Read Ntcham Lévitique 22 Bible Online

Lévitique 22 - Ntcham bible

Lévitique 22

¹Ti-Dindaan bí Mooyiisi yii:

²«Tùkù Aarɔn nì u-jipɔmbi yii, kí taa kpèè m-circir yindi fámee, bí nīn tɔ́ circir saraabi bin Isirayeel yab cāabìń ki tìì-mee. Man di sá ni-Dindaan.

³Tùkù-bi yii: «Ni-maaliŋu poon kí nīn cée, unil ubɔ yaa bí tijɔkɔndin ní ki sútì ki pìl̄ m-circir saraabi bin Isirayeel yab cāabìń ki tìì man ni-Dindaanee, bí nyāntí-u m-tundin. Man di sá ni-Dindaan.

⁴Aarɔn maaliŋu poon un di yaa būǹ dinyaŋgbandi àá batikuee kaa máaǹ kí jī circir saraabi jinti kí cáá sāā ŋwiin ŋun u làá pɔ̄ɔkèe. Míǹ mbaantiim un di yaa gbēē unil un gbēē dinikpil ki kɔ́ tijɔkɔndi, àá unil un nyéem̀ tijatee,

⁵àá unil un di yaa gbēē kuwaŋkuluu kun ni kòóyee ki kɔ́ tijɔkɔndee, àá unil un di yaa gbēē un bí tijɔkɔndee, báà tijɔkɔndi tin ní an yaa sée, udaan kaa máaǹ kí jī saraabi gbanti jinti.

⁶Un di yaa gbēē unil un bí mimmee kɔ́ tijɔkɔndi kí cáá sāā kujoou. Kí wàatī ú jī m-circir saraabi jintee, asee ú fàl̀.

⁷Ŋwìiń yaa jéetèe, u nyáń tijɔkɔndin. Míǹ boonee, u ŋūǹ kí nīn kíǹ ki jīǹ circir saraabi jinti, kun puee u-jinti dee.

⁸Usaraaŋal kaa máaǹ kí ŋmɔ́ kuwaŋkuluu kun kpíìyee, àá kun an cúúyee nanti án kɔ́ǹ-u tijɔkɔndi. Man di sá ni-Dindaan.

⁹«Bisaraaŋaliibi ń nīn ŋúb́ tin ní m kpáafì-bee, án nín làá ŋá pu saraabi jinti puee, bí taa yòon̄ ikpiti iba kí túńee. Bi yaa kpēē saraabi jinti fámee, asee bí kpú. Man di sá ni-Dindaan un gāntì bisaraaŋaliibi bí nīn bí m-tundinee.

¹⁰«Unil un kaa sá usaraaŋal dicaŋkunee kaa máaǹ kí jī circir saraabi jinti. Unicaan un dɔ́miń ki kɔ́ usaraaŋal puee nì usaraaŋal paadaaŋwu kaa máaǹ kí jī circir saraabi gbanti jinti.

¹¹Ama usaraaŋal yumbuu un u dū u-nimbiliŋ ki dée, nì un bi màl̄ u-dicaŋkunee ŋūǹ kí jī tijin tin usaraaŋal jīǹee.

¹²Usaraaŋal bisal yaa kaa mɔ́ǹ bisaraaŋaliibi naakookunee, waa cáá nsan kí jī tijin tin ní bi lēē circir saraabi poonee.

¹³Ama usaraaŋal bisal yaa kpántì ukpiipu, àá u nì u-cal yākatì tɔbin waa cáá kibiki, ní ki fātìi gítì u-baa dicaŋkun ki kā kii u nín nìn pée kā u-sapɔntin puee, u ŋūǹ kí jī tijin tin u-baa jīǹee. Un kaa sá bisaraaŋaliibi naakookunee kaa cáá nsan kí jī tijin gbanti.

¹⁴«Ubɔ yaa kaa nyí ní ki jíń circir saraabi jintee, ú nyàab̀ tin u jíńee nyɔkɔm kí cáań kí téeǹ usaraaŋal, ní kí kūtì bi yaa yākatì tin u jíńee miŋmoo puee diba pu.

¹⁵«Bisaraaŋaliibi ń taa kpèè Isirayeel yab nín lèekī dijandi din bi-saraabi poon ki tìì man bi-Dindaanee fám.

¹⁶Bi yaa kaa máaǹ kí jī tijin gbanti ní ki jíń-tèe, bi kɔ́ tibɔtin ní an bàlifī yii bí ŋāŋkì. Man di sá ni-Dindaan un gāntì bisaraaŋaliibi bí nīn bí m-tundinee.»

¹⁷Ti-Dindaan bí Mooyiisi

¹⁸ń tùkù Aarɔn nì u-jipɔmbi nì Isirayeel yab kɔkɔ yii: «Isirayeel yab ubɔ àá binicambi bin kóò Isirayeel tiŋkinee ubɔ yaa là kí ŋá saraawɔkaa kí tīī man ni-Dindaanee, an yaa sá kí pà ipooneeee, an yaa tí sá kí ŋá nlammɔntiim saraaueeee,

¹⁹udaan ń cáań unaja àá upìja àá uŋɔja ní ḿ nín fōō u-saraau.

²⁰Ní taa dū kuwaŋkuluu kun laaba wɔ̀b̄ee kí ŋá saraa kí tīī-mi, di sá yii maa làá fōō an saraau[66].

²¹Ubɔ yaa là kí ŋá mpèé saraauee, an yaa sá kí pà ipooneeee, an yaa sá nlammɔntiim saraaueeee, án nīn sá unaa àá upii àá uŋoobu un laaba kaa wɔ̀b̄ee ní ḿ nín fōō saraa gbanti.

²²Ní taa dū kuwaŋkuluu kun jɔ̀b̄ee, àá kun an kūū àá kun fōō tiweendee, àá kun cáá ibuun àá digbàndi àá kideeŋŋee kí ŋá saraa kí tīī man ni-Dindaan. Ní taa dū tiwaŋkuti tin bí mimmee kí ŋá saraa bí cáá wà ŋŋmi nsaraafan pu kí tīī man.

²³Ni ŋūǹ kí dū unaa àá upii un taal diba fɔ̀kɔǹ ŋin kíǹee, àá un taal diba kaa fɔ̀kɔ̀ ki bàn̄ ŋin kíǹee kí ŋá nlammɔntiim saraau kí tīī man ni-Dindaan, ama naa ŋūǹ kí dū-u kí ŋá saraa kí pà ipoon ḿ fōō.

²⁴Ní taa dū kuwaŋkuluu kun kuntancakabiliŋ wīī àá ki mátì àá bi gíí ki lēēyee kí ŋá saraa kí tīī man ni-Dindaan. Naa máaǹ kí ŋá míǹ gba ni-tiŋkin.

²⁵Ní taa dā unicaan ubɔ cee tiwaŋkuti tin bi fāatì mimmee kí ŋá saraa kí tīī man ni-Dindaan. Bi nín fāatì-tì mimmee, ti wɔ̀b̄ dee. Ni yaa dū-tì ki ŋá saraayee, maa làá fōō-tì.»

²⁶Ti-Dindaan bí Mooyiisi yii:

²⁷«Bi yaa màl̄ kinabiki àá kipibiki àá kiŋɔbikee, kí nīn bí ki-na cee kí cáá sāā iwiin iluli. Kí yòon̄ iwiin inii dal kí nīn cée, bi yaa dū-kì ki ŋá saraa ki wùn̄ ŋŋmi kí tīī-mee, m làá fōō.

²⁸Ama ní taa kpɔ̀ unaaŋkpil àá upiŋkpil àá uŋɔŋkpil nì u-biki ŋwimbaanti.

²⁹«Ni yaa bíi ŋáań ijaam saraauee, nóómaan mara nín sá puee ní ḿ fōō.

³⁰Ní ŋmɔ́ tinan kɔkɔ ŋwiin gbanti kí taa yàntī tiba ń kíń kí wúntí kutaa. Man di sá ni-Dindaan.

³¹«Nín̄ ŋúb́maan m-marab kí ŋá bi nín lī puee. Man di sá ni-Dindaan.

³²Ní taa kpèè m-circir yindi fám, án nín làá ŋá pu Isirayeel yab kɔkɔ ń béé yii m sá circirdaanee. Man di sá ni-Dindaan un gāntì-ni ní nīn sá man yabee.

³³Man di nyántìń-ni Eejipiti tiŋkin kí nīn sá ni-Nimbɔtiu. Man di sá ni-Dindaan.»