Read Ntcham Lévitique 24 Bible Online

Lévitique 24 - Ntcham bible

Lévitique 24

¹Ti-Dindaan bí Mooyiisi yii:

²«Yàntī Isirayeel yab ń cáań-si ɔliifi kpam min ŋān̄ ki wāĺ kílkilee á dūú ŋá fitilab poon, án nín làá ŋá pu fitilab ń nīn pée fòol̄ ŋyunti kamaayee.

³Aarɔn ń dū fitilab gbanti kí síiń circir kɔŋkooŋŋu poon, ŋŋaapìtikaa ŋun bīī baa wāĺ Dipoondi dakaauee nimbiin. Ú bɔ́ntí-bi tiŋan án nín làá ŋá pu fitilabee ń nīn pée fòol̄ ŋyunti kamaa kí yòon̄ kujoou kí cáá sāā kutaafaauee. Ní nīn ŋúb́ dibɔkpaal nee kí nīn cáa cá jaanjaan.

⁴Aarɔn máaǹ kí nīn kpèé fitilab bin tɔ́kɔ́ fitilab tɔ́kɔŋkaati tin bi dū sindaariya ki nyūntèe pu, ní bí nīn fòol̄ ŋyunti kamaa ti-Dindaan nimbiin.»

⁵«Á dū ŋyim kí ŋá kpɔnɔb saalaa nì bili, kpɔnɔ kamaa nyiŋfiŋu ń nīn sá kiiloobi biluu.

⁶Á dū-bi kí páań teebil un sí m-nimbiin bi dū sindaariya ki nyūntèe pu. Á páań-bi ipɔ̀n ili pu, mpɔ̀n kamaa ń nīn cáá kpɔnɔb biluu[77].

⁷Mpɔ̀n kamaa puee, á dū talaalu un sá umɔntee kí páań án nīn sá kudaaŋŋu man Unimbɔti nimbiin yii saraa gbanti sá ki tīī-mi, ní bí dāá dū talaaluee kí wà ŋŋmi kpɔnɔbee yil pu kí tīī man ni-Dindaan.»

⁸«Ŋwiŋŋuŋfikaa kamaa kí yòon̄ kí nīn cá jaanjaanee, ní nīn pāantí kpɔnɔb gbanti man ni-Dindaan nimbiin. Án nīn sá tin Isirayeel yab máaǹ kí nīn ŋáań ki cá jaanjaanee.

⁹Aarɔn nì u-jipɔmbi di yì kpɔnɔb gbanti. Bi yaa làá ŋmɔ́-bee, bí ŋmɔ́-bi mpaan ŋun bí circiree pu. Di sá yii saraabi gbanti sá circir páaa wanti tin bi lēē circir saraabi bin bi dù kí wà ŋŋmi kí tīī man ni-Dindaanee poon ní. Bíǹ di yì-tì kí nīn cá jaanjaan[78].»

¹⁰Unaacimpɔɔn ubɔ di nìn bí ní u-na sá uisirayeelnimpu ní u-baa sá ueejipitija, ní u dɔ́miń ki kóò Isirayeel yab kansikin. Dalbee, dinaapaal pu niinee, ní kujaau kɔ́ unaacimpɔɔnee nì Isirayeel tindambiki kiba kansikin.

¹¹Niinee, unaacimpɔɔn un na sá Isirayeelee kíĺ ki bíi sòoǹ ki bíiĺ Unimbɔti yindi ki sìí-u. Ní bi cáań-u Mooyiisi cee. U-na Dibrii bisal Seeloomiiti nìn sá Daani naakookun ní.

¹²Ní bi dū-u ki pīiǹ kudii kí cīití ti-Dindaan u-ba ń sòoǹ u-bɔti.

¹³Niinee ní ti-Dindaan bí Mooyiisi yii:

¹⁴«Nyāntí kijapaayee dinaapaal kpaanceetiŋu ní bin kɔkɔ gbìl̄ u nín sòon̄ puee ń dū bi-ŋalii kí páań u-yil pu, ní samaa kɔkɔ ń yāŋkì-u ataŋkpee kí kpɔ̀.

¹⁵Á sòoǹ nì Isirayeel yab kí kpāafì-bi tibɔti nee yii: «Un di yaa sòon̄ ki bíil̀ u-Nimbɔtiuee, see ú túń u-kpitii tafadaaldi.

¹⁶Un yaa sòon̄ ki bíil̀ man ni-Dindaan yindee, see bí kpɔ̀-u. Samaa kɔkɔ ń yāŋkì-u ataŋkpee. Udaan yaa sá unicaanaaa, kitindambikaaa, u nín pée ŋá pu ní ki sòon̄ ki bíil̀ Unimbɔti yindee, see ú kpú.

¹⁷«Unil un yaa lēē u-juti maŋfalee, bí lēē u mun yal[79].

¹⁸U yaa tí kūū ubɔ waŋkulukuee, ú nyàab̄ kí téeǹ-u.

¹⁹«Ubɔ yaa ŋá u-juti tiweendee, bí ŋá u mun tiweendi.

²⁰Un yaa fáá ki gíì u-juti kpabilee, bí fáá kí gíí u mun yal, un yaa lēē u-juti nimbilee, bí lēē u mun yal, un yaa lēē u-juti nyindee, bí lēē u mun nyindi. Un yaa pée ŋá u-juti tiweendi tiŋyee, bí ŋá u mun míǹ deedee[80].

²¹«Un yaa kūū kuwaŋkuluuee, ú nyàab̀ kubɔ kí téeǹ. Ama un yaa kūū unilee, bí kpɔ̀ u mun.

²²«Ni nín sòoǹ unicaan bɔti puee, míǹ mbaantiim ní ni máaǹ kí sòoǹ kitindambiki mun bɔti, di sá yii man di sá ni-Dindaan ni-Nimbɔtiu[81].»

²³Míǹ ní Mooyiisi nìn sòon̄ nì Isirayeel yab. Bi nìn nyántì un sòon̄ ki bíil̀ Unimbɔti yindee dinaapaal kpaanceetiŋu ní ki yáŋkì-u ataŋkpee ki kūū. Ti-Dindaan nín nìn tùkū Mooyiisi yii bí ŋá puee, míǹ deedee ní bi nìn ŋá.