Read Ntcham Esaïe 7 Bible Online

Esaïe 7 - Ntcham bible

Esaïe 7

¹An nìn sá ŋyunti ŋun ní Akaasi, Yootam jipɔɔn, Oosiyasi naantiiu nìn sá Juuda bɔtiuee ní. Aram bɔtiu Reesiin nì Reemaliyawuu jipɔɔn Peekaa un nìn sá Isirayeel bɔtiuee nìn cūtì kí já nì Jeerusaleem tiŋki, ama baa nìn ŋúń ki jáń ki fōō-kì[15].

²Bi tùkū Akaasi un sá Daafiidi naantiiuee yii: «Aram yab bāań ki bí Eefiraayiim tiŋki pu.» Ubɔti nì u-yab nín gbìl̄ mimmee ní an cīŋkì-bi kii kubuŋu nín cìŋkī kubambaŋŋun sufii puee.

³Niinee ní ti-Dindaan tùkū Yeesaya yii: «Sii nì a-jipɔɔn Seeyaar-Yasuub ń nóó á cù kí ká ubɔti Akaasi. U bíń kunyiŋfuŋu kun bi cátì nnyim dì ki kóò dinyimbɔbil din bí yilpu púee kúntilaŋki, didandi din cá biwaŋfintiliibi kpaabunee watil pú.

⁴Á tùkù-u yii: <Kàl̄ soooo, taa fàŋkì báà tiba. Taa yàntī diŋuul din uaranja Reesiin nì Reemaliyawuu jipɔɔn gííyee ń bīil̀ a-pɔbil. Bi sá kii aŋmisaatee ali ŋin bí ki dùkù ŋŋminyiimee ní.

⁵An sá tiŋman yii Aram yab nì Eefiraayiim yab nì Reemaliyawuu jipɔɔn pūtì a-pu ki lī yii

⁶'Tí cù kí já nì Juuda beel yab kí fàaǹ-bi. Tí páb́-bi bí kūtì ti-pu, ní tí dū Taabeel jipɔɔn kí kàan̄ dibeel bi-tiŋki pu.'

⁷Ama ti-Dindaan Unimbɔti di lī yii: 'Án kpá kí ŋá míǹ jaanjaan!

⁸Di sá yii Aram tiŋyil di sá Damaasi, ní Reesiin sá Damaasi bɔtiu. An kíǹ abin imuŋku ita nì aŋmoo, Eefiraayiim nibul làá kúntí kitiŋ pu'.

⁹Eefiraayiim tiŋyil di sá Samaarii, ní Peekaa sá Samaarii bɔtiu. Ni yaa kaa máká ti-Dindaan pu, naa làá ŋmā kí yūĺ.>»

¹⁰Ti-Dindaan gíti bí Akaasi yii:

¹¹«Bàlifì ti-Dindaan a-Nimbɔtiu ú tīī-si kudaaŋŋu kubɔ. Kú nyānní taapu ditaŋkpiilin àá kutagbɔŋu yilpu.»

¹²Ama ní Akaasi kíí yii: «Aayee, maa làá bàlifì kudaaŋŋu kubɔ pu ní kaa nín cɔ́ŋkì ti-Dindaan.»

¹³Niinee ní Yeesaya bí-u yii: «Pīlifìmaan, Daafiidi dicaŋkun yab. Kéè ni nyántì binib naŋki an kaa ŋmāntiǹ-ni ní ni là kí nyāntí man Nimbɔtiu mun naŋkaa!

¹⁴Too, ti-Dindaan u-ba làá tīī-ni kudaaŋŋu kubɔ. Usapɔɔnee làá dāá cáá dipool kí màal̀ kibininjabiki ní kí dāá pɔ̄-kì diyindi yii Eemanuyeel, taapu di sá yii <Unimbɔti bí ti-cee>[16].

¹⁵An bikee jikaati di dāa sá nnaabiim nì tisiil kí cáá sāā ŋyunti ŋun ní kì làá béé kí gàntī tin kaa ŋān̄ee nì tin ŋān̄ee.

¹⁶Kí wàatī kibiki gbanti ń béé kí gàntī tin kaa ŋān̄ee nì tin ŋān̄eeyee, bibɔtiibi bili bin a fàŋkí nee nib làá dāá yīkì kí fá bi-timmu.

¹⁷Ama ti-Dindaan làá tɔ̄ sii nì a-nibul nì a-dicaŋkun yab pu nnaabu ŋun naa láá ká ki ká doooo ŋyunti ŋun ní Eefiraayiim beel cúu yākatì nì Juuda beelee. Asuur bɔtiu di làá dāá ŋá míǹ.»

¹⁸Ŋyunti gbantee, ti-Dindaan làá dāá búń kiwulii kí yíiń isii in bíń laakin Niil mɔɔl cá ki kóò tiŋkunee, nì inaŋgbansii in bíń Asuur tiŋkinee.

¹⁹I-kɔkɔ làá dāan̄ kí nákań nákań atantaka bɔbiliŋ poon, nì itaŋkpalɔkɔ poon, nì nsugboomu kɔkɔ pu, nì anyimbɔbil kɔkɔ poon.

²⁰Ŋyunti gbantee, ti-Dindaan làá dāá fōoń bɔlfi Eefiraati mɔɔgbandi lapu pu yal cee. Asuur bɔtiu dee. U làá dāá kòol̀-ni abaakpan nì ni-wunti kɔkɔ kuti ki kpáaǹ ni-nyimpuliŋ.

²¹Ŋyunti gbantee, báà ŋma làá dāá pée kpàà unasal ubɔ nì iŋɔsal ili ja ní.

²²I làá dāá tīī nnaabiim tikpil unil ń ká kí nyɔ̀. Bin kɔkɔ làá dāá kíń kitiŋ nee puee, nnaabiim nì tisiil ní bi dāa jīǹ.

²³Ŋyunti gbantee, bukpaa bun poon ní bi yaa láa cóoǹ fiinyi sufii kutuku, ní i-daaku sá animbil jitɔmbi kutukuee, ikuŋkum nì abɔjanaakun di dāa jīǹ bu-kɔkɔ.

²⁴Bi dāa ŋúbiń butɔbu nì ipiin ní kí dāá kɔ́ bu-poon kí kpāŋkì, di sá yii kitiŋ nee kɔkɔ dāa kpántí ikuŋkum nì abɔjanaakun ŋma ní.

²⁵Ikuŋkum nì abɔjanaakun puee, ubɔ kaa dāa gíti cá ŋgbantamu mun pu bi nìn kù nì akooyee. Mu làá dāá kpántí laakin bi dāa gbìntī inaa kí líí, ní ipii tɔ́ i-ba ki yìiǹee ní.