Read Ntcham Lévitique 13 Bible Online

Lévitique 13 - Ntcham bible

Lévitique 13

²«Ubɔ wunti pu laaba yaa díkí àá tikalindi nyáń u-wunti pu laaba àá u-wunti pu laaba líkitì ki jìl̀ ní ki dāa dūu ŋá mbuun kii dinyaŋgbandee, bí cáá udaan kí dàkà usaraaŋakpil Aarɔn àá u-jipɔmbi kansikin ubɔ.

³Usaraaŋal ń kpèè mbuun ŋun bí udaan wunti puee. Tikuti tin bí mbuunee poonee yaa pīiǹ ní mbuun yaa ŋmɔ́ ki kɔ́ tiwunnan poonee, mimmee an sá dinyaŋgbandi buuŋŋu. Usaraaŋal nín kpēē-u ki ká mimmee ní ú sòoǹ báà ŋma ń gbìl̄ yii udaan kɔ́ tijɔkɔndi.

⁴Ama u-wunti pu laakin líkitèe yaa pīiǹ ní kaa ŋmɔ́ ki kɔ́ tiwunnan poon, ní tikuti mun kaa píil̀ee, usaraaŋal ń dū-u kí pìin̄ kudii ú nīn bí niin u-baba iwiin iluli.

⁵Ŋwinluluúti dalee ní usaraaŋal ń tí kpèè-u. U yaa ká yii mbuunee kaa kpántì, kaa wāaǹ muee ní ú fàtīí tí dū-u kí pìin̄ kudii ú nīn bí niin u-baba iwiin iluli.

⁶Ŋwinluluúti dalee ní usaraaŋal ń gíti tí pìitī-u nliliitiim kí kpèè-u. Mbuun yaa píil̀ fàaa kaa wāaǹee, usaraaŋal ń sòoǹ báà ŋma ń gbìl̄ yii unilee kaa kɔ́ tijɔkɔndi, an pée sá tikalindi ní. Udaan ń fíntí u-wampeeŋkaati kí ŋāŋkì.

⁷Ama usaraaŋal nín ká yii waa kɔ́ tijɔkɔndee ní boonee tikalindee yaa lālim̀ee, ú fàtīí gítí kí dū u-ba kí dàkà usaraaŋal ú kpèè-u.

⁸Usaraaŋal yaa dáań ki ká yii tikalindi lālim̀ ki gbí tiwun kɔkɔ puee ní ú sòoǹ báà ŋma ń gbìl̄ yii udaan kɔ́ tijɔkɔndi, an sá dinyaŋgbandi.

⁹«Dinyaŋgbandi weeŋyi iba yaa tɔ́ ubɔee, bí cáań-u usaraaŋal cee.

¹⁰Usaraaŋal ń kpèè-u. An yaa sá disiŋkpeepindi di bí udaan wunti pu ní disiŋkpeelee poon tikuti bí ki pīiǹ ní mbuun nútìńee,

¹¹an sá dinyaŋgbandi buuŋŋu di tɔ́ udaan. Usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi. An kaa ti bàlifī ú dū-u kí pìin̄ kudii, di sá yii an nyáń mpaampiin pu yii u kɔ́ tijɔkɔndi.

¹²Ama usaraaŋal yaa dáań ki ká yii dinyaŋgbandi weeŋŋuee kpátìi gbí udaan wunti kɔkɔ pu kí kíĺ diyil kí cáá sāā ataayee,

¹³usaraaŋal ń mɔ̀tīí kpèè tiŋan. U yaa ká yii an píń u-wunti kɔkɔ puee, ú sòoǹ báà ŋma ń gbìl̄ yii waa kɔ́ tijɔkɔndi. Di sá an píń u-wunti kɔkɔ pu ki pīiǹ, waa kɔ́ tijɔkɔndi.

¹⁴Ama ŋwiin ŋun u yaa ká udaan wunti léetèe, ŋwiin gbantee u kɔ́ tijɔkɔndi.

¹⁵Usaraaŋal yaa pée ká udaan wunti léetèe, ú sòoǹ báà ŋma ń gbìl̄ yii u kɔ́ tijɔkɔndi. U-wunti nín léetèe dàkà yii an sá dinyaŋgbandi weeŋŋu.

¹⁶Ama u-wunti laakin léetèe yaa fātìi píil̀ee, ú gítí kí ká usaraaŋal.

¹⁷Usaraaŋal ń gíti kpèè-u. U mun yaa ká yii u-wunti laakin léetèe píil̀ee, ú sòoǹ báà ŋma ń gbìl̄ yii ŋweenee kaa sá tijɔkɔndi weeŋŋu, ní un pu ŋu kēe mun kaa kɔ́ tijɔkɔndi.

¹⁸«Dinal yaa nìn tɔ́ ubɔ ní ki kpíì,

¹⁹ama ní laakin dinalee nìn tɔ́ee, ndulim miba nyáń àá niin léetì ki pīiǹ fàaayee, udaan ń cáá u-ba kí dàkà usaraaŋal.

²⁰Usaraaŋal ń kpèè-u. Laakin ŋá ndulim àá an léetèe yaa ŋmɔ́ ki kɔ́ tiwunnan poon ní tikuti tin bí ŋu-poonee pīiǹee, usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi. Dinyaŋgbandi buuŋŋu di nyáń dinalee buŋweekun.

²¹Ama usaraaŋal yaa dáań ki ká yii tikuti tin bí mbuunee poon kaa pīiǹ ní mbuunee kaa ŋmɔ́ ki kɔ́ tiwunnan poon, ní kaa léetèe, ú dū-u kí pìin̄ kudii u-baba iwiin iluli.

²²Míǹ boon mbuunee yaa nyātèe, usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi: dinyaŋgbandi buuŋŋu dee.

²³Ama mbuunee yaa kaa kpántì kaa wāaǹ muee, mimmee an sá dinalee buŋweeku. Usaraaŋal ń lì báà ŋma ń gbìl̄ yii udaan kaa kɔ́ tijɔkɔndi.

²⁴«Ŋŋmi yaa nìn wùn̄ ubɔ ní an ŋá ndulim kubuŋweeu poon ki pīiǹ fàaa àá ki máǹ wèeeeyee,

²⁵usaraaŋal ń kpèè-u. Tikuti tin bí ndulim poonee yaa pīiǹ ní mbuun yaa ŋmɔ́ ki kɔ́ tiwunnan poonee, an sá dinyaŋgbandi di nyáń kubuŋweeuee poon. Usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi.

²⁶Ama usaraaŋal yaa ká yii tikupin kaa bí ndulim poon ní kaa ŋmɔ́ ki kɔ́ tiwunnan poon, kaa tí pīiǹ fàaayee, usaraaŋal ń dū-u kí pìin̄ kudii u-baba iwiin iluli.

²⁷Iwiin iluli dal, usaraaŋal yaa fātìi kpēē-u ki ká yii an wāaǹee, usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi. An sá dinyaŋgbandi buuŋŋu.

²⁸Ama ndulimee yaa kaa wāaǹ ki gbíntì dibɔɔbaantiil ní kaa pīiǹ fàaayee, an sá ndulim fám ní. Usaraaŋal ń sòoǹ báà ŋma ń gbìl̄ yii udaan kaa kɔ́ tijɔkɔndi, an sá ŋŋmi buŋweeku.

²⁹«Ŋween ŋubɔ yaa tɔ́ uninja àá unimpu ubɔ yil àá u-nyɔɔkpaalee,

³⁰usaraaŋal ń kpèè ŋween gbanti. U yaa ká yii ŋweenee ŋmɔ́ ki kɔ́ tiwunnan poon ní tikuti bí ki sá kpalku kaa múkúee, usaraaŋal ń sòoǹ báà ŋma ń gbìl̄ yii udaan kɔ́ tijɔkɔndi. An sá kideeŋŋi kin sá dinyaŋgbandi ki tòó diyil àá dinyɔɔkpaalee.

³¹Ama usaraaŋal yaa ká yii ŋweenee kaa ŋmɔ́ ki kɔ́ tiwunnan poon, ní tikuti tin bɔ̀ǹee kaa bí ki-poonee, ú dū-u kí pìin̄ kudii u-baba iwiin iluli.

³²Iwiin iluli dalee, usaraaŋal ń fàtīí kpèè ŋweenee. U yaa ká yii ŋuaa wāaǹ, ní tikuti tin sá kpalkuee kaa bí ŋu-poon ní kaa ŋmɔ́ ki kɔ́ tiwunnan poonee,

³³udaan ń kòol̀ u-yil kí gɔ́ntí laakin ŋween bée. Míǹ boonee usaraaŋal ń fàtīí dū-u kí pìin̄ kudii u-baba nliliitiim iwiin iluli.

³⁴Iwiin iluli dalee, usaraaŋal ń fàtīí kpèè ŋween gbanti. An yaa kaa wāaǹ, kaa ŋmɔ́ ki kɔ́ tiwunnan poonee, usaraaŋal ń sòoǹ báà ŋma ń gbìl̄ yii waa kɔ́ tijɔkɔndi. Ú pée fíntí u-wampeeŋkaati ní kí nyā tijɔkɔndin.

³⁵Ama usaraaŋal nín kpēē-u ki dóò ki lī yii u bí circiree, boonee kideeŋŋee yaa wāaǹee,

³⁶usaraaŋal ń tí fàtīí kpèè-u. U yaa ká yii kideeŋŋee wāaǹee, an kaa ti bàlifī ú nyàab̀ kí kpèè yii tikuti tin sá kpalkuee báaa an kpá, udaan kɔ́ tijɔkɔndi.

³⁷Ama kideeŋŋee yaa kaa wāaǹ ní tikubɔn yaa nyáń ki-nee, mimmee kideeŋŋee kpíì dee, un pu kì tɔ́ee kaa kɔ́ tijɔkɔndi. Usaraaŋal ń lì báà ŋma ń gbìl̄ yii udaan kaa kɔ́ tijɔkɔndi.

³⁸«Uninja àá unimpu ubɔ wunti yaa lēē ki ŋá aliki aliki ki pīiǹee,

³⁹usaraaŋal ń kpèè-u. Alikee yaa pīiǹ fàaayee, mimmee an sá ncabiyaamu. Udaan kaa kɔ́ tijɔkɔndi.

⁴⁰«Ubɔ yaa kaa cáá tiyikpiti u-yil puee, mimmee uyiŋatifu dee, waa kɔ́ tijɔkɔndi.

⁴¹U-yigbeel yaa kaa cáá tiyikpiti ní ki jɔ̀m̀ee, mimmee un yigbeel ŋātèe dee, waa kɔ́ tijɔkɔndi.

⁴²Ama mbuun yaa tɔ́ u-yil kansikin àá u-yigbeel laakin ŋātèe ki pīiǹ fàaayee, an sá dinyaŋgbandi di kíĺ ki bíi tòó-u.

⁴³Usaraaŋal ń kpèè-u. U yaa ká yii mbuun ŋun tɔ́ u-yil kansikin àá u-yigbeel laakin ŋātèe pīiǹ fàaa ki náań nì dinyaŋgbandee,

⁴⁴mimmee udaan sá unyaŋgbanti ní, ki kɔ́ tijɔkɔndi. Di sá u-yil ní ŋweenee tɔ́.

⁴⁵«Un būǹ dinyaŋgbandee máaǹ kí pèen̄ tiwan tin cátèe, kí taa ti càatī u-yil, kí bìin̄ u-nyɔɔkuti pu, ní kí nīn kūuntí ki lì yii: <M kɔ́ tijɔkɔndeeee! M kɔ́ tijɔkɔndi!>

⁴⁶Udaan làá nīn bí tijɔkɔndin míǹ kí nīn cí ŋyunti ŋun dinyaŋgbandi buuŋyi làá dóóyee. U làá nīn kóò u-baba, dinaapaal kpaanceetiŋu.

⁴⁷«Tí lì yii dinyaŋgbandi daaŋku nyáń ki kā tiwampeeŋkaal tin bi dū ipii kuti àá gulfapiin káŋkaŋ ki lùn̄ee pu,

⁴⁸àá sata pu àá tiŋgiliisi un bi dū gulfapiin káŋkaŋ ki lùn̄ee pu, àá ŋgban àá tin kɔkɔ pée sá ŋgbanee pu.

⁴⁹Kudaaŋŋu gbanti yaa sɔ̀m̀ gùuu àá ku yaa máǹ wèeee ki táká tiwampeeŋkaal àá ŋgban, àá sata, àá tiŋgiliisi, àá tin kɔkɔ bi dū ŋgban ki lùn̄ee puee, an sá dinyaŋgbandi. Bí cáá dàkà usaraaŋal.

⁵⁰Usaraaŋal ń kpèè kudaaŋŋuee ní kí cáá tiwan tin pu ku kēe kí síiń dibalin iwiin iluli.

⁵¹Iwiin iluli dalee, ú kpèè kudaaŋŋuee. Ku yaa lālim̀ tiwampeeŋkaal pu, àá sata pu, àá tiŋgiliisi pu, àá ŋgban pu, àá tin kɔkɔ pée sá ŋgbanee puee, an sá dinyaŋgbandi. Tiwan gbanti kɔ́ tijɔkɔndi.

⁵²Usaraaŋal ń dū tiwampeeŋkaalee, àá satee, àá tiŋgiliisee, àá tin kɔkɔ pée sá ŋgbanee kí cáá wà ŋŋmi. Kii an nín sá kudaaŋŋu kun baa ŋūǹ kí lēē kí fée puee, bí cáá an wantee kí wà ŋŋmi.

⁵³Ama usaraaŋal yaa kpēē kudaaŋŋuee ki ká yii kuaa lālim̀ tiwampeeŋkaalee pu, àá satee pu, àá tiŋgiliisee pu, àá tin kɔkɔ sá ŋgbanee puee,

⁵⁴ú yàntī bí fíntí tiwan tin pu kudaaŋŋuee kēe, ní ú cáá síiń dibalin nliliitiim iwiin iluli.

⁵⁵Bi nín fíntì míǹ ki dóòyee ní usaraaŋal ń fàtīí kpèè. U yaa ká yii kudaaŋŋuee pée gbíntìi bí kii ku nín nìn bí puee, báà ku yaa kaa lālim̀aaa, tiwanee kɔ́ tijɔkɔndi. Bí cáá-tì kí wà ŋŋmi, di sá yii tiwanee poon àá ti-boon bíil̀.

⁵⁶Ama bi nín fíntì míǹ boonee ní usaraaŋal yaa kpēē ki ká yii kudaaŋŋuee gbíntìi kā kaa lālim̀ tiwampeeŋkaal pu àá ŋgban pu, àá sata pu, àá tiŋgiliisi puee, ú gíí kí lēē dijandi gbanti tiwampeeŋkaal pu, àá ŋgban pu, àá sata àá tiŋgiliisi pu kí fá.

⁵⁷Ama boonee, kudaaŋŋuee yaa fātìi nyáń ki kā tiwampeeŋkaalee pu, àá satee pu, àá tiŋgiliisee pu, àá ŋgban wantee puee, an sá bí wà-tì ŋŋmi ní, kun puee dinyaŋgbandi di bíi tòó-tì.

⁵⁸«Ama an yaa sá tiwampeeŋkaal, àá sata, àá tiŋgiliisi, àá ŋgban wanti tin bi fíntì ní kudaaŋŋuee wáŋkèe, bí fàtīí fíntí-tì nliliitiim ní tí nyā tijɔkɔndin.»

⁵⁹Mara un bi nìn síiǹ kí ŋmā kí béé yii tiwampeeŋkaal, àá sata, àá tiŋgiliisi, àá ŋgban wanti tin pu kudaaŋŋu bée kɔ́ tijɔkɔndaaa, taa kɔ́ee dee.