Read Ntcham Lévitique 2 Bible Online

Lévitique 2 - Ntcham bible

Lévitique 2

¹«Ubɔ yaa là kí cáań tijimpin saraau kí tīī ti-Dindaanee, án nīn sá ŋyim. Ú bàtī ŋkpam kí sìtī, kí dū talaalutuukaa kí páań,

²ní kí cáań kí tīī Aarɔn jipɔmbi bisaraaŋaliibi. Usaraaŋal un làá ŋá saraa gbantee ń yáfí ŋyim diŋaŋkul din sá kudaaŋŋu ti-Dindaan nimbiin yii úǹ di yì saraa gbantee kí dū ŋkpam kí búuń ní kí dū talaalutuukaa un bi cáańee kɔkɔ kí kūtì kí dūú wà ŋŋmi nsaraafan pu. An di sá saraa un sɔnsɔfiŋu sɔ̀ŋkī ti-Dindaan pɔbilee.

³Saraayee jandi din kíǹee, Aarɔn nì u-jipɔmbi di yì. Dijandi gbanti sá circir páaa wanti ní, kun puee an sá saraa un bi lēē ki wùn̄ ŋŋmi ki tīī ti-Dindaanee ní.

⁴«An yaa sá tijin tin bi púĺ dibubulinee ní ubɔ yaa cáań kí ŋá saraayee, án nīn sá kpɔnɔ un bi dū ŋyim ki búuń ŋkpamin ki púĺ an kaa cáá ŋkpɔnɔnyɔkɔee.

⁵An yaa sá tijin tin bi pūul̀ titaŋkpapilindi puee saraauee, ú dū ŋkpam kí búuń ŋyim kí taa ŋá ŋkpɔnɔnyɔkɔ.

⁶Ú càkà càkà-u ní kí bàtī ŋkpam kí sìtī an pu. Tijimpin saraau dee.

⁷An yaa tí sá tijin tin bi tòó kikpasaŋ poonee saraauee, ú dū ŋkpam kí búuń ŋyim kí ŋá tijin gbanti.

⁸Ú cáań saraa un u bɔ́ntì kí tīī ti-Dindaanee kí ŋúbiǹ usaraaŋal ní úǹ ń fōō kí cáá síiń nsaraafan caŋin.

⁹Saraa gbanti poonee, usaraaŋal ń lēē dijandi din sá kudaaŋŋu ti-Dindaan nimbiin yii úǹ di yì saraa gbantee kí wà ŋŋmi nsaraafan pu. An di sá saraa un bi dùú wà ŋŋmi u-sɔnsɔfiŋu sɔ̀ŋkī ti-Dindaan pɔbilee.

¹⁰Dijandi din kíǹee, Aarɔn nì u-jipɔmbi di yì. Dijandi gbanti sá circir páaa wanti ní, kun puee an sá saraa un bi lēē ki wùn̄ ŋŋmi ki tīī ti-Dindaanee ní.

¹¹«Tijimpin saraau un kamaa ni làá ŋá kí tīī ti-Dindaanee, ŋkpɔnɔnyɔkɔ ń taa nín̄ bí poon. Ubɔ kaa tí máaǹ kí dū ŋkpɔnɔnyɔkɔ àá tisiil kí ŋá saraa kí wà ŋŋmi kí tīī ti-Dindaan.

¹²Ama u ŋūǹ kí cáań kí ŋá tijincɔ̀fikaal saraau kí tīī ti-Dindaan. Ú taa pée dū-tì kí wà ŋŋmi nsaraafan pu kii saraa un sɔnsɔfiŋu sɔ̀ŋkī ti-Dindaan pɔbilee.

¹³«Tijimpin saraau kamaa poon máaǹ kí nīn cáá ŋyaam. Ú taa pée yàntī ŋyaam min sá ni-Nimbɔtiu poondi daaŋkuee ń lóó u-saraabi poon.

¹⁴«Tijincɔ̀fikaal ní ubɔ yaa cáań kí ŋá saraa kí tīī ti-Dindaanee, ú púĺ ifin kí yìlifì abil ní kí cáań kí ŋá saraa.

¹⁵Ú bàtī ŋkpam kí sìtī an pu ní kí dū talaalutuukaa kí páań. Tijimpin saraau dee.

¹⁶Usaraaŋal ń dū saraayee, an dàkà yii abil ŋin bi yīlifèe dijandi nì ŋkpamee nì talaalutuukaayee kɔkɔ kí wà ŋŋmi. An di sá tijimpin saraau un bi dùú wà ŋŋmi kí tīī ti-Dindaanee.»