Read Ntcham Lévitique 25 Bible Online

Lévitique 25 - Ntcham bible

Lévitique 25

¹Ti-Dindaan sòon̄ nì Mooyiisi Siinaayi jool pu ki bí

²ú tùkù Isirayeel yab yii: «Ni yaa láa kɔ́ kitiŋ kin m làá dūú tīī-nee poonee, dibinluluútiil kamaayee, ní dāá yàntī kí taa kpɔ̀ ni-kpaatanti kí tīī man ni-Dindaan tinyool.

³Ní dāá dū abin aluu kí kpɔ̀ kí bɔ̄l̀ ni-sati, kí ŋāŋkì ni-fiinyi sufii paŋŋi ní kí kìtī abil.

⁴Ama dibinluluútiilee, ní dāá yàntī ni-kpaatanti ń dòon̄ kí ŋùŋfì. Ní dāá dū dibindi gbanti kí sú man ni-Dindaan. Ní taa láa kpɔ̀ kí bɔ̄l̀ ni-sati, kí taa ŋāŋkì ni-fiinyi sufii paŋŋi.

⁵Ní taa láa cā dibindi din jítèe jinti tin sá aleenee àá kí kìtī ni-fiinyi sufii paŋŋi ŋin naa ŋáŋkèe pu abil, kun puee an dāa sá dibindi din tikpaatan máaǹ kí dòon̄ kí ŋùŋfèe ní.

⁶Ama nimbi ni-ba nì ni-tɔntɔnliibi bininjab nì binimpoobi nì ni-paadambi nì bin kóò ni-puee dāa ŋūǹ kí jī tin kitiŋ làá dāá lòoǹ dibindi gbantee.

⁷Míǹ mbaantiim ní ni-waŋkuti nì ipeel in bí ni-tiŋkinee mun dāa ŋūǹ kí jī tin ni-tiŋki làá dāá lòoǹee[82].»

⁸«Ní kàaǹ abin aluli miluli pu, an dàkà yii dibindi diba kpá ili nì saalaa.

⁹Uŋmaluluúti, iwiin saalaa dal, an dàkà yii ikpiti pɔ̄tam wiŋkpaaŋŋu dalee, ní búń ŋyin kí fáá iwiliili kitiŋ kɔkɔ poon.

¹⁰Ni yaa ŋá mimmee, ni dū dibindi ili nì disaalaatiilee ki sú Unimbɔti dee, ní kí bāakì kitiŋ kɔkɔ poon yii báà ŋma ń fōō u-ba. Dibindi gbanti ní bi yíì yii dibatɔl bindi. Báà ŋma ń dāá fàtīí fōō u-kpaatanti tin u nìn dūu nyáfèe, ní bin nìn dū bi-ba ki nyáfèe ń fàtīí kpì bi-dumpui.

¹¹Abin ili nì disaalaatiil sá dibatɔl bindi ní ki tīī-ni. Ní taa kpɔ̀ kí bɔ̄l̀ tiba, kí taa cā dibindi din jítèe jinti tin sá aleenee àá kí kìtī ni-fiinyi sufii paŋŋi ŋin naa ŋáŋkèe pu abil.

¹²Di sá yii an sá dibatɔl bindi ní bi dūu sú ti-Dindaan. Ni ŋūǹ kí jī tin kitiŋ làá dāá lòoǹee.

¹³«Dibatɔl bindi gbanti poonee, báà ŋma ń fàtīí fōō u-kpaatanti tin u nìn dūu nyáfèe.

¹⁴Ni yaa bíi nyáfíǹ ni-nabiki tikpaatan àá ni bíi dāā u-cee tikpaatanee, ní taa mùul̀ tɔb.

¹⁵Tikpaatanee daaku ń nóó nì abin ŋin páaǹ dibatɔl bindi din jítèe puee, ní kí kpèè ŋin kíǹ bí kpɔ̀ tikpaatanee pu ní dibatɔl bindi dipɔndi ń nín bàńee.

¹⁶Abin yaa kíǹ ki náaǹee, kudaau mun máaǹ kí nīn pɔ̄ɔ̄ ní, ní abin ŋin kíǹee yaa kaa ti náaǹee, kudaau ń nīn pɔ̀fì, kun puee abin ŋin kíǹ ní kpɔ̀ tikpaatanee puee ní ni máaǹ kí kpèè ní kí nyāfiǹ-u.

¹⁷Ni-kansikin ubɔ ń taa mùul̀ u-nabiki, ama ní fàŋkì man ni-Nimbɔtiu, kun puee man di sá ni-Dindaan ni-Nimbɔtiu.

¹⁸Nín̄ ŋúb́maan m-bɔkpaaŋi nì m-koobiliŋ kí ŋá ŋi nín lī puee, án di làá yàntī ní kàl̄ kitiŋ nee poon nì ŋgbansɔŋfi.

¹⁹Kitiŋ làá dāá lòoǹ mmɔntiim ní ká kí jī kí díkí, ní kí dāá kàl̄ ki-poon nì ŋgbansɔŋfi.

²⁰«An yaa yíì ni ŋūǹ kí bàlifì ni-ba yii: <Ti nín kaa cáá nsan kí kpɔ̀ kí bɔ̄l̀ ti-sati, kaa tí cáá nsan kí cā dibinluluútiil kamaa nee, kin ba ní ti làá nīn jīǹ dee?>

²¹Tiŋman, m làá dāá bìin̄ ni-boon ní dibinluluutiil ń lòoǹ abin ata jinti.

²²Ni dāa bí ki būul̀ dibinniniitiil poon ní ki jīǹ tijiŋkpikil kí cáá sāā dibiŋwawatiil poon, ŋyunti ŋun ni làá dāá cā tijimpɔnee.»

²³Ní taa nyāfì kitiŋ katanjoolii, di sá yii man di yì kitiŋ. Nimbi kóò man pu kii binikɔkaabi àá binicambee ní.

²⁴An puee kitiŋ kin m làá dūú tīī-nee kɔkɔ poonee, ní dāá pɔ̄ un dū u-tiŋki ki nyáfèe nsan ú dāá fàtīí dā-kì.

²⁵Disool yaa cúú ni-nabiyaamu kansikin kiba ní kì gíí ki-kpaatanti dijandi ki nyáfèe, udaan nabiki u nì un pēē udaan cáá nsan kí fàtīí dā tikpaatan gbantee ń dā-tì.

²⁶Udaan yaa kaa cáá u nì un pēēyee ń fàtīí dā kitiŋee, ama ní úǹ u-ba ká ŋŋmam kí fàtīí dēe,

²⁷ú cɔ́tí u nín nyáfì kitiŋee abin nín nyáń puee, kí pà abin ŋin kíǹ dibatɔl bindi ń nín bàńee nimbiliŋ kí tīī un u nìn dū u-tiŋki ki nyáfiǹee, ní kí fàtīí fōō u-tiŋki.

²⁸Ama úǹ u-ba yaa kaa ká ŋŋmam kí pà kí fàtīí fōō u-tiŋkee, kí gbíntí un di dá-kèe ŋaan kí cáá sāā dibatɔl bindi. Dibatɔl bindi gbanti poonee, ú fàtīí fōō u-tiŋki.

²⁹Kudii yaa bí kitiŋ kin bi máń digundi ki māntìi túee poon ní ubɔ dū-ku ki nyáfèe, udaan cáá dibimmɔndi kí fàtīí dā-ku. An kaa máaǹ kí jītí dibindi pu, kí kíĺ ŋwiin ŋun u dū-ku ki nyáfèe.

³⁰Dibimmɔndi yaa jítì ní un nyáfì kudiiyee kaa ŋúń ki fātìi dá-kuee, un di dá kudiiyee nì u-naantiibi di kíǹ ki yì-ku kí nīn cá talku. An kaa ti bàlifī yii ú gíiǹ kudiiyee kí tīī un cee u nìn dée dibatɔl bindin.

³¹Ama adiin ŋin bí ntimbilimu mun baa máń digundi ki māntìi túee poonee ŋman bí kii tikpaatanee dee. Bi cáá nsan kí fàtīí dā-ŋi, ní dibatɔl bindi poonee, bí fàtīí fōō-ŋi.

³²Leefii yab bíǹ cáá nsan ŋyunti ŋun ní bi yaa lèe kí fàtīí dā bi-diiŋŋi ŋin yú bi-timmu poon bi dūu nyáfèe[83].

³³Báà gba Leefii yab ubɔ di yaa fātìi dá u-juti uleefiija cee kudii ní dibatɔl bindi yaa bāańee, an sá ú nyā ní kí gíiǹ kudiiyee kí tīī ku-dindaan. Di sá yii Leefii yab diiŋŋi sá bi-fakal ní Isirayeel yab kansikin.

³⁴Ama tikpaatan tin māntìi tú ntimu mun poon bi kóòyee, baa máaǹ kí dūú nyāfì. Di sá yii an sá bi-wanti ní kí nīn cá talku.

³⁵«A-nabiki yaa kpántì usoodaan kaa ti ŋūǹ kí kpèè u-bee, á tūtuǹ-u, kí tīī-u ú jī kí ŋmátí. An yaa sá unicaaneeee, unikɔkaayeeee, á ŋá míǹ kí tīī-u[84].

³⁶Á taa yàntī ú dāá téeǹ-si kí jītíǹ tin a tīī-uee pu, ama á fàŋkì man Unimbɔti, kí yàntī ú nīn bí ki kɔ́ĺ-si.

³⁷Á taa pìnnì a-nabiki animbil kí yàntī ú dāá téeǹ-si kí páań, kí taa tí pìnnì-u tijin ú dāá téeǹ-si kí páań[85].

³⁸Man di sá ni-Dindaan, ni-Nimbɔtiu un di nyántìń-ni Eejipiti tiŋkin ki dū Kanaan tiŋki ki tīī-ni, án nín làá ŋá pu ḿ nīn sá ni-Nimbɔtiuee.»

³⁹«A-nabiki yaa kpántì usoodaan ní ki dū u-ba ki nyáfiǹ-see, á taa tīī-u ditundi din sá uyumbu tundee.

⁴⁰Nín̄ ŋúb́-u kii bi nín ŋúb̀ upaadaan àá unikɔkaa puee. Ú nīn bí a-cee ki tūǹ ditundi kí cáá sāā dibatɔl bindi.

⁴¹Ŋyunti gbantee, u tɔ́ u-ba ki kpáaǹ u-biyaamu kí fàtīí gítí u-dicaŋkun, u-baabi timmun.

⁴²Di sá yii Isirayeel yab bin m nyántìń Eejipiti tiŋkinee sá man tɔntɔnliibi ní. Baa ti máaǹ kí dū-bi kí nyāfì kii bi nín nyáfí iyumbu puee.

⁴³Ní fàŋkìmaan man ni-Nimbɔtiu kí taa wɔ́b́-bi.

⁴⁴«Ni yaa là kí nīn cáá iyumbu, bininjab nì binimpoobee, atimbun ŋin māntìi tú-nee yab cee ní ní dā-i.

⁴⁵Ni tí ŋūǹ kí dā binicambi bin kóò ni-kansikinee nì bi-dicaŋŋi poon mbiyaamu mun bi màl̄ ni-tiŋkinee bí kpántí ni-yumbui ní nīn yì.

⁴⁶Ni-kpátam boonee, bí kpántí ni-biyaamu fakal bí nīn yì. Bimbee, ni ŋūǹ kí yàntī bí nīn sá iyumbu kí nīn cá jaanjaan, ama ni-kansikin ubɔ ń taa wɔ́b́ u-nabiki kin sá Isirayeel yab kansikinee ubɔ[86].

⁴⁷«Unicaan àá binikɔkaabi bin kóò ni-puee ubɔ yaa kpántì ugaaja ní disool cúú ni-nabiki kiba ní udaan dū u-ba ki nyáfiǹ ugaajee àá u-dicaŋkun yab ubɔee,

⁴⁸an pú nsan bí fàtīí dā-u kí líí. U-nabiki kiba ń fàtīí dā-u kí líí.

⁴⁹U yaa kaa cáá u nì un pēē kiŋkiŋee, u-baawaai àá u-baawaai jipɔɔn àá u nì un pēē mmaalee ubɔ ŋūǹ kí dā-u kí líí. Úǹ u-ba yaa tí ká ŋŋmam, u ŋūǹ kí dā u-ba kí líí.

⁵⁰U nì un dá-uee dāa kàal̀ ní kí cɔ́tí kí kpèè yii, kí yòon̄ ŋwiin ŋun u dū u-ba ki nyáfiǹ-uee kí cáá sāā dibatɔl bindee, abin ŋin nyɔkɔm an nyáńee. Míǹ boonee ní bí cɔ́tí kí kpèè ŋin kíǹ dibatɔl bindi ń nín bàńee, ní ú pà míǹ kí nóó nì upaadaan nín fòol̄ pu ŋwiinee.

⁵¹Abin ŋin kíǹee yaa náaǹee, ú nyàab̀ un dá-uee nimbiliŋ dijaŋkpaandi kí tīī-u.

⁵²Abin ŋin kíǹ dibatɔl bindi ń nín bàńee yaa kaa ti náaǹee, ú cɔ́tí kí kpèè abin gbanti nimbiliŋ kí téeǹ-u.

⁵³Ama ŋyunti ŋun ní u dáá bí u-kpiliu ceeyee, u ŋman sá kii upaadaanee ní, kí nīn fòol̄ dibindi kamaa u-paati. Ní taa yàntī u-kpiliu ń nīn wɔ́b̀-u ni kā ki kpèé.

⁵⁴U-nabiki yaa kaa ŋúń ki dá-u ki líì ní úǹ u-ba kaa ŋúń ki dá u-ba ki líì ní dibatɔl bindi yaa dūu bāańee, u nì u-dicaŋku kɔkɔ fōō bi-ba.»

⁵⁵«Tiŋman, Isirayeel yab sá man tɔntɔnliibi ní. Bi lafun sá man tɔntɔnliibi, di sá yii man di nyántìń-bi Eejipiti tiŋkin. Man di sá ni-Dindaan ni-Nimbɔtiu.