Read Ntcham Esaïe 9 Bible Online

Esaïe 9 - Ntcham bible

Esaïe 9

¹Dinibul din nìn còom̄ dibɔmbɔndinee ká ŋwalifikpaan. Binib bin nìn kóò dibɔmbɔndi tiŋkinee, ŋwalifi ŋmíntì bi-pu.

²A yāntì bi ká dipɔɔpiŋkpaandi, ki yāntì an mɔ́ɔkiǹ-bi tikpil. Bi bí ki fàal̀ a-nimbiin kii bi nín yaa bíi cēē bi-kpaajinti bi fàal̀ puee, ní ki kūuntí nì ifaal kii bi bíi yàkatī tin bi jáń ki fōō kujaaunee.

³Di sá yii a túutì-bi diwaŋgul din nyìm̀ bi nìn túee, ki kɔ́fì ndɔ ŋun nìn pá bi-gbigbipati puee nì ditambɔndi din utɔntɔŋkpil nìn ŋúb́ bi-puee, kii a nín nìn ŋá pu ŋwiin ŋun a nìn jáń ki pɔ́ɔkiǹ Madiyan yabee.

⁴Anaataka ŋin bi nìn táká ki tà kitiŋ cìŋkēe, nì bi-bɔkutikpaaŋŋi ŋin nìn máǹ fatikuee kɔkɔ làá fōō ŋŋmi kí wà.

⁵Di sá yii bi màl̄-ti kibiki kiba! Bi cáań-ti kibininjabiki kiba! Unimbɔti dū dibeel pɔŋŋu ki ŋúbiǹ-kì. Bi dāa yíì-kì yii: «Maamaaci saŋkiliu, Unimbɔti Mpɔŋkpaandaan, Ubaati un bí jaanjaanee, Ŋgbansɔŋfi bɔtibil.

⁶U-beel pɔŋŋu làá wàan̄, ní ú yàntī ŋgbansɔŋfi ń nīn bí kaa kúntí. U làá kàl̄ u-naanja Daafiidi beejal pu kí jī dibeel u-tiŋki kɔkɔ pu. U-beel làá báań kí nīn pɔ̄ɔ̄, kun puee dì làá nīn tɔ́kɔ́ ibaamɔn nì deedee pu ní kí yòon̄ kɔŋkɔnnee kí nīn cá jaanjaan[23]. Ti-Dindaan Mpɔŋkɔdaan neeŋkpaandi puee u nín làá ŋá puee dee.»

⁷Ti-Dindaan sòon̄ tibɔti tiba ki tɔ́ Jaakɔb naantiibi pu, tibɔtee cūtìi túutì Isirayeel beel pu.

⁸Binib bin bí Eefiraayiim beelinee kɔkɔ gbìl̄-tì, binib bin kóò Samaarii tiŋkinee gbìl̄-tì. Ama dilambil gbí bi-pɔbiliŋ ní bi bí ki lì yii:

⁹«Ti-diiŋŋi ŋin ti máń nì brikisibee lítì, ama timbi làá dū ataŋkpee ŋin bi kpítèe ní kí fàtīí mā-ŋi. Bi gāatì ti-siikoomɔɔr sufii, ama timbi làá cóoń seedir sufii kí téeǹ.»

¹⁰An pu ní ti-Dindaan dū Reesiin nannanliibi ki tɔ́ Isirayeel yab pu[24]. U tīī bi-nannanliibi kunyannyaau.

¹¹Aram yab nyánní ŋwìiń nyalaŋki pú, ní Fiiliistii yab nyánní ŋu-jeetilaŋki pú. Bi dɔ́miń ki cátikì Isirayeel yab. Ama nì mimmee, ti-Dindaan ŋuul kaa sɔ̄ŋkì, u-ŋuul dáá gbíntìi dàn̄ bi-pu.

¹²Nì míǹ kɔkɔee, Isirayeel nibul kaa fātìi gítì un di bíi dátí bi-tafalee cee, baa nyàab̄ ti-Dindaan Mpɔŋkɔdaan.

¹³Míǹ puee, ŋwimbaanti ní ti-Dindaan làá gāā kí tìl̄ Isirayeel tiŋki yil nì ki-juul, kukpakpaliu nì kukaluu.

¹⁴Bitindaŋkpilib nì akpambal di sá diyil, ní inyimɔn bɔnaatiliibi sá dijuul.

¹⁵Dinibul nee kpootiliibi yāntì bi wáŋkì, ní binib bin bi kpòotēe yīntì nsan.

¹⁶An pu ní ti-Dindaan kaa làá tàan̄ bi-nipɔmbi, waa làá sɔ̄ bi-taŋkpiibiliŋ nì bi-kpiipoobi saai. Di sá yii bi-kɔkɔ sá binikpitib, ki ŋáań tin kaa ŋān̄ee. Tin kaa máaǹ bí sòoǹee di nyēē bi-nyɔmmun. Ama nì mimmee, ti-Dindaan ŋuul kaa sɔ̄ŋkì, u-ŋuul dáá gbíntìi dàn̄ bi-pu.

¹⁷Di sá yii ntoom fòol̄ kii ŋŋmee, ki wù ikuŋkum nì abɔjanaakun, ki wù nsugboomu kubambaŋŋun, ní ŋu-nyiim yíkí ki jɔ́ḿ kutaa.

¹⁸Ti-Dindaan Mpɔŋkɔdaan ŋuukpaandi puee, kitiŋ nee fōō ŋŋmi. An bí kii ŋŋmi bíi wù dinibulee. Ubɔ kaa ti sūǹ u-nabiki saai.

¹⁹Unil fàtī ŋgiil pú kí gíí kí jī ama ní ŋkùm dáá gbíntìi cáá-u, ní kí fàtī ŋgan pú kí gíí kí ŋmɔ́ ama ní kaa díkì. Báà ŋma gífí u-ba ŋal nanti ki ŋmóò.

²⁰Manasee naakookun yab làá cātikì Eefiraayiim naakookun yab, ní Eefiraayiim naakookun yab ń cātikì Manasee naakookun yab, ní bi-liitil ń kpāfì kinyɔkɔ kí nyā Juuda naakookun yab pu. Ama nì míǹ kɔkɔee, ti-Dindaan ŋuul kaa làá sɔ̄ŋkì, u-ŋuul làá nīn gbíntìi dàn̄ bi-pu.