Read Ntcham Lévitique 21 Bible Online

Lévitique 21 - Ntcham bible

Lévitique 21

¹Ti-Dindaan bí Mooyiisi ń tùkù bisaraaŋaliibi, Aarɔn jipɔmbi yii: «Unil ubɔ yaa kpíì bisaraaŋaliibi naakookunee, usaraaŋal ń taa gbēē-u kí kɔ́ǹ u-ba tijɔkɔndi.

²Asee an yaa sá u-niliu kiŋkiŋ, an dàkà yii u-na àá u-baa àá u-jipɔɔn àá u-bisal àá u-naal àá u-maan

³àá u-niisal un kaa láá mɔ́ǹee, kun puee u-niisal gbanti dáá gbíntìi bí u-dicaŋkun kaa mɔ́ǹ.

⁴Usaraaŋal sá uyidaan ní u-nibul kansikin, an puee waa máaǹ kí kɔ́ǹ u-ba tijɔkɔndi kí fá u-nyooti.

⁵«Bisaraaŋaliibi yaa ká dikpoolee, bí taa kòol̀ kí cùkū bi-yiliŋ àá kí kòol̀ bi-nyimpuliŋ kpaanceetii ŋmaniŋma àá kí cāfì bi-wunti nì njimu.

⁶Bi máaǹ kí dū bi-ba kɔkɔ kí sú man bi-Nimbɔtiu, kí nīn nyí kí taa bīil̀ m-yindi. Di sá yii bíǹ di tìì man bi-Dindaan bi-Nimbɔtiu saraabi bin bi cáa wù ŋŋmee. An puee ní bi máaǹ kí nīn bí circir.

⁷«Usaraaŋal ń taa cáá unimpu un ŋá dilaakpaatundi ki kée, àá unimpu un uninja ubɔ ŋmātiǹ-u ki dōoǹ nì uee, àá unimpu un cal jìn̄-uee, kun puee bi dū usaraaŋal ki sú man u-Nimbɔtiu ní.

⁸Isirayeel yab kɔkɔ máaǹ kí nīn nyí yii bisaraaŋaliibi sá circir nib ní, kun puee bíǹ di ŋáań saraabi ki tìì man ni-Nimbɔtiu. An puee ubɔ ń taa kpèè bisaraaŋaliibi nín bí circir puee fám. Di sá yii man ni-Dindaan bí circir ní, ní ki gāntì-ni ní nīn sá m-yab.

⁹«Usaraaŋal bisal yaa bíi ŋáań dilaakpaatundi ki bíil̀ u-bee, u-baa ní u bíi bíiĺ. Bí wà u-bisal gbanti ŋŋmi.

¹⁰«Usaraaŋakpil di sá un yil pu bi bātì ŋkpam ki sītì u pèentí asaraaŋabɔkutee. An puee ú taa yàntī u-yikpiti ń nīn bí fikil fikil, kí taa cátí u-wampeeŋkaati kí dàkà yii u bí kunimbaaun.

¹¹Ú taa sútí kí pìl̄ utaŋkpiil. Báà u-na àá u-baa di yaa kpíì, ú taa kɔ́ǹ u-ba tijɔkɔndi.

¹²Ú taa nyā ti-Dindaan circir kɔŋkooŋŋun kí bīil̀-ŋu. Di sá yii bi bātì man u-Nimbɔtiu kpam ki sītì u-yil pu ki dū-u ki sú-mi. Man di sá ni-Dindaan.

¹³«U yaa làá cáá unimpuee, ú cáá usapɔɔn un kaa nyí uninja ki kée.

¹⁴Ú taa cáá ukpiipu, kí taa cáá unimpu un cal jìn̄-uee àá un ŋá dilaakpaatundi ki bíil̀ u-bee. Ama ú kpèè u-nibul kansikin usapɔɔn un kaa nyí uninja ki kée kí cáá,

¹⁵án nín làá ŋá pu ú taa cáań mmaanyeen ŋun bíil̀ee u-maaliŋu poonee. Man di sá ni-Dindaan un gāntì-u ú nīn bí m-tundinee.»

¹⁶Ti-Dindaan bí Mooyiisi

¹⁷ń tùkù Aarɔn yii: «A-maaliŋu poon kí nīn cée, nsan kaa pú unil un laaba wɔ̀b̄ee ń sútí kí pìl̄ nsaraafan kí ŋá saraa kí tīī-mi.

¹⁸Tiŋman, un laaba wɔ̀b̄ee kaa máaǹ kí sútí kí pìl̄ nsaraafan, an dàkà yii ujɔfu, àá un tà u-taal puee, àá umaŋfamatifu, àá un taal àá u-ŋal ŋubɔ fɔ̀kɔǹ ŋun kíǹee, àá

¹⁹unil un taal àá u-ŋal fātèe,

²⁰àá ugulfu, àá kinikaŋkaliŋŋi, àá un nimbil pée, àá un cáá digbàndi àá tikalindee, àá ufaal.

²¹Usaraaŋakpil Aarɔn maaliŋu poonee, un laaba wɔ̀b̄ee kaa máaǹ kí sútí kí pìl̄ nsaraafan kí ŋá saraa bí dūú wà ŋŋmi kí tīī man ni-Dindaan. U nín wɔ̀b̄ee puee, waa máaǹ kí ŋá saraabi kí tīī man u-Nimbɔtiu.

²²U ŋūǹ kí jī tijin tin bi cáań ki ŋá saraa ki tīī man u-Nimbɔtiuee, saraabi bin sá circiree nì bin sá circir páaayee.

²³Ama u nín wɔ̀b̄ee puee, waa máaǹ kí sútí kí pìl̄ ŋŋaapìtikaa nì nsaraafan, án nín làá ŋá pu ú taa kpèè m-circir kɔŋkooŋŋu nì tin bí ŋu-poonee fámee. Di sá yii man di sá ni-Dindaan un gāntì bisaraaŋaliibi bí nīn bí m-tundinee.»

²⁴Ní Mooyiisi kàan̄ tibɔti gbanti ki tùkū Aarɔn nì u-jipɔmbi nì Isirayeel yab kɔkɔ.