní kunimbɔtidiinee. An sá ti-Dindaan di bíi pà u-nannanliibi tipaal tin bi máaǹee.

⁷Jeerusaleem màl̄ kibiki ki dóò ní ki nín gbìl̄ imatiŋween pu, u màl̄ kibininjabiki ní kí nín gbìl̄ iween pu.

⁸Ŋma pée gbìl̄ an bɔti ki ká dalba? Ŋma di pée ká an wanti gbanti dalba? Bi ŋūǹ kí màal̀ kitiŋ ŋwimbaantaaa? Bi ŋūǹ kí màal̀ ditimbundi dicilpuɔɔɔ? Ama Siiyɔn úǹ nín ŋá puee dee. Waa láá kíĺ imatiŋween ní ki pūtì kpáàa dūu màl̄ u-jipɔmbi!

⁹Ti-Dindaan di bālifì dinyɔɔbundi nee yii: «Man yaa pú nsan unimpu ń cáá dipool iŋmal iwee, m làá pìin̄-u nsan ú taa màal̀aaa? Man di yaa yàntī unimpu màal̀, m làá gíti pìin̄ nsan kibiki ń taa nyānnáaa?»

¹⁰Nimbi bin di néeń Jeerusaleem tiŋkee, ni nì kì ń kpāfì kí fàal̀, ní nīn bí dipɔɔpindin ki-pu. Nimbi bin nìn kāl̀ dikpool ki súń ki-puee, ni nì kì ń kpāfì kí làntì.

¹¹Án nín làá ŋá pu ní ní ŋāam̀ ki-biil din tìì dipɔɔsɔŋkilee kí díkí, kii mbiyaamu nín ŋáaḿ mu-na biil din cáá mbiimee nì mmɔn puee.

¹²Di sá yii ti-Dindaan di lī yii: «M làá yàntī ŋgbansɔŋfi ń pùubìń kii mbunee kí dāan̄ kí kɔ́ ki-ni, kí yàntī atimbun nyooti ń fùntīń kii ŋkpin ŋun gbée kí dāan̄ ki-ni. M làá kpèè-ni tiŋan kii ubinaati nín kpèé kibiki kin u tìì dibiilee puee. U dù-kì kí lìb̄ ní kí dū-kì kí páań u-taaŋi pu ki càab̀-kì.

¹³Kii ubinaati nín ŋmēentí u-biki puee, míǹ mbaantiim ní ma mun làá dāá ŋméeǹ-ni. M làá ŋméeǹ-ni Jeerusaleem tiŋkin.

¹⁴Ni yaa láa ká mimmee, ni-pɔbil làá dāá pīil̀ ní ni-kpabiŋ ń dāá fàtīí pɔ̀ntī kii timɔsɔnee.» Ti-Dindaan làá dāá dàkà u-pɔŋŋu ama ní kí dāá dàkà u-nannanliibi u-ŋuul.

¹⁵Ní kpèèmaan, ti-Dindaan di kāń ŋŋmi poon ki dòońee, u-janjatɔrɔkub náań nì kunaakpaabuŋŋu ní. U dòoń kí dàkà u-ŋuukpaandi, ní kí dū aŋmilimbil kí tāā kí bīikì binib pu.

¹⁶Di sá yii ti-Dindaan làá dāá dū ŋŋmi nì kitàataajiki kí sòoǹ inifunaan kɔkɔ bɔti. Binib tikpil làá dāá kpú.

¹⁷M sòoǹ nì bin ŋáań bi-ba circir, ní kí nín kɔ́ circir kpaaŋŋinee, nì bin pāantí unil ubɔ un bí bukpaa kansikinee boonee ní. Bi ŋmóò ugbeeti àá usiibɔ àá ntimbiil wanti. Binib gbanti kɔkɔ làá dāá kpú dicilpu ní. Ti-Dindaan di lī míǹ.

¹⁸Ti-Dindaan bí yii: «Man nyí bi-tuuŋŋi nì bi-landɔkɔi kɔkɔ. M dòoń kí kóoǹ atimbun kɔkɔ nì isoon kɔkɔ nib kí kpāfì. Bi làá dāan̄ kí ká m-nyooti.

¹⁹M làá dāá ŋá kudaaŋŋu kubɔ bi-kansikin. M-bɔsooŋyi boon bin yaa láa kíǹ kaa kpíìyee, m làá dāá dū-bi kí tɔ̄ Taarsiisi nì Puul nì Luudi yab bin sá bipintɔliibee timmun. M làá dāá dū-bi kí tɔ̄ Tubaal nì Yafan timmun nì ntimu mun nnyim māntìi túee poon, laakin binib bin kaa gbìl̄ bi sòon̄ m-puee, laakin baa ká m-nyooti ki kée. Bíǹ di làá dāá yàntī atimbun gbanti ń béé m-nyooti.

²⁰Bi làá dāá cáań ni-nabiyaamu mun kɔkɔ bí bi-ceeyee: bi làá dāá nīn kāń itaamu nì janjatɔrɔkub pu nì tɔrɔkub bin bi bɔ̀b̄ee poon nì imamboon pu nì igutaamu pu kí dāan̄ m-Circir jool pu, Jeerusaleem tiŋkin. Án di dāa sá saraabi bin bi ŋá ki tīī-mee. M làá dāá fōō-bi kii m nín fòol̄ Isirayeel yab nín cāabìń saraabi bin m-diikun bi kā asambil ŋin bí circiree poonee ní.

²¹M làá dāá lēē bi-kansikin biba ń nīn sá bisaraaŋaliibi nì Leefii yab.» Ti-Dindaan di lī míǹ.

²²Ti-Dindaan nín sòon̄ puee sɔ̀. Kutagbɔmpɔŋu nì kitimpɔŋ kin m bíi nāantée làá nīn bá m-nimbiin ki pɔ̄ɔ̄. Míǹ mbaantiim ní ni-yiŋŋi nì ni-naantiibi yaŋ làá nīn bí m-nimbiin ki cá jaanjaan.

²³Kí yòon̄ kí nīn cée, uŋmapɔɔn jiŋaaliu kamaa nì ŋwiŋŋuŋfikaa kamaayee, kitiŋ pu nib kɔkɔ làá dāan̄ kí gbàan̄ man bi-Dindaan nimbiin.

²⁴Binib yaa láa nyēē kitiŋinee, bi dāa ŋūǹ kí ká bin nìn jáń nì mee nikpiliŋ. Akoosibil ŋin dāa ŋmóò-ŋee kaa dāa kúù jaanjaan, ní ŋŋmi ŋun dāa wù-bee mun kaa dāa kúù[162]. Án làá dāá nīn cáá kitiŋ kɔkɔ nib titantan ní.