Read Ntcham Lévitique 1 Bible Online

Lévitique 1 - Ntcham bible

Lévitique 1

¹Ti-Dindaan yíiń Mooyiisi circir kɔŋkooŋŋun ní ki sòon̄ nì u ki bí-u yii:

²«Sòoǹ nì Isirayeel yab kí tùkù-bi yii: «Ni-kansikin ubɔ yaa là kí ŋá saraa kí tīī ti-Dindaanee, udaan ń dū unaa àá upii àá uŋoobu ní kí ŋá saraa gbanti.

³«An yaa sá unaa ní udaan cáań kí ŋá saraawɔkaayee, ú nīn sá uja un laaba kaa wɔ̀b̄ee. Ú cáań-u dikpafindi tantiu punyɔkɔki nyɔkɔpu ní ti-Dindaan ń nín fōō u-saraau[1].

⁴Ú dū u-ŋal kí páań kuwaŋkuluuee yil pu ní ti-Dindaan ń nín fōō u-saraau ní kí dū u-kpitii kí pɔ̄-u.

⁵Ú làntì unaayee circir kɔŋkooŋŋu nyɔkɔpu ti-Dindaan nimbiin. Ní Aarɔn jipɔmbi bisaraaŋaliibi ń dū unaayee fatikuu kí yàaǹ kí màntīí tū nsaraafan ŋun bí circir kɔŋkooŋŋu punyɔkɔki caŋinee.

⁶Ú lēē unaayee gbaŋŋu, kí càkà u-nanti.

⁷Usaraaŋakpil[2] Aarɔn jipɔmbi ń kpāā ŋŋmi nsaraafan pu ní kí dū idɔ kí páań.

⁸Bí dū tinan tin bi càkēe nì diyil nì ŋkpam kí páań idɔ in bi dūu páaǹ ŋŋmi pu nsaraafan puee.

⁹Un cáań kuwaŋkuluuee ń dū nnyim kí fíntí ina nì ayaka ní usaraaŋal ubɔ ń dū tinanee kɔkɔ kí wà ŋŋmi nsaraafan pu. An di sá saraawɔkaa, saraa un ní bi dù tinan kɔkɔ kí wà ŋŋmi, u-sɔnsɔfiŋu sɔ̀ŋkī ti-Dindaan pɔbilee.

¹⁰«An yaa sá upii àá uŋoobu ní udaan cáań kí ŋá saraawɔkaayee, kuwaŋkuluuee laaba ń taa nīn wɔ̀b̄.

¹¹Ú làntì-ku circir kɔŋkooŋŋu nyɔkɔpu ti-Dindaan nimbiin, nsaraafan caŋin, ŋgan pú. Aarɔn jipɔmbi bisaraaŋaliibi ń dū fatiku kí yàaǹ nsaraafan jaŋŋi kɔkɔ pu kí màntīí tū.

¹²Ú càkà tinanee ní kí dū diyil nì ŋkpam kí kūtì, ní usaraaŋal ubɔ ń dūú páań idɔ in bi dūu páaǹ ŋŋmi pu nsaraafan puee.

¹³Un cáań kuwaŋkuluuee ń dū nnyim kí fíntí ina nì ayaka ní usaraaŋal ubɔ ń dū tinanee kɔkɔ kí wà ŋŋmi nsaraafan pu. An di sá saraawɔkaa, saraa un ní bi dù tinan kɔkɔ kí wà ŋŋmi, u-sɔnsɔfiŋu sɔ̀ŋkī ti-Dindaan pɔbilee.

¹⁴«An yaa tí sá unoon ní udaan cáań kí ŋá saraawɔkaa kí tīī ti-Dindaanee, an nīn sá kinanjilii àá dibeenanjil.

¹⁵Usaraaŋal ubɔ ń fōō unoonee kí cáá cùnnì nsaraafan caŋin, kí tùkutī diyil kí dūú wà ŋŋmi nsaraafan pu, ní kí dū u-fatikuu kí còol̀ nsaraafan kpiŋŋi pu.

¹⁶Ú lēē kunyannyanciliu nì tin kā ku-poonee kí fá nsaraafan caŋin ŋwìiń nyalaŋki pú, laakin bi bīil̀ ŋkpam min bi wùn̄ee fantamee.

¹⁷Ní ú cúú unoonee kí dáaĺ kí cátí mili ifeen kansikin án taa nàbitī, ní kí dūú páań idɔ in bi dūu páaǹ ŋŋmi pu nsaraafan puee án wà. An di sá saraawɔkaa, saraa un bi dù tinan kɔkɔ kí wà ŋŋmi u-sɔnsɔfiŋu sɔ̀ŋkī ti-Dindaan pɔbilee.»