Read Ntcham Lévitique 3 Bible Online

Lévitique 3 - Ntcham bible

Lévitique 3

¹«Ubɔ yaa lēē u-nacaŋkpuŋkun unaa kí ŋá mpèé saraauee, ú nīn sá uja àá usal un laaba kaa wɔ̀b̄ee. Ú cáań-u circir kɔŋkooŋŋu nyɔkɔpu ti-Dindaan nimbiin.

²Ú dū u-ŋal kí páań kuwaŋkuluuee yil pu, kí làntì-ku circir kɔŋkooŋŋu punyɔkɔki nyɔkɔpu, ní Aarɔn jipɔmbi bisaraaŋaliibi ń dū fatiku kí yàaǹ nsaraafan jaŋŋi kɔkɔ pu kí màntīí tū.

³Tin bi làá lēē mpèé saraau gbanti poon kí wà ŋŋmi kí tīī ti-Dindaanee di sá ŋkpam min bīī ina puee nì ŋkpam min pá i-puee,

⁴nì aceebil liitil nì ŋkpam min pá ŋi nì ntikakal puee, ní kí lēē mpɔɔlam kɔkɔ kí nákatí kí kpáaǹ aceebil dicilpu.

⁵Ní Aarɔn jipɔmbi ń dūú kūtì saraawɔkaa un pá idɔ in bi dūu páaǹ ŋŋmi pu nsaraafan puee. An di sá mpèé saraau un bi dùú wà ŋŋmi u-sɔnsɔfiŋu sɔ̀ŋkī ti-Dindaan pɔbilee.

⁶«An yaa sá upii àá uŋoobu ní ubɔ cáań kí ŋá saraa kí dàkà u nì ti-Dindaan kansikin pèéŋuee, án nīn sá uja àá usal un laaba kaa wɔ̀b̄ee.

⁷An yaa sá dipibil ní udaan cáań kí dūú ŋá saraayee, ú cáań-dì ti-Dindaan nimbiin.

⁸Ú dū u-ŋal kí páań dipibilee yil pu ní kí làntì-dì circir kɔŋkooŋŋu punyɔkɔki nyɔkɔpu ní Aarɔn jipɔmbi ń dū di-fatikuu kí yàaǹ nsaraafan jaŋŋi kɔkɔ pu kí màntīí tū.

⁹Tin bi làá lēē mpèé saraau gbanti poon kí wà ŋŋmi kí tīī ti-Dindaanee di sá ŋkpam: dijugbindi[3] din bi lēēyee kɔkɔ nì ŋkpam min bīī ina puee nì ŋkpam min kɔkɔ pá i-puee,

¹⁰nì aceebil liitil nì ŋkpam min pá ŋi nì ntikakal puee, ní kí lēē mpɔɔlam kɔkɔ kí nákatí kí kpáaǹ aceebilee dicilpu.

¹¹Niinee ní usaraaŋal ń cáá wà ŋŋmi nsaraafan pu. An di sá tijin saraau un bi dùú wà ŋŋmi kí tīī ti-Dindaanee.

¹²«An yaa sá uŋoobu ní udaan cáań kí dùú ŋá saraayee, ú cáań-u ti-Dindaan nimbiin.

¹³Ú dū u-ŋal kí páań uŋoobuee yil pu ní kí làntì-u circir kɔŋkooŋŋu punyɔkɔki nyɔkɔpu ní Aarɔn jipɔmbi ń dū u-fatikuu kí yàaǹ nsaraafan jaŋŋi kɔkɔ pu kí màntīí tū.

¹⁴Tin bi làá lēē saraa gbanti poon kí wà ŋŋmi kí tīī ti-Dindaanee di sá ŋkpam min bīī ina puee nì ŋkpam min kɔkɔ pá i-puee,

¹⁵nì aceebil liitil nì ŋkpam min pá ŋi nì ntikakal puee ní kí lēē mpɔɔlam kɔkɔ kí nákatí kí kpáaǹ aceebilee dicilpu.

¹⁶Niinee ní usaraaŋal ń dūú wà ŋŋmi nsaraafan pu. An di sá tijin saraau un bi dùú wà ŋŋmi u-sɔnsɔfiŋu sɔ̀ŋkī ti-Dindaan pɔbilee. «Tin kamaa pée sá ŋkpamee, ti-Dindaan di yì.

¹⁷Án nīn sá dibɔkpaal din làá nīn bí ki cá jaanjaanee ki tīī ni nì ni-biyaamu yii báà laakin kamaa ní ni yaa bàn̄ ki kóòyee, ní nīn nyí yii naa máaǹ kí ŋmɔ́ kuwaŋkuluu fatikuu nì ku-kpam.»