Read Ntcham Lévitique 15 Bible Online

Lévitique 15 - Ntcham bible

Lévitique 15

¹Ti-Dindaan bí Mooyiisi nì Aarɔn yii

²bí tùkù Isirayeel yab yii: «Batiku yaa cúú uninjee, tináti tin nyēē-uee kɔ́ǹ-u tijɔkɔndi.

³Tinátee yaa bíi nyēēyaaa, tì yaa tīkiǹaaa, udaan kɔ́ tijɔkɔndi.

⁴Ndoo ŋun kamaa pu udaan yaa dōoǹee kɔ́ tijɔkɔndi, ní tin kamaa pu ní u yaa kāl̀ee mun kɔ́ tijɔkɔndi.

⁵Un di yaa pée gbēē u-dooŋuee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou.

⁶Un di yaa pée kāl̀ kun pu ní ubatikudaan kāl̀ee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou.

⁷Un di yaa gbēē ubatikudaanee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou.

⁸Ubatikudaan yaa tíil̀ ki pɔ̀l̄ unil un kaa kɔ́ tijɔkɔndee puee, udaan máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou.

⁹Dijal din kamaa pu ní ubatikudaan yaa kāl̀ ki cūtì nsanee kɔ́ tijɔkɔndi.

¹⁰Un di yaa pée gbēē tin kamaa dɔ̄ ubatikudaan taapuee kɔ́ tijɔkɔndi kí cáá sāā kujoou. Un di yaa tí yōoǹ tiwan gbanti ki túǹee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou.

¹¹Unil un kamaa ní ubatikudaan yaa kaa fíntì u-ŋal ki gbēēyee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou.

¹²Ditansambil din kamaa ní ubatikudaan yaa gbēēyee, bí gbá kí wīī-dì. An yaa sá ndɔ sambilee, bí dū nnyim tikpil kí fíntí-dì.

¹³«Tináti tin nìn nyēē ubatikudaan ki kɔ́ǹ-u tijɔkɔndee yaa gúń u pɔ́ɔkèe, ú gíti kàl̄ iwiin iluli ní kí nín nyā u-jɔkɔntin. Ú fíntí u-wampeeŋkaati, kí dū nnyimbul nyim kí fàl̀ ní kí nín nyā tijɔkɔndin.

¹⁴Iwiin inii dalee, ú nyàab̀ ananjil ali àá abeenanjil ali kí cáá cùnnì ti-Dindaan nimbiin, circir kɔŋkooŋŋu punyɔkɔki nyɔkɔpu, kí dūú tīī usaraaŋal.

¹⁵Usaraaŋal ń dū diba kí ŋá ikpiti pɔ̄tam saraau ní kí dū din kíǹee kí ŋá saraawɔkaa. Ú ŋá dikoobil nín bālifì puee ti-Dindaan nimbiin kí fíntí udaan batikuu jɔkɔnti.

¹⁶«Uninja yaa nyéem̀ tijatee, u máaǹ kí fàl̀, ní ki làá nīn bí tijɔkɔndin kí cáá sāā kujoou.

¹⁷Tijatee yaa táká tiwampeeŋkaal tiba àá ŋgban wanti tibee, bí dū nnyim kí fíntí-tì. Tì làá nīn bí tijɔkɔndin kí cáá sāā kujoou.

¹⁸«Uninja yaa dōoǹ nì unimpuee, bi-liitil máaǹ kí fàl̀, ní ki làá nīn bí tijɔkɔndin kí cáá sāā kujoou.»

¹⁹«Unimpu yaa bíi fùul̀ ŋkpinee, u kɔ́ tijɔkɔndi kí cáá sāā iwiin iluli. Un mun di yaa gbēē-uee kɔ́ tijɔkɔndi kí cáá sāā kujoou.

²⁰Ndoo ŋun kamaa pu ní unimpuee yaa dōoǹ ŋyunti gbanti kɔkɔee kɔ́ tijɔkɔndi, ní tiwan tin kamaa pu ní u yaa pée kāl̀ee mun kɔ́ tijɔkɔndi.

²¹Un di yaa pée gbēē u-dooŋuee mun kɔ́ tijɔkɔndi. Udaan máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou.

²²Un di yaa pée gbēē kun pu ní unimpu gbanti kāl̀ee ń fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou.

²³Tiba yaa pá ndoo ŋun pu unimpu gbanti dɔ̄ee, àá dijal din pu u kēe ní ubɔ dɔ́miń ki gbēē tiwan gbantee, udaan kɔ́ tijɔkɔndi kí cáá sāā kujoou.

²⁴Uninja yaa dōoǹ nì u ŋyunti gbanti poon ní u-fatikuu nyáń ki gbēē-uee, uninjee mun kɔ́ tijɔkɔndi kí cáá sāā iwiin iluli. Uninja gbanti mun yaa dōoǹ ndoo ŋun puee kɔ́ tijɔkɔndi.

²⁵«Unimpu yaa fùl̄ ŋkpin iwiin kupaau ní an kaa sá u-kpiŋŋu yuntiŋu, àá u-kpiŋŋu yaa jítì iwiin in an bàà sá an gúńee, u bí tijɔkɔndin ŋyunti gbanti kɔkɔ poon kii u nín pée kpààa kāntí u-ba iyunti in máaǹee puee.

²⁶Ndoo ŋun pu ní u yaa pée dōoǹee, àá dijal din pu ní u yaa kāl̀ ŋyunti gbanti poonee kɔ́ tijɔkɔndi kii u nín pée kpààa fùul̀ ŋkpin iyunti in máaǹee puee.

²⁷Un di yaa gbēē ndoo àá dijal gbantee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou.

²⁸«Ŋwiin ŋun u-kpiŋŋu gúńee, ú gíti kàl̄ iwiin iluli ní kí nín nyā tijɔkɔndin.

²⁹Iwiin inii dalee, ú nyàab̀ ananjil ali àá abeenanjil ali kí cáań kí tīī usaraaŋal, circir kɔŋkooŋŋu punyɔkɔki nyɔkɔpu.

³⁰Usaraaŋal ń dū nnɔmbiyaamuee kiba kí ŋá ikpiti pɔ̄tam saraau, kí dū kin kíǹee kí ŋá saraawɔkaa. Míǹ boonee usaraaŋal ń ŋá dikoobil nín bālifì puee unimpuee pu ti-Dindaan nimbiin kí fíntí u nín fùl̄ ŋkpin puee jɔkɔnti.»

³¹Ti-Dindaan nìn gíti bí Mooyiisi nì Aarɔn yii: «Ní kpāafì Isirayeel yab bí taa sútí kí pìl̄ m-kɔŋkooŋŋu ŋyunti ŋun bi yaa bí tijɔkɔndinee. Di sá yii bi yaa kɔ́ǹ m-kɔŋkooŋŋu ŋun bí bi-kansikinee tijɔkɔndee, see bí kpú.»

³²Marab bin bi síiǹ ubatikudaan àá un di yaa nyéem̀ tijati ki kɔ́ tijɔkɔndinee dee.

³³Marab gbanti sá ki tīī unimpu un fùl̄ ŋkpinee àá uninja àá unimpu un fatiku nyēē-uee àá uninja un di yaa dōoǹ nì unimpu un bí tijɔkɔndinee mun.