Read Ntcham Lévitique 10 Bible Online

Lévitique 10 - Ntcham bible

Lévitique 10

¹Aarɔn jipɔmbi Nadaab nì Abiyuu yōoǹ bi-sambiyaamu mun poon bi tùutī talaaluee ki pātì ŋŋmi ki dū talaalu ki páká. Bi nìn cáań ŋŋmi ŋun an kaa pú nsan bí cáań ti-Dindaan nimbiinee, kun puee an kaa nìn nóó nì ti-Dindaan nín síiǹ-bi puee.

²Niinee ní ti-Dindaan yāntì ŋŋmi ŋubɔ dɔ́miń ki wùn̄-bi ní bi kpíì dibɔbil pu niin ti-Dindaan nimbiin.

³Ní Mooyiisi bí Aarɔn yii: «An ní ti-Dindaan nìn kpáafì-ni ki lī yii: <Bin sútiń ki pìl̀-mee ní m là bí dàkà m nín bí circir puee, ní ki là bí dàkà m-nyooti samaa kɔkɔ nimbiin.>» Ní Aarɔn wunti kpíì.

⁴Niinee Mooyiisi yíiń Aarɔn baawaai Usiyeel jipɔmbi Miisayeel nì Eeliisafan ki bí-bi yii: «Dāam̄maan kí yòon̄ ni-nabiyaamu circir kɔŋkooŋŋu nyɔkɔpu kí cáá nyāntí dinaapaal kpaanceetiŋu.»

⁵Ní bi dɔ́miń ki yōoǹ bi nì bi-bɔkutiŋ ki nyántì dinaapaal kpaanceetiŋu kii Mooyiisi nín bí yii bí ŋá puee.

⁶Ní Mooyiisi bí Aarɔn nì u-jipɔmbi Eeleeyasaar nì Itamaar yii: «Ní taa yàntī ni-yikpiti ń nīn bí fìkil fikil kí taa cátí ni-bɔkutiŋ mun kí dàkà yii ni bí kunimbaaun. Ni yaa ŋá mimmee, ni làá kpú ní kí yàntī ti-Dindaan ń gíí samaa kɔkɔ pu diŋuul. Ní yàntī ni-nabiyaamu Isirayeel yab kɔkɔ ń kàl̄ bin ti-Dindaan dū ŋŋmi ki kūūyee kpool.

⁷Nimbee, ní taa nyā Circir kɔŋkooŋŋu punyɔkɔpu, án nín làá ŋá pu ní taa kpúee, di sá yii bi bātì ŋkpam ki sītì ni-yiliŋ pu ki dū-ni ki sú ti-Dindaan ní.» Ní Aarɔn nì u-jipɔmbi ŋá ki nóó nì Mooyiisi nín bí yii bí ŋá puee.

⁸Ti-Dindaan bí Aarɔn yii:

⁹«Sii nì a-jipɔmbi, ni yaa kóò circir kɔŋkooŋŋu poonee, ní taa nyɔ̀ ndamam àá ndaam min pɔ̄ɔ̄yee miba, án nín làá ŋá pu ní taa kpúee. Án nīn sá dibɔkpaal ki tīī ni nì ni-biyaamu kí nīn cá jaanjaan.

¹⁰Mimmee ni làá ŋmā kí gàntī tin bí circiree nì tin kaa bée, nì tin bi kòóyee nì tin baa kòóyee.

¹¹Ni làá gíti ŋmā kí dàkà Isirayeel yab abɔkpaa ŋin ti-Dindaan dī Mooyiisi pu ki tīī-bee.»

¹²Mooyiisi bí Aarɔn nì Eeleeyasaar nì Itamaar, u-jipɔmbi bili bin kíǹee yii: «Bi nín lēē tijimpin saraau poon dijandi ki wùn̄ ŋŋmi ki tīī ti-Dindaanee, dijandi din kíǹee, ní dūú ŋá tijin kí jī nsaraafan caŋin ŋkpɔnɔnyɔkɔ ń nīn kpá poon, di sá yii an sá circir páaa jinti ní.

¹³Mpaan ŋun bí circiree pu ní ní jī tijin gbanti, di sá yii saraabi bin bi cāabìń ki tìì ti-Dindaanee, dijandi din sá ki tīī sii nì a-jipɔmbee dee. Ti-Dindaan nín síiǹ-mi puee dee.

¹⁴Tiwaŋkuti bindi din bi yōoǹ kutaa ki fíiǹ fíiǹee nì ditaal din bi lēē ki dūu tīī ti-Dindaanee, sii nì a-jipɔmbi nì a-bisalib ń kàl̄ laakin bí circiree kí jī an jinti, di sá yii mpèé saraau un Isirayeel yab ŋáańee, dijandi gbanti di sá ki tīī sii nì a-jipɔmbi.

¹⁵Bi yaa lēē ditaal nì dibindi din bi làá fíiǹ fíiǹee, bí lēē ŋkpam min bi làá cáá wà ŋŋmee, ní kí yòon̄ yilpu kí fíiǹ fíiǹ ti-Dindaan nimbiin. Míǹ boonee sii nì a-jipɔmbi di yì, di sá yii dijandi din sá ki tīī-ni kí nīn cá jaanjaanee dee, kii ti-Dindaan nín tīī mara puee.»

¹⁶Boonee Mooyiisi dāa béè yii uŋɔja un bi dūu ŋá ikpiti pɔ̄tam saraauee, bi dūu wùn̄ ŋŋmi. Niinee ní Mooyiisi gíí Eeleeyasaar nì Itamaar, Aarɔn jipɔmbi bin kíǹee pu diŋuul, ní ki bālifì-bi yii:

¹⁷«Ba pu ní naa ŋmɔ́ ikpiti pɔ̄tam saraau nanti mpaan ŋun bí circiree pu ní, kun puee tinan gbanti bí circir páaa ní? Ti-Dindaan di dū-tì ki tīī-ni yii ní fōō samaa kɔkɔ kpitii kí túń kí ŋmā kí fíntí bi-kpitii ti-Dindaan nimbiin.

¹⁸Baa dū uŋoobu gbanti fatikuu ki kɔ́ǹ circir kɔŋkooŋŋu poon, an puee an bàà sá ní ŋmɔ́ u-nanti ní, kii m nín síiǹ-ni mara puee.»

¹⁹Ní Aarɔn kíí Mooyiisi yii: «Díǹ di sá ŋwimpeepeekaa ŋun bi ŋá ikpiti pɔ̄tam saraau nì saraawɔkaayee, ní sii a-ba nyí tin jítì m-puee. Mimmee an kítì ti-Dindaan nimbiin yii ḿ bàà ŋmɔ́ ikpiti pɔ̄tam saraau nanti díǹ wiiŋŋuaaa?»

²⁰Mooyiisi gbìl̄ an nyɔɔbuŋŋee ní ki tīī-u imɔ̀ń.