Read Ntcham Lévitique 4 Bible Online

Lévitique 4 - Ntcham bible

Lévitique 4

¹Ti-Dindaan sòon̄ nì Mooyiisi yii:

²«Tùkù Isirayeel yab yii: «Ubɔ yaa kaa nyí ní ki yīntì ki ŋá tin ti-Dindaan marab nee kansikin ubɔ bí yii bí taa ŋée,

³«an yaa sá usaraaŋakpil di ŋá ikpiti ní u-kpitii gbanti yāntì samaa kɔkɔ kɔ́ ikpitinee, u máaǹ kí cáań dinabil din laaba kaa wɔ̀b̄ee kí ŋá ti-Dindaan saraa ní kí nín ká u-kpitii pɔ̄tam.

⁴Ú cáań dinabilee circir kɔŋkooŋŋu punyɔkɔki nyɔkɔpu ti-Dindaan nimbiin, kí dū u-ŋal kí páań dinabilee yil pu ní kí làntì-dì ti-Dindaan nimbiin niin.

⁵Usaraaŋakpil ń dū dinabilee fatikuu kí kɔ́ǹ circir kɔŋkooŋŋu poon,

⁶ní ti-Dindaan nimbiin niinee ní ú dū u-ŋambiki kí sēē fatikuee kí dūú yàaǹ ŋŋaabu ŋun bi dūu pītì ki yākatì circir páaa nì circir laŋkee pu ŋfunyɔm miluli.

⁷Usaraaŋakpil ń bàtī fatikuee kí ŋmìtī nsaraafan ŋun pu bi tùutī talaalub ŋu bí circir kɔŋkooŋŋun, ti-Dindaan nimbiinee yiŋyi pu. Ú dū fatiku un kíǹee kɔkɔ kí kpáatí kí pɔ̀l̄ saraawɔkaa faŋŋu ŋun bí circir kɔŋkooŋŋu punyɔkɔki nyɔkɔpuee taapu.

⁸Ú lēē tinan tin pée cáá ŋkpam ikpiti pɔ̄tam saraau gbanti poonee, an dàkà yii ŋkpam min bīī ina puee nì ŋkpam min kɔkɔ pá i-puee,

⁹nì aceebil liitil nì ŋkpam min pá ŋi nì ntikakal puee, ní kí lēē mpɔɔlam kɔkɔ kí nákatí kí kpáaǹ aceebilee dicilpu,

¹⁰kii bi nín lèekī dijandi din mpèé saraau poonee. Ní usaraaŋakpil ń cáá wà ŋŋmi saraawɔkaa faŋŋu pu.

¹¹Ama dinabilee gbaŋŋu nì di-nanti kɔkɔ nì di-yil nì di-yakaŋ nì di-binti kɔkɔee,

¹²an dàkà yii dinabilee nanti tin pée kíǹee kɔkɔee, ú cáá nyāntí dinaapaal kpaanceetiŋu mpaan ŋun pu bi féeń ŋkpam min bi wùn̄ee fantamee ní kí dūú wà ŋŋmi idɔ pu. Difantancundee pu ní bí dūú wà ŋŋmi.»

¹³«An yaa sá Isirayeel nikitil kɔkɔ di yaa kaa nyí ní ki yīntì ki ŋá tin ti-Dindaan marab nee kansikin ubɔ bí yii bí taa ŋée, bi fōō dibɔkpil.

¹⁴Boonee bi yaa láa béè ikpiti in bi ŋée, samaa kɔkɔ ń cáań dinabil kí ŋá ikpiti pɔ̄tam saraau. Bí cáań-dì circir kɔŋkooŋŋu punyɔkɔki nyɔkɔpu,

¹⁵ní bitindaŋkpilib ń dū bi-ŋalii kí páań dinabilee yil pu ní bi-kansikin ubɔ ń làntì-dì ti-Dindaan nimbiin niin.

¹⁶Usaraaŋakpil ń yòon̄ dinabilee fatikuu kí cáá kɔ́ǹ circir kɔŋkooŋŋu poon.

¹⁷Ú dū u-ŋambiki kí sēē fatiku kí dūú yàaǹ ŋŋaabu ŋun bi dūu pītì ki yākatì circir páaa nì circir laŋkee pu ŋfunyɔm miluli.

¹⁸Ú bàtī fatikuee kí ŋmìtī nsaraafan ŋun pu bi tùutī talaalub ŋu bí circir kɔŋkooŋŋun, ti-Dindaan nimbiinee yiŋyi pu. Ú dū fatiku un kíǹee kɔkɔ kí kpáatí kí pɔ̀l̄ saraawɔkaa faŋŋu ŋun bí circir kɔŋkooŋŋu punyɔkɔki nyɔkɔpuee taapu.

¹⁹Ú lēē dinabilee kpam kɔkɔ kí cáá wà nsaraafan pu.

²⁰Kii usaraaŋakpil nín ŋá úǹ u-ba kpitii pɔ̄tam saraau nabil puee, míǹ mbaantiim ní u máaǹ kí ŋá dinabil dinee mun. Ní usaraaŋakpil ń ŋá Isirayeel yab pu dikoobil din u máaǹ kí ŋée ní bí ká bi-kpitii pɔ̄tam.

²¹Míǹ boonee ní ú yòon̄ dinabilee nanti tin kíǹee kɔkɔ kí cáá nyāntí dinaapaal kpaanceetiŋu ní kí dū-tì kí wà ŋŋmi kii u nín wùn̄ dinabipeepeekaalee puee. Samaa kɔkɔ kpitii pɔ̄tam saraau dee.»

²²«An yaa sá dibɔtibil diba di yaa kaa nyí ní ki yīntì ki ŋá tin ti-Dindaan u-Nimbɔtiu marab nee kansikin ubɔ bí yii bí taa ŋée, udaan fōō dibɔkpil.

²³U yaa láa béè ikpiti in u ŋée, ú cáań uŋɔja un laaba kaa wɔ̀b̄ee kí ŋá saraa.

²⁴Ú dū u-ŋal kí páań uŋɔjee yil pu ní kí làntì-u laakin bi làntī saraawɔkaa waŋkuti ti-Dindaan nimbiinee. Ikpiti pɔ̄tam saraau dee.

²⁵Usaraaŋal ń dū u-ŋambiki kí sēē uŋɔjee fatikuu kí dūú ŋmìtī saraawɔkaa faŋŋu yiŋyi pu. Ú dū fatiku un kíǹee kɔkɔ kí kpáatí kí pɔ̀l̄ saraawɔkaa faŋŋu taapu.

²⁶Ní ú wà ŋkpam kɔkɔ nsaraafan pu kii bi nín ŋáań mpèé saraau kpam puee. Ní usaraaŋal ń ŋá dibɔtibilee pu dikoobil din u máaǹ kí ŋée ní dí ká di-kpitii pɔ̄tam.

²⁷«An yaa sá unifantanti ubɔ di kaa nyí ní ki yīntì ki ŋá tin ti-Dindaan marab nee kansikin ubɔ bí yii bí taa ŋée, udaan fōō dibɔkpil.

²⁸U yaa láa béè ikpiti in u ŋée, ú cáań uŋɔsal un laaba kaa wɔ̀b̄ee kí ŋá saraa u-kpitii gbanti pu.

²⁹Ú dū u-ŋal kí páań uŋɔsal un u cáań kí ŋá ikpiti pɔ̄tam saraauee yil pu ní kí làntì-u laakin bi làntī saraawɔkaa waŋkutee.

³⁰Usaraaŋal ń dū u-ŋambiki kí sēē uŋɔsalee fatikuu kí dūú ŋmìtī saraawɔkaa faŋŋu yiŋyi pu. Ú dū fatiku un kíǹee kɔkɔ kí kpáatí kí pɔ̀l̄ saraawɔkaa faŋŋu taapu.

³¹Ú lēē ŋkpam kɔkɔ kii bi nín lèekī mpèé saraau kpam puee kí cáá wà nsaraafan pu, ní u-sɔnsɔfiŋu ń sɔ̀ŋkì ti-Dindaan pɔbil. Míǹ ní usaraaŋal máaǹ kí ŋá ní kí fíntí udaan kpitii ní ú nín ká u-kpitii pɔ̄tam[4].

³²«An yaa sá upii ní udaan cáań kí ŋá u-kpitii pɔ̄tam saraauee, ú nīn sá upisal un laaba kaa wɔ̀b̄ee.

³³Ú dū u-ŋal kí páań upisalee yil pu ní kí làntì-u laakin bi làntī saraawɔkaa waŋkutee.

³⁴Usaraaŋal ń dū u-ŋambiki kí sēē upisalee fatikuu ní kí dūú ŋmìtī saraawɔkaa faŋŋu yiŋyi pu ní kí dū fatiku un kíǹee kɔkɔ kí kpáatí kí pɔ̀l̄ saraawɔkaa faŋŋu taapu.

³⁵Ú lēē upisalee kpam kɔkɔ kii bi nín lèekī mpèé saraau pibil kpam puee, ní usaraaŋal ń cáá wà ŋŋmi nsaraafan pu nì saraabi bin kɔkɔ sá bí dùú wà ŋŋmi kí tīī ti-Dindaanee. Usaraaŋal ń ŋá udaan pu dikoobil din u máaǹ kí ŋée ní ú ká u-kpitii pɔ̄tam.»