Read Ntcham Lévitique 20 Bible Online

Lévitique 20 - Ntcham bible

Lévitique 20

¹Ti-Dindaan bí Mooyiisi

²ń tùkù Isirayeel yab yii: «Isirayeel yab kansikin ubɔ àá binicambi bin kóò Isirayeel tiŋkinee ubɔ di yaa dū u-biki ki ŋá saraa ki tīī diwaal Mooleekee, bí kpɔ̀-u. Samaa ń yāŋkì-u ataŋkpee kí kpɔ̀.

³Mama m-ba làá fàtī m-boon kí tīī udaan ní kí nyāntí-u Isirayeel nibul kansikin u nín dū u-biki ki ŋá saraa ki tīī diwaal Mooleeki, ki kɔ́ǹ m-circir kɔŋkooŋŋu tijɔkɔndi ki kpēē m-circir yindi fámee pu.

⁴Ama samaa yaa ŋá kii waa ká udaan nín dū u-biki ki ŋá saraa ki tīī Mooleekee, ní kaa kūū-uee,

⁵man m-ba di làá fàtī m-boon kí tīī udaan nì u-dicaŋku. M làá nyāntí-bi Isirayeel nibul kansikin, kí kpáaǹ bin kɔkɔ pée kútì u-pu ki ŋá saraa ki tīī diwaal Mooleekee.

⁶«Ubɔ yaa tí cūtì ubɔɔ cee ki búń tibɔɔl ki yíiń bitaŋkpiibi àá ki bālifì ki kpēē tin bí ki dòońee puee, m làá fàtī m-boon kí tīī udaan ní kí nyāntí-u Isirayeel nibul kansikin.

⁷«Nyāmaan tijɔkɔndin kí nīn bí circir, man di sá ni-Dindaan, ni-Nimbɔtiu.

⁸«Nín̄ ŋúb́maan m-bɔkpaaŋi, kí ŋá ŋi nín lī puee. Man di sá ni-Dindaan un gāntì-ni ní nīn sá man yabee.

⁹«Un di yaa sīī u-baa àá u-nee, bí kpɔ̀-u. Udaan nín sīī u-baa àá u-nee puee, u-kúm kpuulool ń gítí u-pu.

¹⁰«Ubɔ yaa dōoǹ nì u-juti nimpuuee, bí kpɔ̀ udaan nì unimpuee.

¹¹«Ubɔ yaa dōoǹ nì u-baa nimpuuee, udaan kpēē u-baa fám dee. Bí kpɔ̀ udaan nì unimpu gbanti, bi-kúm kpuulool ń fàtīí gítí bi-pu.

¹²«Ubɔ yaa dōoǹ nì u-jipɔɔn nimpuuee, bí kpɔ̀ udaan nì unimpuee, kun puee tin bi ŋée sá ntimbiil bɔti, ní bi-kúm kpuulool ń fàtīí gítí bi-pu.

¹³«Uninja yaa dōoǹ nì u-ninjajuti kii bi nín dɔ̀ nì unimpu puee, bi-liitil ŋá ntimbiil bɔti, bí kpɔ̀ bi-liitil ní bi-kúm kpuulool ń fàtīí gítí bi-pu.

¹⁴«Ubɔ yaa cáá unimpu nì u-nee, an sá tijɔkɔndi ní. Bí wà bi-taatil ŋŋmi bí kpú kí nyāntí tijɔkɔndi gbanti ni-kansikin.

¹⁵«Ubɔ yaa dōoǹ nì kuwaŋkuluuee, bí kpɔ̀ udaan kí kpɔ̀ kuwaŋkuluuee mun.

¹⁶«Unimpu yaa yāntì kuwaŋkuluu jɔ́m̀-uee, bí kpɔ̀-u kí kpɔ̀ kuwaŋkuluuee. Bí kpɔ̀ bi-liitil ní bi-kúm kpuulool ń fàtīí gítí bi-pu.

¹⁷«Ubɔ yaa cáá u-niisal pēē baa kaa pēē na, àá pēē na kaa pēē baa ní ki dōoǹ nì uee, bi ŋá icoo bɔti. Bí dáaĺ bi-tafal bi-nabiyaamu nimbiin. Udaan làá túń u-kpitii gìńdi u nín dōoǹ nì u-niisalee pu.

¹⁸«Ubɔ yaa dōoǹ nì unimpu un bíi fùul̀ ŋkpinee, bí nyāntí bi-liitil Isirayeel nibul kansikin, kun puee bi kpáfì kinyɔkɔ ki ká tinimpool.

¹⁹«Aa máaǹ kí dòon̄ nì a-na naal àá u-maan àá a-baa niisal. Ubɔ yaa dōoǹ nì unimpu u nì un pēē nnyeenee, bi-liitil làá túń bi-kpitii gìńdi.

²⁰«Ubɔ yaa dōoǹ nì u-baawaai nimpuuee, u kpēē u-baawaai gbanti fám dee. Bi-liitil làá túń bi-kpitii gìńdi. Bi kpá kí ká mmaal ní kí dāá kpáàa kpú.

²¹«Ubɔ yaa fōō u-maan àá u-naal nimpuu ki cááyee, an sá tijɔkɔndi ní. U nín ŋá mimmee, u kpēē u-naal àá u-maan gbanti fám dee. Bi kpá kí ká mmaal ní kí dāá kpáàa kpú.

²²«Nín̄ ŋúb́maan m-bɔkpaaŋi nì m-koobiliŋ kɔkɔ kí ŋá ŋi nín lī puee, án nín làá ŋá pu kitiŋ kin poon m cáǹ-ni nee ń taa dū-ni kí fée.

²³Ní taa fōō atimbun ŋin poon nib m làá jà ni-nyɔkɔpu nee koobiliŋ kí nīn ŋáań míǹ, kun puee bi-tuuŋŋi gbanti pu ní maa ti là kí wāl̀-bi.

²⁴M tùkū-ni ki síiǹ yii: <Nimbi di làá fōō bi-tiŋki, man di dū-kì ki tīī-ni. An sá kitiŋ kin poon nnaabiim nì tisiil còol̀ee ní[65]!> Man di sá ni-Dindaan, ni-Nimbɔtiu un di gāntì nimbi inibool kɔkɔ kansikinee.

²⁵An pu ní ni máaǹ kí béé kí gàntì tiwaŋkuti tin ni kòóyee nì tin naa kòóyee, nì nnɔmbiyaamu mun ni kòóyee nì mun naa kòóyee, án nín làá ŋá pu ní taa yàntī tiwaŋkuti nì nnɔmbiyaamu nì tin pée kpátì ki gbí kitiŋ pu, m gāntì yii ní nīn kòóyee ń kɔ́ǹ-ni tijɔkɔndee.

²⁶«Nín̄ bímaan circir kí nīn sá man yab, kun puee man ni-Dindaan bí circir ní, ní m gāntì-ni anibul kɔkɔ kansikin ní nīn sá man yab.

²⁷«Uninja àá unimpu yaa bí ni-kansikin ki būū tibɔɔl ki yíì bitaŋkpiibi àá ki sòoǹ tin bí ki dòońee puee, bí kpɔ̀ udaan. Bí yāŋkì udaan ataŋkpee kí kpɔ̀ ní u-kúm kpuulool ń gítí u-pu.»