Read Ntcham Lévitique 26 Bible Online

Lévitique 26 - Ntcham bible

Lévitique 26

¹«Ní taa náań awaa, kí taa mā akumpoo, kí taa cóoń ditaŋkpal kí nīn tòotī, kí taa kpítí ataŋkpee kí nántíǹ tiba ni-tiŋkin laaba ki jáaḿ-ŋi. Di sá yii man di sá ni-Dindaan ni-Nimbɔtiu.

²«Nín̄ ŋúb́maan ŋwiŋŋuŋfikaa ŋun m tīī-nee kí nīn tɔ́ m-circir kɔŋkooŋŋu tiŋan. Man di sá ni-Dindaan.»

³«Ni yaa ŋúb́ m-bɔkpaaŋi nì m-marab ki ŋáań bi nín bí yii ní ŋá puee,

⁴m làá yàntī utaa ń nì ŋyunti ŋun an máaǹee, kitiŋ ń lòoǹ tikpaajin mmɔntiimin ní isufi mun ń lòoǹ abil tiŋan.

⁵Ni làá dāá nīn cēē tijimpin ní kí tin cáá sāā fiinyi biliŋ kìtitam. Ni làá dāá nīn kìtī ni-fiinyi biliŋ ní kí tin cáá sāā tijimpin bɔ̄ltam. Ni làá dāá nīn bí digbíl poon ní kí dāá nīn bí ni-tiŋkin nì ŋgbansɔŋfi[87].

⁶M làá dāá yàntī ŋgbansɔŋfi ń nīn bí ni-tiŋkin. Ni yaa láa dɔ̄ ki gèeǹee, naa dāa fàŋkí tiba. M làá dāá jà ipeecuncuti kɔkɔ ni-tiŋkin. Ubɔ kaa dāa gíti dòoń kí jáǹ-ni.

⁷Ni làá dāá já kí pɔ̄ɔkiǹ ni-nannanliibi kí dāá jà-bi.

⁸Ni-kansikin binib biŋmoo dāa jì ni-nannanliibi dilaataal, ní binib dilaataal ń dāá jà kutukub saalaa, ní ní dāá já kí pɔ̄ɔkiǹ ni-nannanliibi.

⁹M làá dāá ŋá-ni tiŋan ní kí yàntī ní bùtī kí wíiǹ tikpil. M làá dāá nīn ŋúb́ m-poondi din m pōoǹ-nee.

¹⁰Ni làá dāá jī tijiŋkpikil kí núkú, áli gba kí dāá kɔ́tí tikpikil gbanti kí pɔ̄ tipɔn mpaan.

¹¹M làá dāá nīn kóò ni-kansikin. M kpá kí fàtī m-boon kí tīī-ni.

¹²M làá dāá nīn còom̄ ni-kansikin. M làá nīn sá ni-Nimbɔtiu, ní nimbi ń nīn sá m-nibul[88].

¹³Man di sá ni-Dindaan ni-Nimbɔtiu un nyántìń-ni Eejipiti tiŋkin, ní taa ti nín̄ sá Eejipiti yab yumbuyee. Man di léetì ni-neen kpancikil, ní ki yāntì ni kíǹ ki còom̄ ni-yil gáań.»

¹⁴«Ama ni yaa kaa tɔ́-mi, kaa ŋáań kii marab nee kɔkɔ nín bí yii ní ŋá puee,

¹⁵ki yaa dū m-bɔkpaaŋi ki fá, ki fātì ni-boon ki tīī m-koobiliŋ, kaa bíi ŋáań m-marab nee kɔkɔ nín bí yii ní ŋá puee, ní ki yaa gbáń ki kpītì m-poondee,

¹⁶m nín làá dāá ŋá ni-puee sèé: «M làá dāá kɔ́ǹ-ni dinyoondin, kí yàntī didúntil weeŋyi nì nnaanyeem ń cúú-ni ní kí yàntī iween gbanti ń ŋmɔ́ kí bīil̀ ni-nimbiliŋ kí bàtī ni-wiiŋyi pu. Ni làá dāá kpɔ̀ kí bɔ̄l̀ ni-sati fám, kun puee ni-nannanliibi di dāa yì ni-kpaajinti gbanti kí jī.

¹⁷M làá dāá fàtī m-boon kí tīī-ni, ní ni-nannanliibi ń pɔ̄ɔkiǹ-ni. Bin bin ná-nee di làá dāá jī ni-pu dibeel kí nīn kpòotī-ni. Ubɔ kaa dāa bíi jì-ni ní ní kíĺ ki bíi sáń.

¹⁸«Míǹ gbanti kɔkɔ boonee, ni yaa kaa gbíntìi tɔ́-mee, ní ḿ dāá kūtì ni-kpitii tafadaaldi din poon ni bée miluli pu.

¹⁹M làá dāá nàan̄ kun tìì-ni mpɔn ni yòontí ni-ba yilpuee, kí dāá yàntī kutaa kun dàn̄ ni-pu nee ń pɔ̄ɔkì kii tikútee. M làá dāá yàntī utaa ń taa ti nì ni-timmu pu ní mú pɔ̄ɔkì kaŋkaŋ kii tikúbɔnee.

²⁰Ní ní kpɔ̀ kí kpɔ̀ kí gīī púb, ama ni-timmu kaa làá lòoǹ tikpaajin ní isufi mun kaa làá lòoǹ abil.

²¹«Ni yaa gbíntìi bíi jáà nì mi kaa là kí nīn tɔ́-mee, m làá dāá mɔ̀tīí kūtì ni-kpitii tafadaaldi miluli pu.

²²M làá dāá dū ipeecuncuti kí tɔ̄ ni-pu í kpɔ̀ ni-biyaamu, kí kpɔ̀ kí céetí ni-waŋkuti kɔkɔ, ní kí kpɔ̀ kí bàtī ni-pu ní kíń fiii. Áli gba ni-saŋyi kaa dāa gíti kāntí bin làá nīn còom̄ i-puee.

²³«Nì min kɔkɔ m dáaĺ ni-tafal mimmee, ni yaa kaa kpántì ni-ba ní ki gbíntìi bíi jáà nì mee,

²⁴ma mun làá dāá jáǹ-ni, ní kí mɔ̀tīí kūtì ni-kpitii tafadaaldi miluli pu.

²⁵M làá dāá cáań kujaau ni-tiŋki pu kí tɔ̀ ipɔntoon ni nín dū m-poondi ki fée pu. Báà ni yaa láa sáǹ ki bál̀ ni-timmu poonaaa, m làá dāá yàntī bìlbil kúm ń jēetí ni-pu, ní ḿ dū-ni kí líiǹ ni-nannanliibi.

²⁶M làá dāá yàntī tijin ń lóó-ni. Binimpoobi saalaa dāa ŋūǹ kí púĺ ni-kpɔnɔb dibububaantiil poon ní bí dāá cáań-ni kpɔnɔb fiiiyee ní ŋmɔ́ kaa làá díkí.

²⁷«Nì míǹ kɔkɔee, ni yaa gbíntìi bíi jáà nì mi kaa là kí nīn tɔ́-mee,

²⁸ma mun làá dāá jáǹ-ni nì m-ŋuul poon. Man m-ba di làá dāá dáaĺ ni-tafal ni-kpitii pu ŋfunyɔm miluli.

²⁹Ni làá dāá ŋmɔ́ ni-jipɔmbi nì ni-bisalib nanti.

³⁰M làá dāá gbá kí kpēelikì ni-waadiiŋŋi ŋin bí ŋgbantamu puee, nì ni-saraafaŋyi in pu ni tùutī talaalubee, kí kpɔ̀-ni kí páań awaa ŋin m kpéelikì ki bíl̀ee pu, ní kí dū-ni kí fá.

³¹Ni-timmu làá dāá kpántí adigbuŋkati ŋma ní. Ubɔ kaa dāa gíti gbōontí ni-saraafaŋyi laŋki, ní ḿ dāá fàtī m-boon kí tīī ni-saraabi.

³²Man m-ba di làá dāá nàan̄ ni-tiŋki ní án dāá ŋá ni-nannanliibi bin làá dāá fōō-kì kí nīn kíǹ ki kóòyee bitii.

³³M làá dāá cáań kujaau kí tɔ̄ ni-pu ní ní yàl̄ kí kɔ́ ntincamun. Ubɔ kaa dāa gíti kóò ni-tiŋkin ní ni-timmu ń dāá kpántí adigbuŋkati ŋma.

³⁴«Ni yaa láa bíń ni-nannanliibi timmu poonee, ni-tiŋki làá dāá dòon̄ kí ŋùŋfì.

³⁵Ŋyunti gbanti kɔkɔ poonee ní ni-tiŋki ń dāá dòon̄ kí ŋùŋfì kí téeǹ ni nín nìn dū iwiŋŋuŋfikaa in ki túń ki-pu ditundi ŋyunti ŋun ni nìn kóò niinee.

³⁶«Ni-kansikin bin kíǹ kaa kpíì ki bíń bi-nannanliibi tiŋkinee, m làá dāá kɔ́ǹ-bi dinyoondi. Bi yaa láa gbìl̄ kufaau kpaŋkpam lítèe, bi làá dāá fàŋkì kí sāǹ kii ubɔ di ŋúb́ kitàataajiki ki jì-bee kí cùú lítí, ama ní ubɔ mun kaa bíi jì-bi.

³⁷Bi dāa sáń ki gbéetí ki lítí tɔb pu kii bi ŋúb́ ntàataajimu ní ki jì-bee, ama báà ubɔ kaa pá bi-boon ki jì-bi. Baa dāa ŋūǹ kí sīĺ bi-nannanliibi nimbiin kí jáǹ-bi.

³⁸Ntincamun ní ni làá dāá kpú kí céetí, ní bí dāá síb́-ni ni-nannanliibi timmu gbanti poon.

³⁹Ni-kansikin bin yaa láa kíǹ kaa kpíì ki bíń ni-nannanliibi timmunee làá dāá kpúń niin ní. Bi làá dāá kpú bíǹ bi-ba nì bi-baabi kpitii pu ní.»

⁴⁰«Ama bi làá dāá béé yii bíǹ nì bi-baabi yīntì ní kí dāá lì yii baa síl̀ nì mi deedee, ki jáń nì mi,

⁴¹ní ma mun jáń nì bi ki cáá-bi ki cūnnì bi-nannanliibi tiŋkin. Ŋyunti gbantee, bi-pɔbiliŋ ŋin pɔ̄ɔ̄yee yaa láa sīntì ŋi-ba taapu ki fōō bi-yìntitam tafadaaldee,

⁴²ní ḿ dāá téetí dipoondi din m nìn pōoǹ Jaakɔb nì Isaaki nì Abraamee pu. M làá dāá téetí m nín nìn pōoǹ kí ŋá tin kí tīī bi-tiŋkee pu[89].

⁴³Ama bi làá dāá yīkì bi-tiŋki pu, ní kíǹ ń dòon̄ ki-ba pu kí ŋùŋfì. Ŋyunti gbantee, bíǹ bíi fòol̄ bi-kpitii paati nì bi nín dū m-koobiliŋ nì m-bɔkpaaŋi ki fá puee tafadaaldi dee.

⁴⁴Nì míǹ kɔkɔee, ŋyunti ŋun bi dāa bí bi-nannanliibi tiŋkinee, maa làá dāá dū-bi kí fá kɔkɔ, kaa làá dāá fàtī m-boon kí tīī-bi. Maa làá dāá kpɔ̀ kí céetí-bi, kaa làá dāá kpìtī m-poondi. Di sá yii man di sá bi-Dindaan bi-Nimbɔtiu.

⁴⁵M làá dāá téetí dipoondi din m nìn pōoǹ bi-baabi bin m nìn nyántìń Eejipiti tiŋkin, kí nīn sá bi-Nimbɔtiu atimbun kɔkɔ ń kée pu, kí fīī-bi. Man di sá bi-Dindaan.»

⁴⁶Abɔkpaa nì akoobil nì marab bin ti-Dindaan nìn yóoǹ án nīn bí u nì Isirayeel yab kansikinee dee. Siinaayi jool pu ní ti-Dindaan nìn dū-bi ki tīī Mooyiisi ú dūú nàatī Isirayeel yab.