Read Ntcham Lévitique 16 Bible Online

Lévitique 16 - Ntcham bible

Lévitique 16

¹Aarɔn jipɔmbi bili nín nìn sútì ki pìl̄ ti-Dindaan ki kpíìyee boonee, ti-Dindaan nìn sòon̄ nì Mooyiisi.

²U nìn bí-u yii: «Tùkù a-maan Aarɔn yii ú taa nín̄ kóò ŋyunti ŋun ní u yaa lèe circir páaa laŋki[28], ŋŋaapìtikaa boon, laakin dipoondi dakaau nì u-bìil sée. Mimmee ŋyunti ŋun ditagbandi din poon m bée yaa nyáń ki dāntì dipoondi dakaau bìil puee, waa kúù.

³«Kí wàatī Aarɔn ń nín kɔ́ circir páaa laŋki gbantee, u máaǹ kí cáań dinajapɔmbil kí ŋá ikpiti pɔ̄tam saraau nì upìja kí ŋá saraawɔkaa[29].

⁴Ú dū ŋŋaapiin saraaŋabɔkutil din fɔ̀kɔ̀ee kí pèen̄, kí dū ŋŋaapiin cukutigiŋki kí lòon̄, kí dū ŋŋaapiin dambalau kí cúú u-caŋ ní kí dū ŋŋaapiin kí fìn̄ u-yil. Tiwan gbanti sá circir wanti ní, an puee u máaǹ kí fàl̀ ní kí nín pèen̄-tì.

⁵Míǹ boonee ní Isirayeel yab ń tīī-u iŋɔjaa ili ú dūú ŋá ikpiti pɔ̄tam saraau ní kí tīī-u upìja ubɔ ú dūú ŋá saraawɔkaa.

⁶«Aarɔn ń dū dinabil din u làá dūú ŋá úǹ u-ba kpitii pɔ̄tam saraauee kí ŋá saraa ní kí ŋá dikoobil nín bālifì puee kí fíntí u-kpitii nì u-dicaŋku yai.

⁷U yaa ŋá míǹ ki dóòyee ní ú cáań iŋɔjaa ilee ti-Dindaan nimbiin circir kɔŋkooŋŋu punyɔkɔki nyɔkɔpu.

⁸Ú tɔ̄ kasi iŋoobuee liitil pu kí béé un làá nīn sá ti-Dindaan yɔuee nì un làá nīn sá Asaseel[30] yɔuee.

⁹Ní Aarɔn ń dū uŋoobu un bi tɔ́ kasi ki lēē yii u sá ti-Dindaan yɔuee kí ŋá ikpiti pɔ̄tam saraau.

¹⁰Ama Asaseel ŋoobuuee, úǹ ń nīn wāĺ ní bí cáań-u ti-Dindaan nimbiin kí ŋá dikoobil nín bālifì puee kí fíntí samaa kpitii, ní kí jà-u kí tɔ̄ kuteeun kí tīī Asaseel.

¹¹«Niinee ní Aarɔn ń yòon̄ dinabil din u làá dūú ŋá u-kpitii pɔ̄tam saraauee, ní kí ŋá dikoobil nín bālifì puee kí fíntí u-kpitii nì u-dicaŋku yai. Ú làntì dinabilee kí ŋá úǹ u-ba kpitii pɔ̄tam saraau.

¹²Ú mɔ́fí amɔsiŋkoon ŋin bí nsaraafan pu circir kɔŋkooŋŋunee kí ŋá kisambiki kin poon bi tùutī talaaluee. Ú yáfí talaalu yim aŋaŋkul ali ní kí cáá kɔkɔ kí kɔ́ǹ circir páaa laŋki, ŋŋaapìtikaa boon.

¹³Ti-Dindaan nimbiin niinee ní Aarɔn ń dū talaaluee kí páká amɔsiŋkoonee pu ní talaaluee nyiim ń yīkì kí bìin̄ dipoondi taŋkpapilinti dakaau nì u-bìil pu, án nín làá ŋá pu ú taa kpúee.

¹⁴U yaa ŋá míǹ ki dóòyee ní ú dū u-ŋambiki kí sēē dinabilee fatikuu kí dūú yàaǹ Dipoondi dakaau bìil pu, ŋwìiń nyalaŋki pú, ŋfunyɔm miluli, ní kí yàaǹ dakaayee nyɔkɔpu ŋfunyɔm miluli.

¹⁵Míǹ boonee ní ú làntì uŋɔja un u làá dūú ŋá samaa kɔkɔ kpitii pɔ̄tam saraauee. Ú yòon̄ u-fatikuu kí cáá kɔ́ǹ circir páaa laŋki, ŋŋaapìtikaa boon. Ú dū fatiku gbanti kí ŋá kii u nín bàà pée dū dinabilee fatikuu ki ŋá pu ki dūu yāaǹ Dipoondi dakaau bìil pu nì dakaayee nyɔkɔpu puee[31].

¹⁶Aarɔn nín máaǹ kí ŋá pu kí fíntí circir páaa laŋki kí nyāntí Isirayeel yab yìntitam nì bi-kpitii nín kɔ́ǹ circir páaa laŋki gbanti tijɔkɔndi tin poonee dee. Ú ŋá dikpafindi tantiu un bí bi-cee bi-jɔkɔnti kansikinee míǹ mbaantiim.

¹⁷Báà unil kaa máaǹ kí nīn bí circir kɔŋkooŋŋu poon kí yòon̄ ŋyunti ŋun Aarɔn kɔ́ circir páaa laŋki ki bíi ŋáań saraabee kí cáá sāā ŋyunti ŋun u làá dāá fàtīí nyānnée. U ŋáań saraabi gbanti u-kpitii pu nì u-dicaŋku nì Isirayeel yab kɔkɔ yai pu ní.

¹⁸Míǹ boonee ní ú nyānní circir kɔŋkooŋŋun kí dāan̄ nsaraafan ŋun bí circir kɔŋkooŋŋu nyɔkɔpuee cee, ní kí ŋá dikoobil nín bālifì puee kí nyāntí-ŋu tijɔkɔndin, ní kí jōō dinabilee fatikuu nì uŋɔjee fatikuu kí dūú ŋmìtī nsaraafan yiŋyi kɔkɔ pu kí màntīí tū.

¹⁹U yaa ŋá míǹ ki dóòyee ní ú dū u-ŋambiki kí sēē fatikuee kí yàaǹ nsaraafan pu ŋfunyɔm miluli, kí fíntí-ŋu kí nyāntí Isirayeel yab jɔkɔntin, kí ŋá-ŋu circir.

²⁰«Aarɔn yaa ŋá saraabi ki nyántì circir páaa laŋki nì dikpafindi tantiu jaŋŋi ŋin kíǹee nì nsaraafan kɔkɔ tijɔkɔndin ki dóòyee ní ú dàtī Asaseel ŋɔjauee nì u-nimbiliŋ kí cáań ti-Dindaan nimbiin.

²¹Niinee ní Aarɔn ń dū u-ŋalii liitil kí páań uŋɔjee yil pu ní kí bìitī Isirayeel yab tuŋkpitiŋ nì bi-yìntitam nì bi-kpitii pu kí dūú túń uŋɔjee pu, ní kí lēē unil ubɔ ń péetí-u kí tɔ̄ kupɔɔun.

²²Mimmee, uŋɔjee kpáaǹ bi-kpitii kɔkɔ ki cáa búntì laakin ubɔ kaa kóòyee dee. «Bi nín péetì uŋɔjee ki tɔ́ kupɔɔun míǹ ki dóòyee,

²³ní Aarɔn ń fàtīí kɔ́ dikpafindi tantiun ní kí pèetī tiwan tin u bàà pēē ki kɔ́ circir páaa laŋkee kí síiń niin[32].

²⁴Ú yūĺ mpaan ŋun bí circiree pu kí fàl̀ ní kí fàtīí gíiǹ u-wampeeŋkaati kí pèen̄. Míǹ boonee ní ú nyānní kí ŋá u-saraawɔkaau nì samaa kɔkɔ yɔu, ní kí ŋá dikoobil nín bālifì puee kí fíntí úǹ u-ba kpitii nì samaa kpitii.

²⁵Míǹ boonee ní ú dū tiwaŋkuti tin bi dūu ŋá ikpiti pɔ̄tam saraauee kpam kí wà ŋŋmi nsaraafan pu.

²⁶«Unil un péetì Asaseel ŋɔjau ki tɔ́ kupɔɔunee máaǹ kí fíntí u-wampeeŋkaati, kí fàl̀, ní kí nín kɔ́ dinaapaalin.

²⁷Unaja nì uŋɔja in bi dūu ŋá ikpiti pɔ̄tam saraau, ki dū i-fatikuu ki kɔ́ǹ circir páaa laŋki ki fíntì tijɔkɔndee, bí cáá i-gbaŋyi nì i-nanti nì i-nai kí nyāntí dinaapaal kpaanceetiŋu kí wà ŋŋmi[33].

²⁸Unil un dū an wantee ki wùn̄ ŋŋmee ń fíntí u-wampeeŋkaati, kí fàl̀, ní kí nín kɔ́ dinaapaalin.

²⁹«Tin bí nee ń nīn sá-ni dibɔkpaal din làá nīn bí ki cá jaanjaanee: uŋmaluluúti, iwiin saalaa dalee, an yaa sá kitindambikeeee, unicaan un dɔ́miń ki kóò ni-pueeyeeee, ni-kɔkɔ ń bóob́ kinyɔkɔ kí taa tɔ̄ ditundi báà diba.

³⁰Di sá yii ŋwiin gbanti ní bi ŋáań saraabi kí fíntí-ni kí nyāntí ni-jɔkɔntin ní kpántí circirdambi ti-Dindaan nimbiin.

³¹Ní dū ŋwiin gbanti kí ŋá diŋuŋfil nì dinyɔɔboobil wiiŋŋu. Án nīn sá dibɔkpaal din làá nīn bí ki cá jaanjaanee.

³²«Usaraaŋal un bi bātì ŋkpam ki sītì u-yil pu ki dū-u ki sú ti-Dindaan u fōō u-baa yil ki kpántì usaraaŋakpilee di dāa ŋáań ikpiti pɔ̄tam saraau nee. U dāa pèentí ŋŋaapiin saraaŋabɔkutiŋ

³³ní kí ŋá saraabi kí fíntí circir páaa laŋki nì dikpafindi tantiu jaŋŋi ŋin kíǹee nì nsaraafan nì bisaraaŋaliibi nì samaa kɔkɔ kí nyāntí tijɔkɔndin.

³⁴«Án nīn sá-ni dibɔkpaal din làá nīn bí ki cá jaanjaanee. Ní nīn ŋáań saraabi dibindi poonee diba ki fíntí Isirayeel yab kpitii kɔkɔ[34].» Ní Aarɔn ŋá kii ti-Dindaan nín tīī Mooyiisi mara puee.