Read Ntcham Lévitique 12 Bible Online

Lévitique 12 - Ntcham bible

Lévitique 12

¹Ti-Dindaan sòon̄ nì Mooyiisi ki bí-u yii:

²«Tùkù Isirayeel yab yii unimpu yaa cáá dipool ki màl̄ kibininjabikee, mara poonee, u kɔ́ tijɔkɔndi kí cáá sāā iwiin iluli dal kii u nín yaa ká u-ba, u bí tijɔkɔndin puee.

³Ŋwinniniiti dalee, bí gíí kibikee dikpancandi[24].

⁴Míǹ boonee, ú gíti kàl̄ iwiin mmuŋku nì saalaa nì ita kí nyā fatiku un nyáń-uee jɔkɔntin. Waa máaǹ kí gbēē tiwan tin bí circir bi dūu sú ti-Dindaanee, kaa máaǹ kí kɔ́ circir kɔŋkooŋŋu cindin kí cáá sāā ŋyunti ŋun u làá nyā u-matinti jɔkɔntinee.

⁵«An yaa sá kibinimpubiki ní u màl̄ee, mara poonee, u kɔ́ tijɔkɔndi kí cáá sāā nnyɔmu muli kii u nín yaa ká u-ba, u bí tijɔkɔndin puee. Míǹ boonee ní ú gíti kàl̄ iwiin imuŋku ita nì iluu kí nyā fatiku un nyáń-uee jɔkɔntin.

⁶«An yaa sá kibininjabiki àá kibinimpubiki ní u màl̄ ní ki kāl̀ iwiin in mara bālifèe ki tin sāāyee, ú cùú ká usaraaŋal circir kɔŋkooŋŋu punyɔkɔki nyɔkɔpu. Ú cáań dibindi diba pibil kí ŋá saraawɔkaa nì dinanjil àá dibeenanjil kí ŋá ikpiti pɔ̄tam saraau.

⁷Ní usaraaŋal ń fōō tiwaŋkutee kí cáá ŋá saraa ti-Dindaan nimbiin kí fíntí unimpuee kpitii ú nyā fatiku un nyáń-uee jɔkɔntin.» Mara un bi nìn síiǹ unimpu yaa màl̄ kibininjabiki àá kibinimpubikee dee.

⁸«Unimpu ŋaan yaa kaa nyìm̀ ú dā dipibilee, u ŋūǹ kí cáań ananjil ali àá abeenanjil[25] ali ní kí dū diba kí ŋá saraawɔkaa ní kí dū din kíǹee kí ŋá ikpiti pɔ̄tam saraau, ní usaraaŋal ń dūú ŋá saraa kí fíntí u-kpitii ní ú nyā fatiku un nyáń-uee jɔkɔntin.»