Read Ntcham Lévitique 18 Bible Online

Lévitique 18 - Ntcham bible

Lévitique 18

¹Ti-Dindaan bí Mooyiisi yii:

²«Tùkù Isirayeel yab yii man di sá ni-Dindaan, ni-Nimbɔtiu.

³Naa máaǹ kí nīn ŋáań kii Eejipiti tiŋki kin poon ni nìn kóòyee yab nín nìn ŋáań puee, kaa tí máaǹ kí nīn ŋáań kii Kanaan tiŋki kin poon m cáǹ-ni nee yab nín ŋáań puee. Naa máaǹ kí fōō bi-bimbim.

⁴Nín̄ tɔ́maan m-koobiliŋ kí nīn ŋúb́ m-bɔkpaaŋi. Man di sá ni-Dindaan, ni-Nimbɔtiu.

⁵«Nín̄ ŋúb́maan m-bɔkpaaŋi nì m-koobiliŋ. Un yaa ŋáań min marab gbanti lēe di ŋmátí[38]. Man di sá ni-Dindaan.

⁶«Ni-kansikin ubɔ ń taa dòon̄ nì unimpu u nì un pēē mmaalee. Man di sá ni-Dindaan.

⁷«Aa máaǹ kí dòon̄ nì a-na kí kɔ́ǹ a-baa icoo. Di sá yii a-na dee ní aa máaǹ kí kɔ́ǹ u mun icoo.

⁸«Aa máaǹ kí dòon̄ nì a-baa nimpoobi kansikin báà ubɔ[39]. A yaa ŋá mimmee a kɔ́ǹ a-baa icoo dee.

⁹«Aa máaǹ kí dòon̄ nì a-niisal, pēē na nì baa, àá pēē na kaa pēē baa, àá pēē baa kaa pēē na, báà bi yaa màl̄-u kudicaŋun àá laaba ní bi màlīń-u[40].

¹⁰«Aa máaǹ kí dòon̄ nì a-naantiiu, an dàkà yii a-jipɔɔn bisal àá a-bisal bisal. A yaa ŋá mimmee, a kɔ́ǹ a-ba icoo dee.

¹¹«Aa máaǹ kí dòon̄ nì a-na yɔnti bisal un a-baa màl̄ee. A-baa nín màl̄-uee puee, a-niisal dee.

¹²«Aa máaǹ kí dòon̄ nì a-pool, kun puee u nì a-baa pēē ní.

¹³«Aa máaǹ kí dòon̄ nì a-na naal àá u-maan, kun puee u nì a-na pēē ní.

¹⁴«Aa máaǹ kí kɔ́ǹ a-baa naal àá u-maan icoo kí dòon̄ nì u-nimpuu, kun puee a-na dee.

¹⁵«Aa máaǹ kí dòon̄ nì a-coopu, a-jipɔɔn nimpuu, kun puee a-jipɔɔn nimpuu dee ní aa máaǹ kí kɔ́ǹ-u icoo[41].

¹⁶«Aa máaǹ kí kɔ́ǹ a-maan àá a-naal icoo kí dòon̄ nì u-nimpuu[42].

¹⁷«Aa máaǹ kí dòon̄ nì unimpu nì u-bisal àá u-jipɔɔn bisal àá u-bisal bisal, kun puee an sá u-maaliŋu poon biyaamu ní ki sá ajɔkɔntuun[43].

¹⁸«Aa máaǹ kí cáá a-nimpuu maan àá u-naal kí kūtì u-pu ŋyunti ŋun ní u dáá bí dimaŋfalinee. A yaa ŋá mimmee, a náań ipoompoon ki bíl̀ bi-kansikin dee.

¹⁹«Aa máaǹ kí dòon̄ nì unimpu ŋyunti ŋun ní u ká u-ba ki bí tijɔkɔndinee[44].

²⁰«Aa máaǹ kí dòon̄ nì a-juti nimpuu, di sá yii án làá kɔ́ǹ-si tijɔkɔndi[45].

²¹«Aa máaǹ kí dū a-biyaamu kansikin kiba kí wà ŋŋmi kí ŋá saraa kí tīī diwaal Mooleeki[46] kí kpèè man ni-Nimbɔtiu yindi fám. Man di sá ni-Dindaan.

²²«Aa máaǹ kí dòon̄ nì a-ninjajuti kii bi nín dɔ̀ nì unimpu puee. An sá ntimbiil ní[47].

²³«Aa máaǹ kí kɔ́ǹ a-ba tijɔkɔndi kí dòon̄ nì kuwaŋkuluu. Unimpu mun kaa máaǹ kí yàntī kuwaŋkuluu ń jɔ̄m̀-u. An sá ditiŋwiil ní[48].

²⁴«Ní taa yàntī atuŋkpiti nee kansikin báà diba ń kɔ́ǹ-ni tijɔkɔndi. Di sá yii atuŋkpiti gbanti di kɔ́ǹ atimbun ŋin nib m làá jà ni-nyɔkɔpu kí fōō bi-timmu kí tīī-ni nee tijɔkɔndi.

²⁵Kitiŋ kɔkɔ kɔ́ tijɔkɔndi ní m làá dáaĺ ki-tafal binib bin kóò ki-puee kpitii pu, ní kitiŋee ń wùliŋkì ki-nib kí fá.

²⁶«Ama nimbi Isirayeel yab àá binicambi bin kóò ni-kansikinee máaǹ kí nīn ŋúb́ m-bɔkpaaŋi nì m-koobiliŋ, kí yíí kí taa ŋá ntimbiil tuuŋŋi gbanti.

²⁷Di sá yii ntimbiil tuuŋŋi gbanti ní binib bin péé péé ki kāl̀ kitiŋ gbantin ní nimbi dāa nín bāańee ŋá ní ki yāntì kì kɔ́ tijɔkɔndi.

²⁸Ní taa ti kɔ́ǹ-kì tijɔkɔndi, án nín làá ŋá pu kí taa wùliŋkì-ni kí fá kii kì nín nìn wūliŋkì bin līntiǹ-nee ki fá puee.

²⁹Ama un di yaa ŋá ntimbiil tuuŋŋi nee kansikin dibee, bí nyāntí-u Isirayeel nibul kansikin.

³⁰«Nín̄ ŋúb́maan tibɔti tin m kpáafì-ni nee kí taa ŋá ntimbiil tuuŋŋi ŋin bi nìn ŋáań ki wāatì ní nimbi nín bāańee, kí taa yàntī an tuuŋŋee ń kɔ́ǹ-ni tijɔkɔndi. Man di sá ni-Dindaan, ni-Nimbɔtiu.»