Read Ntcham Lévitique 23 Bible Online

Lévitique 23 - Ntcham bible

Lévitique 23

¹Ti-Dindaan bí Mooyiisi

²ń tùkù Isirayeel yab yii: «Ni yaa kóoǹ ki kpáfì kí jāam̀ man ni-Dindaanee, jiŋaakpaambi bin ni làá nīn jīǹee sɔ̀.

³«Kinyɔŋ poonee, ni cáá iwiin iluu kí tɔ̄ ni-tundi. Ama ŋwinluluúti dal sá ŋwiŋŋuŋfikaa ní, diŋuŋfil wiiŋŋu ŋun ni làá kóoǹ kí kpāfì kí jāam̀-mee. Laakin kamaa ni yaa bàn̄ ki kóòyee, ní taa tɔ̄ ditundi ŋwiŋŋuŋfikaa dal, ama ní dū-ŋu kí sú-mi[67].»

⁴Man ni-Dindaan jiŋaalib bin ŋyunti yaa bàn̄ ní kóoǹ kí kpāfì kí jī kí jāam̀-mee sɔ̀.

⁵Dilákatil jiŋaaliu un bi jīǹ ki tìì ti-Dindaan tinyoolee kífí uŋmapeepeekaa, ŋwiin ŋubɔ kpá saalku dal kujoopɔŋ ní[68].

⁶«Iwiin saalku dalee, ní jī jiŋaal un bi ŋmóò kpɔnɔb bin kaa cáá ŋkpɔnɔnyɔkɔee kí jāam̀ ti-Dindaan. Ní ŋmɔ́ kpɔnɔb bin kaa cáá ŋkpɔnɔnyɔkɔee iwiin iluli.

⁷Kinyɔŋ gbanti wimpeepeekaaŋuee, ní kóoǹ kí kpāfì kí jāam̀-mi. Yaadalee ní taa tɔ̄ ditundi báà diba.

⁸Iwiin iluli gbanti kɔkɔ poonee, ní ŋá saraabi kí dūú wà ŋŋmi kí tīī man ni-Dindaan. Ŋwinluluúti dalee, ní kóoǹ kí kpāfì kí jāam̀-mi. Ní taa tɔ̄ ditundi báà diba[69].»

⁹Ti-Dindaan bí Mooyiisi

¹⁰ń tùkù Isirayeel yab yii: «Ni yaa láa kɔ́ kitiŋ kin m làá tīī-nee poon, ní ki yaa láa bíi cēē ni-kpaajintee, dibɔ́ndi din ni làá péé péé kí cēē, ní cáań kí tīī usaraaŋal.

¹¹Ŋwiŋŋuŋfikaa yaa jítì ku wúntèe, usaraaŋal ń yòon̄ dibɔ́ndee kí cáań ti-Dindaan nimbiin, ní kí yòon̄-dì yilpu kí túĺ kutaa kí fíiǹ fíiǹ ní ti-Dindaan ń fōō.

¹²Daliŋkin ni làá cáań tijincɔ̀fikaal dibɔ́ndi ti-Dindaan nimbiinee, ní cáań dipibil din cáá dibindi diba di-laaba kaa wɔ̀b̄ee kí ŋá saraawɔkaa kí tīī ti-Dindaan.

¹³Ní dū ŋyim min bi dū ŋkpam ki búuńee kiiloobi biluu kí ŋá saraa. An sá saraa un bi dùú wà ŋŋmi u-sɔnsɔfiŋu sɔ̀ŋkī m-pɔbilee. Ní dāá dū ndamam liitiri ubɔ nì dijandi mun kí fá-mi.

¹⁴Naa máaǹ kí ŋmɔ́ tijimpɔn gbanti kpɔnɔu àá ti-fiŋyi in bi púĺee, àá ti-biliŋ ŋin sá apɔɔnee kí dāá sāā ŋwiin ŋun ní ni làá cáań saraa kí tīī man ni-Nimbɔtiuee. Laakin kamaa ni yaa bàn̄ ki kóòyee, ní nīn ŋúb́ dibɔkpaal nee kí nīn cáa cá jaanjaan.»

¹⁵«Ŋwiŋŋuŋfikaa ŋun ni cáań tijincɔ̀fikaalee, ku yaa wúntèe ní kíĺ kí kàaǹ nnyɔmu mululi.

¹⁶Ní kàaǹ iwiin imuŋku ili nì saalaa kí cáá sāā kutaa ń wúntí nnyɔmu mululi wiŋŋuŋfikaaŋu, ní ní cáań tijimpɔn saraau kí tīī man ni-Dindaan.

¹⁷Laakin kamaa ní ni yaa kóòyee, ní cáań kpɔnɔb bin ni dū ŋyim kiiloobi biluu nì ŋkpɔnɔnyɔkɔ ki ŋée bili kí fíiǹ fíiǹ kí tīī man ni-Dindaan. An di sá tijincɔ̀fikaal saraau un ni cáań ki tīī man ni-Dindaanee.

¹⁸Ní cáań apibil aluli ŋin cáá dibindi diba ŋi-laaba kaa wɔ̀b̄ee, nì unaja nì ipijaa ili kí kūtì kpɔnɔbee pu. Ní dū an waŋkutee kí ŋá saraawɔkaa, kí kpáaǹ tijin saraau nì ndaam min bi cáa kútí saraabi gbanti puee. An di sá saraa un bi dùú wà ŋŋmi u-sɔnsɔfiŋu sɔ̀ŋkī man ni-Dindaan pɔbilee.

¹⁹Míǹ boonee ní ní dū uŋɔja mun kí ŋá ikpiti pɔ̄tam saraau, ní kí dū apibil ŋin cáá dibindi dibee ali kí ŋá mpèé saraau.

²⁰Niinee ní usaraaŋal ń yòon̄ apibil alee nì tijincɔ̀fikaal kpɔnɔbee yilpu kí fíiǹ fíiǹ man ni-Dindaan nimbiin. Saraabi gbantee, bi dū-bi ki sú man dee, usaraaŋal di yì.

²¹Yaadal wiiŋŋuee, ní kóoǹ samaa kɔkɔ kí kpāfì kí jāam̀-mi. Ní taa tɔ̄ ditundi báà diba. Laakin kamaa ni yaa bàn̄ ki kóòyee, ní nīn ŋúb́ dibɔkpaal nee kí nīn cáa cá jaanjaan[70].

²²«Ni yaa láa bíi cēē ni-kpaajintee, ní taa cā kí bà ŋkpaabuku, kí taa gítí ni-boon mun kí lūlifì. Dūú tīīmaan bifalaadambi nì binicambi. Man di sá ni-Dindaan, ni-Nimbɔtiu[71].»

²³Ti-Dindaan gíti bí Mooyiisi

²⁴ń tùkù Isirayeel yab yii: «Uŋmaluluúti wimpeekaaŋu dal sá diŋuŋfikpaandi wiiŋŋu ní. Ŋwiin gbantee, ní kóoǹ kí kpāfì kí fáá iwiliili kí téetí m-pu.

²⁵Ní taa tɔ̄ ditundi báà diba, ní kí dāá ŋá saraabi kí dūú wà ŋŋmi kí tīī man ni-Dindaan[72].»

²⁶Ti-Dindaan bí Mooyiisi yii:

²⁷«Uŋmaluluúti poon iwiin saalaa dal sá ikpiti pɔ̄tam wiŋkpaaŋŋu ní[73]. Ní dāá kóoǹ kí kpāfì kí bóob́ kinyɔkɔ kí ŋá saraabi kí dūú wà ŋŋmi kí tīī man ni-Dindaan.

²⁸Ní taa láa tɔ̄ ditundi báà diba ŋwiin gbanti, kun puee an sá ikpiti pɔ̄tam wiŋkpaaŋŋu ŋun bi ŋáań ni-pu akoobil ki fíntí ni-kpitii kɔkɔ man ni-Dindaan ni-Nimbɔtiu nimbiinee ní.

²⁹Un yaa kaa bóob́ kinyɔkɔ ŋwiin gbantee, bí nyāntí-u Isirayeel nibul kansikin.

³⁰Un mun di yaa tí túń ditundi ŋwiin gbantee, mama m-ba di làá kúntí-u Isirayeel nibul kansikin.

³¹Ní taa pée tɔ̄ ditundi ní. Laakin kamaa ni yaa bàn̄ ki kóòyee, ní nīn ŋúb́ dibɔkpaal nee kí nīn cáa cá jaanjaan.

³²An sá diŋuŋfil wiiŋŋu kii ni nín ŋáań pu ŋwiŋŋuŋfikaa dalee ní. Ní dāá bóob́ kinyɔkɔ. Uŋmal gbanti poon iwiin iwa dal kujoou kí cáá sāā ku yaa wúntèe kujoou ní ŋwiŋŋuŋfikaa gbanti sá[74].»

³³Ti-Dindaan bí Mooyiisi

³⁴ń tùkù Isirayeel yab yii: «Uŋmaluluúti gbanti poon iwiin saalku dalee, ní jī tantib jiŋaaliu kí tīī man ni-Dindaan yindi tinyool. Ní dāá jī jiŋaal gbanti iwiin iluli.

³⁵Ŋwimpeepeekaa dalee, ní kóoǹ kí kpāfì kí jāam̀-mi. Ní taa tɔ̄ ditundi báà diba.

³⁶Iwiin iluli gbanti kɔkɔ poonee, ní ŋá saraabi kí dùú wà ŋŋmi kí tīī man ni-Dindaan. Ŋwinniniiti dalee, ní kóoǹ kí kpáfì kí jāam̀-mi ní kí ŋá saraa kí dūú wà ŋŋmi kí tīī-mi. Yaadal ní jiŋaal gbanti kúntí. Ní taa láa tɔ̄ ditundi báà diba.

³⁷«Jiŋaalib bin ni máaǹ kí nīn jīǹ ki tìì man ni-Dindaan tinyoolee dee. Ni yaa bíi jīǹ jiŋaalib gbantee, ní kóoǹ kí kpāfì kí jāam̀ man ni-Dindaan, kí nīn ŋáań saraawɔkaa nì tijin saraabi nì mpèé saraabi nì ndaam saraabi kii jiŋaal kamaa wiiŋŋu koobiliŋ nín sá puee.

³⁸Saraabi gbanti sá kí dūú kūtì bin ni ŋáań ŋwiŋŋuŋfikaa kamaa dalee pu ní, ní kí kūtì dipɔl saraau nì saraabi bin bi ŋáań kí pà ipoon pɔndee nì nlammɔntiim saraabi bin ni pée ŋáań ki tìì man ni-Dindaanee.

³⁹«Ni yaa cáń ni-kpaajinti uŋmaluluúti iwiin saalku dalee, ní jī iwiin iluli jiŋaaliu kí tīī man ni-Dindaan yindi tinyool. Ŋwimpeepeekaa dal nì ŋwinniniiti dal sá diŋuŋfil wiiŋyi ní.

⁴⁰Ŋwimpeepeekaa dalee, ní nyàab̀ asubimɔnti nì tikpakpati nì isufi in cáá tifaal sùuuyee paŋŋi nì ŋkpinni sufii faati, ní kí fàal̀ man ni-Dindaan ni-Nimbɔtiu nimbiin iwiin iluli[75].

⁴¹Dibindi kamaayee, ní dū iwiin iluli kí jī jiŋaal nee kí tīī man ni-Dindaan tinyool. Ní nīn ŋúb́ dibɔkpaal nee kí nīn cáa cá jaanjaan. Uŋmaluluúti poonee, ní jī jiŋaal gbanti.

⁴²Iwiin iluli gbantee, nimbi Isirayeel yab kɔkɔ ń nīn kóò tantib poon.

⁴³Mimmee ni-biyaamu kɔkɔ làá béé yii m nín nìn nyántìń-ni Eejipiti tiŋkinee, tantib poon ní m nìn yāntì ni kóò. Man di sá ni-Dindaan, ni-Nimbɔtiu[76].»

⁴⁴Míǹ ní Mooyiisi cántì ki tùkū Isirayeel yab bi nín máaǹ kí nīn jīǹ ti-Dindaan jiŋaalib ki tìì-u tinyool puee.